కొవ్వు కరిగించే పనిలో ఉండు,,,నానిపై పీవీపీ సెటైర్లు

విజయవాడ ఎంపీ కేశినేని నానిపై ప్రముఖ వ్యాపారవేత్త ప్రసాద్ వి పొట్లూరి మండిపడ్డారు. ఈ మేరకు నానిపై ఆగ్రహం వ్యక్తం చేస్తూ ఆయన చేసిన ట్వీట్ సోషల్ మీడియాలో హాట్‌టాపిక్‌గా మారింది. నేరుగా కేశినేని నాని పేరును ప్రస్తావిస్తూ ఆయనకు పీవీపీ స్ట్రాంగ్ కౌంటర్ ఇచ్చారు. తాను చేసినంత అభివృద్ది దేశంలో ఏ ఎంపీ చేయలేదంటూ బుధవారం కేశినేని నాని వ్యాఖ్యలు చేసిన నేపథ్యంలో.. దానికి పీవీపీ స్ట్రాంగ్ కౌంటర్ ఇచ్చారు.

'నీ బిల్డప్ ఏందయ్యా కేశినేని నాని.. నువ్వేదో అల్లూరికి ఎక్కువ, నేతాజీకి తక్కువ అన్నట్టు.. ప్రజాసేవ కోసం పుట్టానంటావు.. కానీ, దొబ్బెది బ్యాంకులని, జీతాలు ఎగదొబ్బేది కార్మికులకు.. వెరసి మన బెజవాడోళ్ళందరికి చేతిలో చిప్ప.. నోటిలో మట్టి.. వేదవ సోది ఆపి కాస్త కొవ్వు కరిగించే పనిలో ఉండు.. తర్వాత ఎన్నికల బరిలో దొర్లుకుంటూ వద్దువు' అంటూ ప్రసాద్ వి పొట్లూరి విమర్శలు కురిపించారు.

గత ఎన్నికల్లో విజయవాడ పార్లమెంట్ నియోజకవర్గం నుంచి వైసీపీ ఎంపీ అభ్యర్ధిగా పీవీపీ పోటీ చేసి కేశినేని నానిపై ఓటమి పాలయ్యారు. 8,726 ఓట్ల మెజార్టీతో గత లోక్‌సభ ఎన్నికల్లో కేశినేని నాని టీడీపీ నుంచి గెలుపొందారు. నానికి 5,75,498 ఓట్లు రాగా.. పీవీపీకి 566,772 ఓట్లు వచ్చాయి. ఇక జనసేన నుంచి పోటీ చేసిన ముత్తంశెట్టి సుధాకర్‌కు 81,650 ఓట్లు వచ్చాయి. కానీ ఇప్పుడు బెజవాడ రాజకీయ పరిణామాలు పూర్తిగా మారిపోయాయి. కేశినేని నాని టీడీపీలో అసంతృప్తిగా ఉండగా. పీవీపీ వైసీపీకి పూర్తిగా దూరంగా ఉన్నారు. ఇప్పుడు ఆయన ఏ పార్టీకి మద్దతుగా ఉన్నారనేది ఎవరికీ అర్థం కావడం లేదు.

విజయవాడ పార్లమెంట్‌కు వైసీపీ నుంచి ఇప్పటివరకు ఇంచార్జ్‌గా ఎవరినీ నియమించలేదు. గత ఎన్నికల్లో పరాజయం తర్వాత పీవీపీ వైసీపీకి దూరంగా ఉన్నారు. ఆ పార్టీ కార్యక్రమాల్లో ఎక్కడా పాల్గొనలేదు. దీంతో వచ్చే ఎన్నికల్లో ఆయన పోటీ చేస్తారా? లేదా? అనేది అనుమానంగా ఉంది. ఇక టీడీపీ నుంచి అభ్యర్ధి ఎవరనే దానిపై కూడా క్యాడర్‌లో డైలమా నెలకొంది. టీడీపీ నుంచి టికెట్ ఇవ్వకపోతే తాను ఇండిపెండెంట్ అభ్యర్థిగా పోటీ చేస్తానంటూ నాని తేల్చిచెప్పారు. ఎవరో పిట్టల దొరకు టికెట్ ఇచ్చినా తనకు ఇబ్బంది లేదని చెప్పుకొచ్చారు. తాను చేసిన అభివృద్ధి చేసి స్వతంత్రంగా పోటీ చేసినా ప్రజలు తనను గెలిపిస్తారని చెబుతున్నారు. కేశినేని తమ్ముడు చిన్ని యాక్టివ్‌గా పనిచేస్తుండటంతో.. వచ్చే ఎన్నికల్లో ఆయనకు ఎంపీ టికెట్ ఇస్తారేమోననే చర్చ నడుస్తోంది.