చంద్రబాబు మాటలు పగటి కలల్లా ఉంటాయి...సజ్జల రామకృష్ణారెడ్డి

చంద్రబాబు మాటలు పగటి కలల్లా ఉంటాయని వైఎస్సార్ కాంగ్రెస్ పార్టీ రాష్ట్ర ప్రధాన కార్యదర్శి సజ్జల రామకృష్ణారెడ్డి  ఎద్దేవా చేశారు. తెలుగు దేశం పార్టీ అధినేత నారా చంద్రబాబునాయుడు, ఆ పార్టీ జాతీయ ప్రధాన కార్యదర్శి నారా లోకేష్ తీరు ఆశ్చర్యం కలిగిస్తోందని ఆయన అన్నారు.  చంద్రబాబు సీనియర్ మోస్ట్ రాజకీయ నాయకుడే అని.. టీడీపీ మేనిఫెస్టోను ముఖ్యమంత్రి వైఎస్ జగన్మోహన్ రెడ్డి పొగిడారని తనకు తానే అనుకోవడం విచిత్రంగా ఉందన్నారు. ఇక, నారా లోకేష్‌ది చిల్లర వ్యవహారమని సజ్జల పేర్కొన్నారు.

మాజీ మంత్రి వైఎస్ వివేకానందరెడ్డి హత్య కేసుకు సంబంధించి లోకేష్ చవకబారుగా ప్లకార్డులు ప్రదర్శిస్తున్నారని సజ్జల రామకృష్ణారెడ్డి పేర్కొన్నారు. ఇలాంటివి కింది స్థాయి కార్యకర్తలు చేస్తే అర్థం చేసుకోవచ్చని.. కానీ, లోకేష్ ఇలా చేయడం దారుణమన్నారు. లోకేష్‌కు గర్భంలో ఉన్నప్పుడే మానసిక వైకల్యం వచ్చి ఉంటుందని మండిపడ్డారు.

ఇక, భారతీయ జనతా పార్టీ (బీజేపీ)తో పొత్తు కోసం చంద్రబాబునాయుడు వెంపర్లాడుతున్నారని సజ్జల రామకృష్ణారెడ్డి ఆరోపించారు. ముఖ్యమంత్రి వైఎస్ జగన్మోహన్ రెడ్డి ఢిల్లీ వెళితే తాటాకులు కడతారని.. మరి ఇప్పుడు చంద్రబాబు గురించి ఏం మాట్లాడతారని ప్రశ్నించారు.

అలాగే, జనసేన పార్టీ అధినేత పవన్ కళ్యాణ్‌ను ప్రజల్లో తిరగవద్దని ఎవరూ అనలేదని.. తిరగాలనే తాము కూడా చెబుతున్నామని సజ్జల రామకృష్ణారెడ్డి అన్నారు. అయితే పవన్ ఎంత వరకు తిరుగుతాడన్నది నమ్మకం లేదన్నారు. అంతకు ముందు తన కొడుకు లోకేష్‌కు అడ్డం వస్తారని చంద్రబాబు ఇంతకు ముందు పవన్ కళ్యాణ్ యాత్రను ఆపినట్లు ఉన్నాడని ఆయన ఆరోపించారు. ఒక కులాన్ని నమ్ముకుని రాజకీయాల్లోకి రావాలనుకుంటే ప్రజలు ఆమోదించరని పేర్కొన్నారు. ఏపీకి చంద్రబాబు, పవన్ కళ్యాణ్, లోకేష్ అందరూ గెస్ట్ ఆర్టిస్టులే అని సజ్జల రామకృష్ణారెడ్డి అన్నారు.