అనంతపురం జిల్లాలో భారీ దోపిడి.... పెళ్లి మండపంలో కాజేసిన దుండగులు

ఇటీవల పెళ్లి మండపాలు సైతం దొంగలకు అడ్డాగా మారుతోంది. ఇదిలావుంటే ఆడబిడ్డ పెళ్లికి ఖర్చు చేయాల్సిన డబ్బు, నగలను ఓ దొంగ దోచుకెళ్లిన ఘటన అనంతపురం నగర శివారుల్లోని నీలం రాజశేఖరరెడ్డి కళ్యాణ మండపంలో చోటు చేసుకుంది. నాలుగో పట్టణ పోలీసులు తెలిపిన వివరాల మేరకు.. రాప్తాడుకు చెందిన బిళ్లే నారాయణస్వామి కుమార్తెని, వేపకుంటకు చెందిన సోమన్న కుమారుడి ప్రస్తుతం తిరుమలలో వైద్యుడు)కి ఇచ్చి వివాహం చేయాలని ఇరు కుటుంబాల పెద్దలు నిర్ణయించారు.

ఇందులో భాగంగా అనంతపురం శివార్లలోని నీలం రాజశేఖరరెడ్డి కల్యాణ మండపంలో మే 31వ తేదీన ముహూర్తం కాగా, 1న తలంబ్రాలు జరిగాయి. గురువారం పెళ్లి వేడుకకు హాజరైన బంధువులు, మిత్రులు నూతన వధువరులకు తెచ్చిన బహుమతులను వధువు తల్లిదండ్రులు ఓ గదిలోకి సర్దుతున్నారు. ఈ సమయంలో బిళ్లే నారాయణస్వామి తన చేతిలో ఉన్న రూ. 7.50 లక్షల డబ్బుతో పాటు రెండు తులాల బంగారు నగలున్న బ్యాగును వారికి కేటాయించిన సేఫ్టీ గదిలో దాచారు. అదే గదిలో వధువుకు వచ్చిన గిఫ్ట్‌లను ఓ పక్కకు సర్దారు. తీరా డబ్బున్న బ్యాగు వైపు చూడగా అది కనిపించలేదు.

దీంతో అనుమానం వచ్చి కళ్యాణ మండపం మొత్తం గాలించారు. గుర్తు తెలియని ఓ వ్యక్తి ఆ గదిలో నుంచి బయటికి వచ్చినట్లు తోటి వారు చెప్పడంతో తెలుసుకున్న బాధితులు విషయాన్ని నాలుగో పట్టణ పోలీసులకు తెలిపారు. హుటాహుటిన అక్కడికి చేరుకున్న పోలీసులు సీసీ కెమెరాల ఆధారంగా దొంగను గుర్తించే పనిలో పడ్డారు. కాగా ఓ వ్యక్తి మండపం నుంచి బయటకు వెళ్లడం కనిపించింది. అతనే దొంగా? కాదా? అన్నది తెలియాల్సి ఉంది. పెళ్లికి ఖర్చు పెట్టాలనుకున్న డబ్బు మాయం కావడంతో బాధిత కుటుంబ సభ్యులు తీవ్ర ఇబ్బందులు పడ్డారు.

మరోవైపు కళ్యాణ మండపాల్లో చోరీలకు పాల్పడే దొంగల జాబితాను వెలికి తీసిన పోలీసులు.. దొంగను పట్టుకునేందుకు వ్యూహత్మకంగా పావులు కదుపుతున్నారు. గతంలో ఇలాంటి నేరాలతో సంబంధాలు ఉన్న వారిని స్టేషన్‌కు పిలిపించి విచారిస్తున్నారు. కళ్యాణ మండపంలో అనుమానాస్పదంగా కనిపించిన వ్యక్తి ఫొటోను సేకరించారు. ఈ ఫొటో ఆధారంగా దొంగ కోసం పోలీసులు గాలింపు చేపట్టారు.