కోనసీమ జిల్లాలో ఆన్లైన్ గేమ్‌కి యువకుడు బలి
Andhra Pradesh Telugu | Suryaa Desk | Published : Tue, Jun 06, 2023, 06:13 PM
కోనసీమ జిల్లాలో ఆన్లైన్ గేమ్‌కి యువకుడు బలి అయ్యాడు. ఆన్లైన్ గేమ్ ఆడి సాధ్విక్ అనే యువకుడు రూ.78 వేలు పోగొట్టుకున్నాడు. తన తాత ఆపరేషన్ కోసం దుబాయ్ నుంచి సాధ్విక్ మేనత్త డబ్బులు పంపింది. మేనత్త పంపిన డబ్బులతో సాధ్విక్ ఆన్లైన్ గేమ్ ఆడాడు. ఆమె పంపిన డబ్బులు మొత్తం పోయాయి. దీంతో ఇంట్లో తెలిస్తే మందలిస్తారని సాధ్విక్ ఆత్మహత్య చేసుకున్నాడు. సాధ్విక్ సూసైడ్‌తో అతని కుటుంబం విషాదంలో మునిగిపోయింది.
కేవలం సాధ్విక్ ఒక్కడే కాదు.. వందలాది మంది యువకులు ఈ ఆన్ లైన్ గేమ్స్ కారణంగా తనువు చాలిస్తున్నారు. ఆన్లైన్ గేమ్‌లకు అలవాటు పడిపోయే దశ నుంచి.. ఆ ఆటలకు బానిసలుగా మారే పరిస్థితి వస్తోంది. ప్రపంచానికంతా కీడు తలపెట్టిన కరోనా.. ఆన్లైన్ గేమ్‌లకు మాత్రం మంచే చేసింది. మహమ్మారి, లాక్‌డౌన్‌ వల్ల.. విద్యార్థులకు ఆన్లైన్ క్లాసులు, ఉద్యోగులకు వర్క్‌ ఫ్రమ్‌ హోమ్‌ అనివార్యం కావడంతో.. స్మార్ట్‌ ఫోన్ల వాడకం విపరీతంగా పెరిగింది. ఇంటర్నెట్‌ డేటా ప్లాన్‌లు అందుబాటు ధరల్లోనే ఉన్నాయి. ఈ పరిణామాలే 'ఆన్లైన్ గేమింగ్‌ బూమ్‌'ను సృష్టించాయి.
ఏప్రిల్‌ 2020లో మన దేశంలో 783 మిలియన్ల గేమింగ్‌ యాప్స్‌ డౌన్‌లోడ్‌ అయ్యాయి. ఇది ప్రపంచంలోని మొత్తం డౌన్‌లోడ్స్‌లో 16.6 శాతం. ఈ పరిణామంతో భారతదేశం గేమింగ్‌ ఇండస్ట్రీలో అతిపెద్ద మార్కెట్‌గా ఎదగబోతోందని ప్రపంచం గుర్తించింది. దీంతో విద్యార్థులు, యువతి ఈ ఆన్లైన్ గేమ్స్ వలలో చిక్కుకుంటున్నారు. డబ్బులు పోగొట్టుకొని ప్రాణాలు తీసుకుంటున్నారు.
|
|