సోమవారంనాడే అధిక సంఖ్యలో నమోదవుతోన్న గుండే పోటు కేసులు,,,తాజా అధ్యయనంలో వెల్లడి

గుండెపోటు విషయంలో ఆసక్తికర అంశాలు వెలుగులోకి వస్తున్నాయి. ఇటీవల కాలంలో చిన్నా పెద్దా అన్న తేడా లేకుండా గుండెపోటుకు గురై ప్రాణాలు కోల్పోవడం తీవ్ర ఆందోళనకు గురిచేస్తోంది. ఈ మరణాల వెనుక కారణాల ఏమైనప్పటికీ జీవనశైలిలో వచ్చిన మార్పులు, ఇతర ఆరోగ్య సమస్యలే కారణమని నిపుణుల అభిప్రాయం. అయితే, మిగతా రోజులతో పోలిస్తే సోమవారం నాడు తీవ్రమైన గుండెపోటు కేసులు ఎక్కువగా సంభవించే అవకాశం ఉందని తాజాగా ఓ అధ్యయనంలో వెల్లడయ్యింది. ఎస్‌టీ-సెగ్మెంట్‌ ఎలివేషన్‌ మయోకార్డియల్‌ ఇన్‌ఫార్‌క్షన్‌ అనేది ఓ రకమైన గుండెపోటు. సాధారణ భాషలో చెప్పాలంటే గుండె రక్తనాళం వంద శాతం పూడుకుపోవడం వల్ల ఈ సమస్య తలెత్తుతుంది.

ఇది తీవ్ర అనారోగ్యంతోపాటు ఒక్కోసారి మరణానికీ దారితీస్తుంది. ఇదే అంశంపై ఐర్లాండ్‌లోని బెల్‌ఫాస్ట్‌ హెల్త్‌ అండ్‌ సోషల్‌ కేర్‌ ట్రస్ట్‌, రాయల్‌ కాలేజ్‌ ఆఫ్‌ సర్జన్స్‌‌కు చెందిన నిపుణులు సంయుక్త అధ్యయనం చేపట్టారు. 2013 నుంచి 2018 మధ్య ఐర్లాండ్‌ ఆస్పత్రుల్లో గుండెపోటుతో చేరిన 10,528 మంది రోగుల సమాచారాన్ని విశ్లేషించారు. ఈ అధ్యయన ఫలితాలను మాంచెస్టర్‌లో జరిగిన బ్రిటిష్‌ కార్డియోవాస్క్యులర్‌ సొసైటీ కాన్ఫరెన్స్‌లో వెల్లడించారు. ఆదివారం కూడా అంచనాల కంటే ఎక్కువగా స్టెమీ మరణాల రేటు ఉందని గుర్తించారు.

‘ప్రత్యేకమైన ఈ స్టెమీ గుండెపోటు ఏ సమయంలో సంభవిస్తుందనడానికి తాజా అధ్యయనం రుజువుగా నిలిచినప్పటికీ.. వారంలో ఎక్కువగా ఏ రోజు చోటుచేసుకుంటున్నాయో అనే విషయాన్ని కూడా గమనించాలి.. దీని వల్ల వైద్యులకు చాలా అవగాహన వస్తుంది. తద్వారా భవిష్యత్తులో ఎన్నో ప్రాణాలను కాపాడవచ్చు’ అని బ్రిటిష్‌ హర్ట్‌ ఫౌండేషన్‌ మెడికల్‌ డైరెక్టర్‌ డాక్టర్ నీలేష్‌ సమామి అన్నారు.

‘వారంలో మొదటి రోజు (సోమవారం)-స్టెమీ సంభావ్యతకు మధ్య బలమైన సంబంధాన్ని కనుగొన్నాం. ఇది గతంలోనే ప్రస్ఫుటమైనప్పటికీ దీనిపై ఆసక్తి కొనసాగుతూనే ఉంది’ అని అధ్యయనానికి నేతృత్వం వహించిన బీహెచ్‌ఎస్‌సీ ట్రస్ట్‌‌కు చెందిన జాక్‌ లాఫన్‌ చెప్పారు. దీనికి అనేక కారణాలు ఉన్నప్పటికీ కార్కాడియం రిథమ్‌ కూడా ఒకటిగా భావించడం సహేతుకం అన్నారు.

అయితే,‘బ్లూ మండే’గా పిలిచే ఈ పరిస్థితులు సోమవారమే ఎందుకు ఎక్కువ సంభవిస్తాయనేది మాత్రం శాస్త్రవేత్తలు ఇప్పటివరకు స్పష్టంగా వివరించలేకపోయారు. కానీ, గుండెపోటు కేసులు సోమవారం నాడే ఎక్కువగా సంభవించడానికి కార్కాడియం రిథమ్‌ (శరీరం నిద్రపోవడం లేదా లేచే చక్రం)తో సంబంధం ఉందని గతంలో అధ్యయనాలు వెల్లడించాయి.

ఇదిలా ఉండగా ఈ స్టెమీ కారణంగా బ్రిటన్‌లో ఏటా 30వేల మంది ఆస్పత్రుల్లో చేరుతున్నట్టు గణాంకాలు వెల్లడిస్తున్నాయి. పూడుకుపోయిన గుండె నాళాలను తిరిగి తెరవడానికి అత్యవసర యాంజియోప్లాస్టీ చేయాల్సి ఉంటుంది. సాధ్యమైనంత త్వరగా లక్షణాలను గుర్తించి ఆ పూడికను కరిగించే చికిత్సను అందించగలిగితే వ్యక్తి ప్రాణాలను కాపాడొచ్చు.