తెలుగు రాష్ట్రాలకు వర్ష సూచన... రాబోవు మూడు రోజులు వర్షాలు
Andhra Pradesh Telugu | Suryaa Desk | Published : Wed, Jun 07, 2023, 09:23 PM
జూన్ మాసం వచ్చినా తెలుగు రాష్ట్రాలు ఇంకా మండిపోతున్నాయి. ఈ క్రమంలో ఊరాటనిచ్చేలా తెలుగు రాష్ట్రాల్లో రాబోయే మూడు రోజులు వర్షాలు కురిసే అవకాశం ఉంది. రాబోయే 3 రోజులు ఆంధ్రప్రదేశ్లో తేలికపాటి నుంచి ఓ మోస్తరు వర్షాలు కురిసే అవకాశం ఉందని అమరావతి వాతావరణ కేంద్రం బుధవారం ప్రకటించింది. మరికొన్ని చోట్ల ఉరుములతో కూడిన వర్షాలు పడే సూచనలున్నాయని పేర్కొంది. అలాగే, వడగాడ్పులకు సంబంధించి రాష్ట్ర ప్రజలను అలర్ట్ చేసింది. ఉత్తర కోస్తాంధ్ర, యానాం, దక్షిణ కోస్తా, రాయలసీమ ప్రాంతాల్లో అక్కడక్కడ వడగాడ్పులు వీస్తాయని తెలిపింది. గంటకు 30 కిలో మీటర్ల నుంచి 40 కిలో మీటర్ల వేగంతో వేడి గాలులు వీచే అవకాశం ఉందని అమరావతి వాతావరణ కేంద్రం హెచ్చరించింది. కాబట్టి, ప్రజలు అప్రమత్తంగా ఉండాలని సూచించింది.
మరోవైపు తెలంగాణ రాష్ట్రంలో రాబోయే 3 రోజులు ఉరుములు, మెరుపులతో కూడిన తేలికపాటి నుంచి ఓ మోస్తరు వర్షాలు కురిసే అవకాశం ఉందని హైదరాబాద్ వాతావరణ కేంద్రం వెల్లడించింది. మంగళవారం దక్షిణ ఛత్తీస్గఢ్ పరిసర ప్రాంతాల్లో ఉన్న ఆవర్తనం బుధవారం బలహీనపడిందని పేర్కొంది. దీంతో రాబోయే 3 రోజుల పాటు రాష్ట్రంలో అక్కడక్కడ వడగాడ్పులు వీచే అవకాశం ఉందని తెలిపింది. బుధవారం ఖమ్మం నల్లగొండ, సూర్యాపేట, కొత్తగూడెం జిల్లాల్లో.. గురువారం, శుక్రవారం అదిలాబాద్, కొమురం భీం, మంచిర్యాల జిల్లాల్లో వడగాలులు వీచే అవకాశం ఉందని వాతావరణ శాఖ తెలిపింది.
|
|