తన భార్యను కామెంట్ చేశారని,,,ఇరు వర్గాల మధ్య గొడవ, యువకుడు మృతి

తిరుపతిలో ధారుణం చోటు చేసుకొంది.  తిరుపతి నగరంలోని అన్నమయ్య సర్కిల్‌లో బుధవారం సాయంత్రం గొడవ జరిగింది. అదికాస్త ముదిరి దాడులు చేసుకునే వరకు వెళ్లింది. ఈ గొడవలో ఆటో డ్రైవర్ మణి మృతిచెందాడు. తోపులాటలో తలకు తీవ్రగాయం కావడంతో.. ఘటనా స్థలంలోనే మణి మృతిచెందాడని స్థానికులు చెబుతున్నారు. కానీ.. మృతుడి స్నేహితుల వెర్షన్ మాత్రం వేరేలా ఉంది. తమపై కర్రతో దాడి చేశారని ఆటోడ్రైవర్ మణి ఫ్రెండ్స్ చెబుతున్నారు.

స్థానికంగా హోటల్ నిర్వహించే కుమార్ తన భార్యతో కలిసి బైక్‌పై వెళ్తున్నాడు. ఈ సమయంలో.. మణి స్నేహితుడు కూడా వారి వెనకాల బైక్‌పై వస్తున్నాడు. అతన్ని చూసి మణి, అతని ఫ్రెండ్స్ బైక్‌పై వచ్చే వారి స్నేహితుడి మీదకు కామెడీగా ఏదో విసరబోయారు. అది కుమార్ భార్యపై పడింది. అక్కడ గొడవ మొదలైంది. కుమార్ దీనిపై సీరియస్ అయ్యాడు. ఎందుకిలా చేస్తున్నారని నిలదీశాడు. అప్పుడు వివాదం ముదిరింది.

గొడవ జరుగుతుండగానే అక్కడి నుంచి వెళ్లిన కుమార్.. కాసేపటికి కర్ర చేతిలో పట్టుకొని మళ్లీ రోడ్డుపైకి వచ్చాడు. మణిని, అతని స్నేహితులను కొట్టాడు. ఈ క్రమంలో తోపులాట జరిగింది. స్థానికంగా ఉండేవారు ఆపారు. కానీ.. అప్పటికే మణి మృతిచెందాడు. అతని స్నేహితుడికి బలమైన గాయం కావడంతో.. రుయా ఆసుపత్రికి తరలించారు. అయితే.. మణి, అతని ఫ్రెండ్స్ మద్యం మత్తులో ఉండి అసభ్యంగా ప్రవర్తించారని.. అక్కడున్న మహిళలు చెబుతున్నారు.

ఈ ఘటన గురించి తెలియగానే.. పోలీసులు అక్కడికి వచ్చారు. మణి మృతదేహాన్ని ఆటోలో తరలించారు. మళ్లీ ఎలాంటి గొడవలు జరగకుండా చర్యలు చేపట్టారు. అయితే.. మణి స్నేహితుల వెర్షన్ వేరేలా ఉంది. కుమార్ తమ ఆటో అద్దాలను ధ్వంసం చేశాడని.. చిన్న గొడవను పెద్దది చేసి తమపై దాడి చేశారని చెబుతున్నారు. తమకు న్యాయం చేయకపోతే.. ఇక్కడే ఉరేసుకొని చనిపోతామని అంటున్నారు. దీనిపై వివరాలు సేకరించిన పోలీసులు.. దర్యాప్తు ప్రారంభించారు.