అసలు నారా లోకేష్ ఎవరు... పేర్ని నాని

పాదయాత్ర చేస్తున్న లోకేష్.. ఏమైనా ప్రజా ప్రతినిధా అని మాజీ మంత్రి పేర్ని నాని ప్రశ్నించారు. చంద్రబాబు కుమారుడికి భద్రత కరువైందని గవర్నర్‌కు ఫిర్యాదు చేశారన్న పేర్ని నాని.. లోకేష్ నోటికొచ్చినట్టు మాట్లాడుతున్నారని ఫైర్ అయ్యారు. మాజీ ముఖ్యమంత్రి కుమారుడికి ఇవ్వాల్సినంత దానికంటే.. ఎక్కువగానే భద్రతను ప్రభుత్వం ఇచ్చిందని పేర్నినాని వ్యాఖ్యానించారు.

'లోకేష్ ఏ పార్టీకి అధ్యక్షుడు కాదు. ఎమ్మెల్యే, ఎమ్మెల్సీ కాదు. కనీసం సర్పంచిగా కూడా గెలవనటువంటి ఆయనకు.. భద్రత కరువైందని టీడీపీ నేతలు చెప్పడంలో అర్థమేమైనా ఉందా? పవన్‌ కళ్యాణ్, కేఏ పాల్‌ లాగా ఏదొక చిన్నపార్టీకి అధ్యక్షుడు కూడా కాదు కదా. ఆయనకు ఉన్న అర్హతల్లా చంద్రబాబు కొడుకే కదా? యాత్ర పేరుతో నలుగుర్ని పోగేసుకొచ్చి.. పదిమంది నినాదాలు చేయగానే పోలీసుల్ని పచ్చి బూతులు తిడుతున్నారు' అని పేర్ని నాని ఆగ్రహం వ్యక్తం చేశారు.

'ఏరా.. ఒరేయ్‌ అని అందరూ చూస్తుండగానే తిడుతున్నారు. ఇలాంటి వ్యక్తికి భద్రత కరువైందని ఆ పార్టీ నాయకులు గవర్నర్‌ను కలవడం విచిత్రంగా ఉంది. గవర్నర్‌కు తెలుగు రాదు కాబట్టి సరిపోయింది. లేకుంటే.. వీళ్ల మాటలు వింటే.. వీళ్లనే చీవాట్లు పెట్టి పంపేవారు. ఖాకీ యూనిఫాం ధరించిన పోలీసులు చాలా మంచోళ్లు కాబట్టి.. లోకేష్, అచ్చెన్నాయుడు ఎన్ని బూతులు తిడుతున్నా.. ఎన్ని అవమానాలు చేస్తున్నా.. వారినేమీ అనకుండా బందోబస్తు చేస్తున్నారు' అని పేర్ని నాని వ్యాఖ్యానించారు.

'ఒక మాజీ ముఖ్యమంత్రి కొడుకైన లోకేష్‌కు.. ప్రభుత్వం తన పరిధికి మించి పోలీసు భద్రత కల్పిస్తూనే ఉంది. అవసరం అనుకుంటే ఆయన పాదయాత్రలో ఎంత మంది పోలీసులు బందోబస్తు చేస్తున్నారో తెలుసుకోవచ్చు. భారతదేశంలో ఏ రాజకీయ నాయకుడికీ రానటువంటి కష్టాలు.. చంద్రబాబు కొడుకు లోకేష్‌కు వచ్చాయి. వాళ్ల పార్టీ కార్యకర్తలే సెల్ఫీ దిగలేదని లోకేష్‌ను కోడిగుడ్లతో కొట్టారంట. ఇదేం విడ్డూరం' అని పేర్ని నాని సెటైర్లు వేశారు.

'సెల్ఫీ ఫోటో ఇవ్వకపోతే రాళ్లు.. కోడిగుడ్లుతో నాయకుల్ని కొట్టే కార్యకర్తలు వాళ్ల పార్టీలో ఉన్నారా? మీ పార్టీ వాళ్లు మిమ్మల్ని కోడిగుడ్లు విసిరి దాడి చేస్తే.. మేం ప్రభుత్వం తరఫున భద్రత పెంచడమేంటి? మాకేం అవసరం? అలాంటప్పుడు ముందుగా టీడీపీ కార్యకర్తలకు క్రమశిక్షణ నేర్పుకోవాలి కదా? కార్యకర్తలకు క్రమశిక్షణ ఇచ్చుకోలేని పార్టీ టీడీపీ అని అందరూ అనుకోవాలి కదా. మాకు సలహాలు ఇవ్వడానికి వర్ల రామయ్య ఎవరు.. ముందు ఆయన చంద్రబాబుకు సలహాలు ఇస్తే మంచిది' అని పేర్ని నాని వ్యాఖ్యానించారు.