ఉత్తర ఈశాన్య దిశగా కదులుతోన్న తుఫాను,,,గంటకు 180 కి.మీ. వేగంతో భీకర గాలులు
national | Suryaa Desk | Published : Sun, Jun 11, 2023, 10:28 PM
అరేబియా సముద్రంలో ఏర్పడిన ‘బిపోర్‌జాయ్’ తుఫాను తీవ్ర రూపం దాల్చింది. ఇది మరో 6 గంటల్లో భీకర తుఫానుగా మారినున్నట్టు భారత వాతావరణ విభాగం హెచ్చరించింది. ఉత్తర-ఈశాన్య దిశగా కదులుతున్న తుఫాను.. జూన్ 15న గుజరాత్, పాకిస్థాన్ మధ్య తీరం తాకే అవకాశం ఉందని అంచనా వేసింది. ప్రస్తుతం గంటకు 5 కిలోమీటర్ల వేగంతో కదులుతోన్న బిపోర్‌జాయ్. అది గుజరాత్‌లోని పోర్‌బందర్‌కు 530 కిలోమీటర్లు.. ముంబయికి 500 కిలోమీటర్లు.. కరాచీకి 830 కిలోమీటర్ల దూరంలో కేంద్రీకృతమై ఉంది.
తుఫాను కారణంగా రాబోయే నాలుగు రోజుల్లో వర్షాలు కురుస్తాయని... అరేబియా సముద్రంలో మత్స్యకారులు చేపల వేటకు వెళ్లొద్దని హెచ్చరికలు జారీ అయ్యాయి. తుపాను ప్రభావంతో కర్ణాటక, గోవా, మహారాష్ట్రల్లోని తీర ప్రాంతాల్లోనూ భారీ వర్షాలు కురుస్తున్నాయి. గంటకు 160 నుంచి 170 కిలోమీటర్ల వేగంతో బలమైన ఈదురు గాలులు వీస్తాయని ఐఎండీ హెచ్చరించింది. కాగా, భారీ అలల కారణంగా గుజరాత్‌లోని ప్రముఖ పర్యాటక ప్రదేశం తితాల్‌ బీచ్‌ను ఈ నెల 14 వరకూ మూసివేస్తున్నట్లు అధికారులు తెలిపారు.
తుఫాను హెచ్చరికల నేపథ్యంలో పోర్‌బందర్‌, గిర్‌, సోమనాథ్‌, వల్సాద్‌లకు జాతీయ విపత్తు దళ బృందాలను ముందస్తుగా పంపారు. కరాచీ పోర్ట్ ట్రస్ట్ సైతం భద్రతా నౌకలు, మౌలిక సౌకర్యాలకు సంబంధించి అత్యవసర మార్గదర్శకాలను జారీచేసింది. నౌకల రాకపోకలను రద్దుచేసింది. గాలుల వేగం 25 నాటికల్ మైళ్లు దాటితే నౌకల కార్యకలాపాలు రద్దవుతాయని, 35 నాటికల్ మైళ్ల వేగంతో వీస్తే కార్గో నౌకలను నిలిపివేస్తామని కరాచీ పోర్ట్ ట్రస్ట్ పేర్కొంది.
|
|