ఉప్పు నిప్పులా అశోక్ గెహ్లాట్, సచిన్ పైలట్,,రాజస్థాన్ కాంగ్రెస్ లో అలజడి

రాజస్థాన్‌లో కొత్త పార్టీ రాబోతుందంటూ గత కొన్ని రోజులుగా జరుగుతున్న ప్రచారంలో నిజం లేదని తేలిపోయింది. ముఖ్యమంత్రి అశోక్ గెహ్లాట్‌తో విభేదాల నేపథ్యంలో మాజీ డిప్యూటీ సీఎం సచిన్ పైలట్ కాంగ్రెస్ పార్టీని వీడి కొత్త పార్టీ పెడతారని ఇటీవల ఊహాగానాలు ఊపందుకున్నాయి. తన తండ్రి రాజేశ్ పైలట్ వర్ధంతి సందర్భంగా సొంతూరు దౌసాలో ఏర్పాటు చేసే కార్యక్రమంలో కొత్త పార్టీకి సంబంధించి పైలట్ ప్రకటన చేస్తారని పుకార్లు షికార్లు చేశాయి. ఈ నేపథ్యంలో ఆదివారం (ఈ నెల 11న) జరిగిన రాజేశ్ పైలట్ వర్ధంతి కార్యక్రమంలో సచిన్ పైలట్ ప్రసంగంపై దేశవ్యాప్తంగా ఆసక్తి నెలకొంది.

అయితే, ఈ కార్యక్రమంలో కొత్త పార్టీకి సంబంధించి పైలట్ ఎలాంటి ప్రకటన చేయలేదు. రాష్ట్రంతో పాటు దేశంలోనూ ప్రస్తుతం స్వచ్ఛమైన రాజకీయాల అవసరం ఉందని ఆయన వ్యాఖ్యానించారు. రాజస్థానీ యువతకు మరింత మెరుగైన భవిష్యత్ అందించాలన్నదే తన ఆకాంక్ష అని చెప్పారు. వారి భవిష్యత్తుతో ఆడుకోవాలని చూస్తే తాను సహించబోనని, ఈ విషయంలో ఎవరినైనా సరే ఎదుర్కోడానికి తాను సిద్ధమేనని తేల్చిచెప్పారు.

‘యువతకు మంచి భవిష్యత్తు కోసం నేను మాట్లాడాను. ఇక్కడి ప్రజలు ఎప్పుడూ నన్ను ఆదరిస్తున్నారు. నా గొంతు బలహీనంగా లేదు.. నేను వెనక్కి తగ్గను. దేశానికి స్వచ్ఛమైన రాజకీయాలు కావాలి. యువత భవిష్యత్తుతో ప్రజలు ఆడుకోవడం నాకు ఇష్టం లేదు.. నా విధానం స్పష్టంగా ఉంది... నాకు స్వచ్ఛమైన రాజకీయాలు కావాలి’ అని స్పష్టం చేశారు.

గత బీజేపీ పాలనలో చోటుచేసుకున్న అవినీతిపై విచారణ జరిపించాలని పైలట్ కొంతకాలంగా డిమాండ్ చేస్తున్నారు. దీనిపై సొంత ప్రభుత్వానికి వ్యతిరేకంగా దీక్షలు, ర్యాలీలు కూడా నిర్వహించారు. ఈ విషయంలో తాను వెనక్కి తగ్గనంటూ పైలట్ ఉద్ఘాటించారు. దీంతో గెహ్లాట్, పైలట్ మధ్య ఉన్న విభేదాలు తారాస్థాయికి చేరుకున్నాయి. కాంగ్రెస్ పార్టీ అధిష్టానం స్పందించి ఇరువురు నేతల మధ్య సయోధ్యకు ప్రయత్నించినా పెద్దగా ఫలితం లేకుండా పోయిందని పార్టీ వర్గాల సమాచారం. అయితే, వచ్చే అసెంబ్లీ ఎన్నికల్లో వ్యక్తిగత విభేదాలను పక్కన పెట్టి రాజస్థాన్‌లో మళ్లీ కాంగ్రెస్‌ను అధికారంలోకి తీసుకొచ్చేందుకు సమష్టిగా పనిచేయడానికి నేతలిద్దరూ అంగీకరించారని వెల్లడించాయి.