గత ప్రభుత్వం తప్పిదాల వల్లే నిధులు ఆగిపోయాయి: అంబటి రాంబాబు

పోలవరం ప్రాజెక్టు విషయంలో గత ప్రభుత్వం తప్పిదాల వల్ల కేంద్ర ప్రభుత్వం నుంచి రావాల్సిన నిధులు ఆగిపోయాయని రాష్ట్ర నీటి పారుదల శాఖ మంత్రి అంబటి రాంబాబు విమర్శించారు. మాజీ ముఖ్యమంత్రి నారా చంద్రబాబునాయుడు ప్రభుత్వ హయాంలో పోలవరం ప్రాజెక్టుకు తీవ్ర నష్టం చేకూరిందని ఆయన  విమర్శించారు. డయాఫ్రం వాల్ దెబ్బ తినడం వల్ల రూ. 2,200 కోట్ల మేర నష్టం వాటిల్లిందన్నారు.  2013- 14 రేట్లతో పోలవరం ప్రాజెక్టును పూర్తి చేస్తామని.. 2016లో చంద్రబాబు అంగీకరించి సంతకం చేశారని.. రూ. 1200 కోట్ల మేర నిధులు మినహా మొత్తం డబ్బులు తీసేసుకున్నారని ఆయన ఆరోపించారు.

అయితే, ముఖ్యమంత్రి వైఎస్ జగన్మోహన్ రెడ్డి కృషి వల్ల మొదటి దశ పోలవరం నిర్మాణానికి అవసరమైన నిధుల విడుదలకు కేంద్ర ప్రభుత్వం అంగీకరించిందని ఈ సందర్భంగా మంత్రి రాంబాబు చెప్పారు. ఇందులో భాగంగానే మొదటి విడతలో రూ. 12,911 కోట్లు ఇవ్వడానికి కేంద్ర ప్రభుత్వం అంగీకరించిందని చెప్పారు. 41.15 మీటర్ల ఎత్తులో నీటిని నిల్వ చేస్తే 20,946 పీడీఎఫ్‌లు ఉన్నాయన్నారు. లైడర్ సర్వే ప్రకారం అదనంగా 16,640 పీడీఎఫ్‌లు పెరిగాయని తెలిపారు. వీటి కోసం అదనంగా రూ. 5 వేల కోట్లు అవసరం అవుతాయని కేంద్రానికి పంపించామని మంత్రి పేర్కొన్నారు.

నిజాయితీగా పని చేస్తున్న రాష్ట్ర మంత్రులను చంద్రబాబు తీవ్రంగా దూషిస్తున్నారని మంత్రి అంబటి రాంబాబు ఆగ్రహం వ్యక్తం చేశారు. తమను ఒక మాట అంటే తిరిగి వంద మాటలు అంటామని హెచ్చరించారు. అయినా, చంద్రబాబు ఎమ్మెల్యేగా చేసిన కుప్పం, చంద్రగిరి నియోజకవర్గాలకు చంద్రబాబు ఏం అభివృద్ధి చేశారని ప్రశ్నించారు. కుప్పంను అభివృద్ధి చేయలేని చంద్రబాబుకు.. తమను విమర్శించే హక్కు ఉందా అని ప్రశ్నించారు. ఇదే సమయంలో పులివెందులను అన్ని విధాలుగా అభివృద్ధి చేసిన వైఎస్సార్‌ను చూసి నేర్చుకోవాలన్నారు.

ఇక, పవన్ కళ్యాణ్ ఆరోపణలు చేస్తే బీజేపీ చేసినట్లే అని మంత్రి అంబటి రాంబాబు వ్యాఖ్యానించారు. ప్రస్తుతం బీజేపీ- జనసేన పొత్తులో ఉన్నాయి కాబట్టి.. జనసేన ఆరోపణలు చేసినా బీజేపీ చేసినట్లే అని అన్నారు. అదే సమయంలో బీజేపీ సైతం తమపై బురదజల్లుతోందని విమర్శించారు. తమ ప్రభుత్వంపై బీజేపీ దగ్గర ఆధారాలు ఉంటే నిరూపించాలని సవాల్ విసిరారు. బీజేపీ రాష్ట్ర అధ్యక్షుడు సోము వీర్రాజు రోజూ చేస్తున్న ఆరోపణలనే ఢిల్లీ నుంచి వచ్చిన అగ్ర నాయకులు సైతం చేస్తున్నారని అంబటి రాంబాబు అన్నారు.

అలాగే, తన మీద పోటీకి తెలుగు దేశం పార్టీ వస్తాదులను తెస్తోందని అంబటి రాంబాబు అన్నారు. తనను ఓడించాలని చంద్రబాబు, జనసేన పార్టీ అధినేత పవన్ కళ్యాణ్ ప్రయత్నాలు చేస్తున్నారని ఆరోపించారు. అన్ని పార్టీలు మారిన వ్యక్తిని తనపై పోటీకి నిలబెడుతున్నారని కన్నా లక్ష్మీనారాయణపై సెటైర్లు వేశారు. తాను పార్టీలు మారి టిక్కెట్లు తెచ్చుకోనని.. ముఖ్యమంత్రి వైఎస్ జగన్మోహన్ రెడ్డిపై విశ్వాసంతో తాను సత్తెనపల్లి టిక్కెట్ తెచ్చుకుంటానని మంత్రి అంబటి రాంబాబు స్పష్టం చేశారు.