పెందుర్తిలో ఐదేళ్ల బాలుడి డెత్ మిస్టరీ

విశాఖ జిల్లా పెందుర్తి సమీపంలోని ఎస్‌ఆర్‌పురంలో కలకలంరేపిన 5 ఏళ్ల బాలుడు మృతి కేసులో కీలక మలుపు తిరిగింది. ఈ నెల 8న జరిగిన బాలుడు చనిపోయినట్లు తేల్చగా.. ముందు పాము కాటుకు గురై ప్రాణాలు కోల్పోయి ఉంటాడని కుటుంబసభ్యులు భావించారు. కానీ బాలుడు ఇంటికి సమీపంలో ఉన్న రిసార్టులో ఉన్న స్విమ్మింగ్ పూల్‌లో పడి చనిపోయినట్లు గుర్తించారు.

ఈ నెల 8న సాయంత్రం ఎస్‌ఆర్‌పురం‌కు చెందిన పల్లా తేజ కనిపించకుండాపోయాడు. వెంటనే కుటుంబ సభ్యులు పెందుర్తి పోలీసులకు సమాచారం ఇచ్చారు. కుటుంబ సభ్యులు స్థానికుల సాయంతో ఆ రోజు రాత్రి వరకు వెతికినా ఫలితం లేకుండా పోయింది. ఈ నెల 9న తేదీన తెల్లవారుజామున బాలుడి ఇంటి ఎదురుగా ఉన్న లారీ యార్డు దగ్గ చెట్టు కింద తేజ మృతదేహాన్ని స్థానికులు గుర్తించారు. అతడి ఎడమ చేతిపై గాట్లు, నోటి నుంచి నురగ వచ్చిన ఆనవాళ్లు కనిపించాయి. బాలుడు పాముకాటుతో చనిపోయి ఉంటాడని కుటుంబసభ్యులు అనుకున్నారు.

ఆ తర్వాత బాలుడి తల్లి కొడుకు మృతిపై అనుమానాలు వ్యక్తం చేశారు. దీంతో పోలీసులు అనుమానాస్పద మృతిగా కేసు నమోదు చేసి దర్యాప్తు చేశారు. ఘటన జరిగిన ఐదురోజుల తర్వాత సోమవారం తేజ ఇంటికి సమీపంలోని లెండీవనం రిసార్టులో వాచ్‌మెన్.. గ్రామానికి చెందిన ఒమ్మి సోంబాబుకు ఫోన్‌ చేసి రిసార్టులో ఎవరూ లేని సమయంలో తేజ ఆడుకోవడానికి వచ్చి స్విమ్మింగ్ పూల్‌లో పడి చనిపోయినట్లు చెప్పాడు. తాను భయపడి ఈ విషయం ఎవరికీ చెప్పలేదని.. బాలుడి మృతదేహాన్ని చెట్టుకిందకు చేర్చినట్లు వివరించాడు.

ఆ భయంతో వాచ్‌మెన్ రెండు రోజుల క్రితం గ్రామం వదిలి వెళ్లిపోయాడు. అసలు విషయం తెలుసుకున్న బాలుడి కుటుంబ సభ్యులు, స్థానికులు సోమవారం సాయంత్రం లెండీవనం రిసార్టు దగ్గర ధర్నా చేశారు. ఆతర్వాత పెందుర్తి పోలీస్‌ స్టేషన్‌ ఎదుట ధర్నాకు దిగారు. బాలుడు ప్రమాదవశాత్తు స్విమ్మింగ్ పూల్‌లో పడిపోయాడా.. ఎవరైనా కావాలనే ముంచి హత్య చేశారా అన్నది తేల్చాలని వారు డిమాండ్ చేస్తున్నారు. వీరంతా బీఆర్టీఎస్‌ రోడ్డుపై బైఠాయించి ధర్నాకు దిగారు. బాధితుల ఆందోళనతో పలుమార్లు వాహనాల రాకపోకలు స్తంభించాయి. పోలీసులు రంగంలోకి దిగి సర్థిచెప్పడంతో గొడవ సద్దుమణిగింది.

బాలుడు ఆడుకుంటూ స్విమ్మింగ్ పూల్‌లో పడిపోయినట్లు సీసీ కెమెరా ఫుటేజ్ ఉందని పోలీసులు అంటున్నారు. వాచ్‌మెన్ వచ్చి పోలీసులను ఆశ్రయించి జరిగిన విషయాలు చెప్పినట్లు పోలీసులు వివరించారు. తేజ మృతి కేసులో విచారణ కొనసాగుతోందని.. బాలుడు అదృశ్యమైన రోజునే పోలీసులు తక్షణమే స్పందించి బాధితులతో కలిసి గాలించిన విషయాన్ని గుర్తు చేస్తున్నారు.