సీమ నేలకు నమస్కరించి భావోద్వేగానికి గురైన లోకేష్

తెలుగుదేశం పార్టీ జాతీయ ప్రధాన కార్యదర్శి చేపట్టిన యువగళం పాదయాత్ర రాయలసీమలో పూర్తయ్యింది. లోకేష్‌కు రాయలసీమ టీడీపీ ముఖ్య నేతలు వీడ్కోలు పలికారు. రాయలసీమ నేలకు నమస్కరించిన నారా లోకేష్.. భావోద్వేగానికి గురయ్యారు. సీమలో తన పాదయాత్రకు ప్రజలు బ్రహ్మరథం పట్టారని లోకేష్ వ్యాఖ్యానించారు. తనకు సహకరించిన నాయకులు, కార్యకర్తలకు Nara Lokesh కృతజ్ఞతలు చెప్పారు.

'రాష్ట్రంలో ఈ నాలుగేళ్ల పాలనలో బాధితులుగా మారిన ప్రజలకు భరోసా కల్పించడమే లక్ష్యంగా.. నేను చేపట్టిన యువగళం పాదయాత్ర తొలి మజిలీని మీ అందరి ఆశీస్సులతో విజయవంతంగా పూర్తి చేయగలిగాను. 124 రోజుల పాటు నిర్వహించిన సుదీర్ఘ పాదయాత్రలో.. నాతోపాటు యువగళం బృందాలను కంటికి రెక్కలా కాపాడుకుంటూ.. రాయలసీమ ప్రజలు మాపై చూపిన ఆదరాభిమానాలను జీవితంలో మరువలేను' అని నారా లోకేష్ వ్యాఖ్యానించారు.

'అడుగడుగునా సీమ ప్రజల కష్టాలను నేరుగా చూశాక తీవ్ర మనోవేదనకు గురయ్యాను. రాయలసీమ బిడ్డగా ఈ ప్రాంతంలో నెలకొన్న సాగు, తాగు నీరు, నిరుద్యోగం, వలసల నివారణకు శాశ్వత పరిష్కారం చూపాలని నిర్ణయించుకున్నాను. అధికారంలోకి వచ్చిన వెంటనే మిషన్ రాయలసీమ ద్వారా మీ కన్నీళ్లు తుడిచి.. రుణం తీర్చుకుంటా. యువగళం సాక్షిగా ఈ మాట ఇస్తున్నాను. ఎంతటి గడ్డు పరిస్థితుల్లోనైనా ప్రత్యర్థులకు ఎదురొడ్డి నిలబడే పోరాట స్ఫూర్తిని మీ నుంచి పొందిన నేను.. లక్ష్యాన్ని చేరుకునేవరకు విశ్రమించబోను' అని లోకేష్ స్పష్టం చేశారు.

రాయలసీమ నుంచి లోకేష్ ఉమ్మడి నెల్లూరు జిల్లాలోకి ప్రవేశించారు. లోకేష్‌కు నెల్లూరు తెలుగుదేశం నేతలు ఘన స్వాగతం పలికారు. బీద రవిచంద్ర యాదవ్, సోమిరెడ్డి చంద్రమోహన్ రెడ్డి, ఆనం రామనారాయణ రెడ్డి, మేకపాటి చంద్రశేఖర్ రెడ్డి, బోల్లినేని వెంకటరామారావు, కంభం విజయరామిరెడ్డి, కురుగోండ్ల రామకృష్ణ, కోమ్మి లక్ష్మయ్య నాయుడు, ఆనం వెంకట రమణ రెడ్డి, తాళ్లపాక రమేష్ రెడ్డి, కాకర్ల సురేష్, కోటంరెడ్డి గిరిధర్ రెడ్డి, పనబాక కృష్ణయ్య, కోటంరెడ్డి శ్రీనివాసుల రెడ్డి, మాలేపాటి సుబ్బనాయుడు, తాళ్లపాక అనురాధ, ఆనం రంగమయూర్ రెడ్డి, లోకేష్‌కి స్వాగతం పలికారు.