సిక్కు గురుద్వారా చట్టంలో సవరణలు,,,అందరికీ ఉచితంగా గుర్బానీ వినే అవకాశం

అమృత్‌సర్‌ స్వర్ణ దేవాలయంలో పఠించే గుర్బానీ ప్రసార హక్కులు ఇక నుంచి ఉచితంగా అందరికీ అందుబాటులో తెచ్చేందుకు వీలుగా సిక్కు గురుద్వారా చట్టం-1925కు సవరణ చేసే ప్రతిపాదనకు పంజాబ్‌ క్యాబినెట్ ఆమోదం తెలిపింది. ఈ ప్రతిపాదిత బిల్లును అసెంబ్లీలో ప్రవేశపెడతామని సీఎం భగవంత్‌ మాన్‌ ప్రకటించారు. దీంతో పంజాబ్‌లో రాజకీయంగా దుమారం రేగుతోంది. తాజాగా, గుర్బానీని ప్రసారం హక్కులపై గుత్తాధిపత్యం చెలాయిస్తోన్న ప్రయివేట్ ఛానల్ పీటీసీ ఘాటుగా స్పందించింది. గుర్బానీ వినడానికి ఏ కస్టమర్ అయినా తమకు డబ్బులు చెల్లించినట్టు ఒక్క ఆధారమైన తీసుకురావాలని పంజాబ్ క్యాబినెట్‌కు సవాల్ విసిరింది.

దేశవ్యాప్తంగా ఛానెల్‌ను సబ్‌స్క్రయిబ్ చేయడానికి ఎవరైనా డబ్బు చెల్లించినట్టు రసీదును చూపిస్తే రూ. కోటి బహుమతిగా ఇస్తామని ప్రకటించింది. ‘ఇప్పటికే గుర్బానీ ఉచితం.. అన్ని పీటీసీ నెట్‌వర్క్ ఛానెల్‌లను భారత ప్రభుత్వం ఉచితంగా ప్రసారం చేసే ఛానెల్‌లుగా గుర్తించింది.. ఏ కేబుల్ ఆపరేటర్, డీటీహెచ్ ఆపరేటర్ ఎలాంటి డబ్బు వసూలు చేయరు. ఇది యూట్యూబ్, ఫేస్‌బుక్‌లో కూడా ఉచితంగా లభిస్తుంది. కాబట్టి గుర్బానీని ఎలా ఉచితం ప్రసారం చేస్తారని చెబుతున్నారు’ అని పీటీసీ నెట్‌వర్క్ మేనేజింగ్ డైరెక్టర్ రబీంద్ర నారాయణ్ అన్నారు.

ఇక, గుర్బానీ అనేది ఒక పవిత్ర శ్లోకం. స్వర్ణదేవాలయంలో పఠించే ఈ శ్లోకాన్ని.. ప్రపంచవ్యాప్తంగా సిక్కులు భక్తిశ్రద్ధలతో ఆలకిస్తారు. అయితే దీని ప్రసార హక్కులు పీటీసీ ఛానల్ వద్ద ఉన్నాయి. దీనిని ఒక ఛానల్‌కే పరిమితం చేయకుండా.. అందరికీ అందుబాటులో ఉండేలా ఉచితంగా ప్రసారం చేస్తామని పంజాబ్ ముఖ్యమంత్రి భగవంత్ మాన్ వెల్లడించారు.

గుర్బానీ ప్రసార హక్కుల్ని పీటీసీ నెట్‌వర్క్‌కు 2007లో శిరోమణి గురుద్వారా ప్రబంధక్‌ కమిటీ కట్టబెట్టింది. ఇందు కోసం ఏడాదికి రూ.2 కోట్లను పీటీసీ చెల్లిస్తోంది. ఈ నెట్‌వర్క్‌ రాజకీయంగా శక్తిమంతమైన బాదల్‌ కుటుంబానికి చెందినది. ఈ నేపథ్యంలో సీఎం తీసుకున్న నిర్ణయం.. ఆ నెట్‌వర్క్‌ గుత్తాధిపత్యానికి గండికొట్టే ఉద్దేశంగా కనిపిస్తోంది. దాంతో ఎస్‌జీపీసీ, బాదల్‌ కుటుంబం, అకాలీదళ్‌ ఈ ప్రకటనపై మండిపడుతున్నాయి. ఇది రాజ్యాంగ విరుద్ధమైందని, మతపరమైన కార్యకలాపాల్లో ప్రత్యక్ష జోక్యమని విమర్శలు గుప్పిస్తున్నాయి. సిక్కు గురుద్వారా చట్టాన్ని పార్లమెంట్‌ చేసిందని, దానిలో రాష్ట్ర ప్రభుత్వం జోక్యం చేసుకోలేదని బీజేపీ, కాంగ్రెస్‌ ఆగ్రహం వ్యక్తం చేస్తున్నాయి. పీటీసీ నెట్‌వర్క్‌కు గుర్బానీ ప్రసార హక్కుల కాంట్రాక్ట్ వచ్చె నెలలో ముగియనుండటం గమనార్హం.