ముగ్గురు కుమారులను కాల్చి చంపిన తండ్రి,,,అడ్డుకునేందుకు వెళ్లిన భార్యపైనా కాల్పులు

అభం శుభం తెలియని ముగ్గురు కుమారులను ఓ దుర్మార్గుడు కాల్చి చంపాడు ఓ దుర్మార్గుడు. అడ్డుకోబోయిన భార్యపై కూడా కాల్పులు జరిపాడు. ఏం జరుగుతుందో.. ఎందుకు చనిపోతున్నామో కూడా తెలియకుండానే ఆ చిన్నారులు ప్రాణాలు వదిలారు. అందులో ఓ చిన్నారి తప్పించుకునేందుకు యత్నించినా.. ఆ నరరూప రాక్షసుడు వదిలిపెట్టలేదు. ముగ్గుర్నీ కాల్చి చంపాడు. ఈ ఘటనతో తీవ్ర భయాందోళనకు గురైన వారి కుమార్తె.. వీధిలోకి వచ్చి పొరుగు వారికి చెప్పడంతో వారు పోలీసులకు సమాచారం ఇచ్చారు. దీంతో రంగంలోకి దిగిన పోలీసులు నిందితుడ్ని అరెస్ట్ చేశారు. అమెరికాలో ఈ దుర్గటన  చోటు చేసుకొంది.

అమెరికాలోని ఓహియో రాష్ట్రంలో ఈ భయంకరమైన సంఘటన చోటు చేసుకుంది. 32 ఏళ్ల చాడ్ డోర్‌మాన్ అనే వ్యక్తి.. తన ముగ్గురు కుమారులను తుపాకీతో కాల్చి చంపాడు. వారి వయసు 3, 4, 7 సంవత్సరాలు మాత్రమే. ముగ్గుర్నీ ఒక చోట నిలబెట్టి తుపాకీతో షూట్ చేశాడు. అందులో ఒక చిన్నారి తప్పించుకునేందుకు.. ఇంటి పక్కనే ఉన్న పొలాల్లోకి పరిగెత్తాడు. వెంటనే వెళ్లిన డోర్‌మాన్.. అతడిని వెనక్కి తీసుకువచ్చాడు. తర్వాత అతి కిరాతకంగా కాల్చి చంపాడు. అంతకుముందే తన భార్యపైనా డోర్‌మాన్ కాల్పులు జరిపాడు. పిల్లల్ని చంపేందుకు యత్నించిన డోర్‌మాన్‌ను అడ్డుకున్న ఆమె.. అతనితో గొడవ పడింది. తుపాకీని లాక్కునేందుకు తీవ్రంగా ప్రయత్నించింది. దీంతో ఆమెపైన కూడా డోర్‌మాన్ కాల్పులు జరిపాడు. దీంతో ఆమె రక్తపు మడుగులో కుప్పకూలింది.

ఈ ఘటనతో వారి కుమార్తె తీవ్ర భయాందోళనకు గురైంది. వెంటనే ఇంట్లో నుంచి వీధిలోకి పరిగెత్తిన ఆమె గట్టిగా అరవడం ప్రారంభించింది. తన తండ్రి అందరినీ చంపేస్తున్నాడు.. ఎవరైనా కాపాడండి అంటూ అరిచింది. దీంతో అక్కడ ఉన్న ఓ మహిళ అత్యవసర నంబరు 911 కి ఫోన్ చేసింది. మరో క్యాబ్ డ్రైవర్ కూడా ఎమర్జెన్సీ నంబర్‌కు ఫోన్ చేసి సమాచారం అందించాడు.

చిన్నారుల హత్యలకు సంబంధించి సమాచారం అందుకున్న పోలీసులు హుటాహుటిన సంఘటనా స్థలానికి చేరుకున్నారు. వైద్యులను రప్పించి.. చిన్నారుల పరిస్థితి చెక్ చేయగా.. వారిలో కదలికలు ఏవీ గుర్తించలేదు. దీంతో ముగ్గురు చిన్నారులు కూడా చనిపోయినట్లు ధ్రువీకరించారు. ఇంటి బయట ఆ చిన్నారుల తల్లి రక్తపు మడుగులో పడి ఉంది. అయితే ఆమె ప్రాణాలతో ఉండటంతో హుటాహుటిన సిన్సినాటిలోని యూనివర్సిటీ ఆస్పత్రికి తరలించి చికిత్స అందిస్తున్నారు. అయితే వీధుల్లోకి వచ్చి గట్టిగా అరిచిన చిన్నారి వయసు గానీ ఆమెకు ఏవైనా గాయాలు అయ్యాయా అనేది మాత్రం ఇంకా తెలియరాలేదు.

ఇంత పెద్ద దారుణం చేసిన డోర్‌మాన్ మాత్రం ఇంటి ముందు కూర్చొని ఉన్నట్లు పోలీసులు తెలిపారు. ముగ్గురు కుమారులను కూడా తానే చంపినట్లు పోలీసులు, మీడియా ముందు అంగీకరించాడు. ఈ ముగ్గురు పిల్లలను హత్య చేసేందుకు గత కొన్ని నెలలుగా ప్రణాళిక రచించినట్లు పేర్కొన్నాడు. అయితే ఎందుకు వారిని చంపాడు అన్న దానిపై కారణాలు మాత్రం ఇంకా తెలియరాలేదు.