17 ఏళ్లకే వ్యాపారం ప్రారంభించి,,,19 ఏళ్లకు కోటీశ్వరుడు,,, 22 ఏళ్లకు రిటైర్మెంట్

చిన్న వయసులోనే డిగ్రీలు, పీజీలు పూర్తి చేసిన వాళ్లను మనం చూసి ఉంటాం. చిన్న వయసులోనే భారీ ప్యాకేజీతో ఏ మల్టీ నేషనల్ కంపెనీలోనో ఉద్యోగం తెచ్చుకున్న వారిని చూసి ఉంటాం. కానీ ఈ కుర్రాడు మాత్రం 17 ఏళ్లకే వ్యాపారాన్ని ప్రారంభించాడు. దాని కోసం స్కూలు చదువును కూడా పక్కన పెట్టేశాడు. చదువులు తన వల్ల కాదని ఎంటర్ ప్రెన్యూర్‌గా మారాడు. కోట్లలో సంపాదిస్తూ 19 ఏళ్లకే బాగా సెటిల్ అయ్యాడు. ఇక 22 ఏళ్లు వచ్చేసరికి తనకు కావాల్సిన డబ్బును సంపాదించి పెట్టుకున్నాడు. దీంతో ఇక 22 ఏళ్ల వయసులోనే రిటైర్మెంట్ ప్రకటించాడు.

అమెరికాకు చెందిన హెడెన్ బౌల్స్.. తన జీవితంలో జరిగిన సంఘటనలను టిక్ టాక్, యూట్యూబ్, ఇన్‌స్టాగ్రామ్ అకౌంట్లలో షేర్ చేస్తూ ఉంటాడు. తాను ఏ వయసులో బిజినెస్ ప్రారంభించిందీ.. దాని నుంచి ఎలా ఆదాయం సంపాదించినదనే వివరాలు తన ఫాలోవర్లకు చెబుతూ ఉంటాడు. హెడెన్‌ బౌల్స్‌ను ఇన్‌స్టాగ్రామ్‌‌లో 14 వేల మందికి పైగా ఫాలో అవుతున్నారు. ఇక యూట్యూబ్‌ విషయానికొస్తే 3 లక్షలకు మించి.. సబ్‌స్క్రైబర్లు ఉన్నారు. తాను చిన్నతనంలో ఉన్నపుడు తన జీవితంలో ఎదురైన ఒక సంఘటన తనను ఈ స్థాయిలో ఉండేలా చేసిందని హెడెన్ బౌల్స్ చెబుతాడు. ఆ అనుభవం కారణంగానే స్కూలు చదువు మానేసి.. సంపాదనపై దృష్టి సారించినట్లు వెల్లడించాడు.

హెడెన్‌ తన చిన్న నాటి అనుభవాలను ఒకసారి గుర్తు చేసుకున్నాడు. తనకు 10, 11 ఏళ్ల వయసు ఉన్నప్పుడు ఇష్టమైంది ఏదైనా కొనుగోలు చేసుకునేందుకు డబ్బు ఉండేది కాదని.. తల్లిదండ్రులను అడిగినా వాటిని కొనిచ్చే స్తోమత లేదని చెప్పాడు. దీంతో అప్పుడే తనకు సొంత సంపాదన అవసరమని అనిపించిందని పేర్కొన్నాడు. అప్పుడు ఎవరినీ డబ్బులు అడగాల్సిన అవసరం లేకుండానే ఇష్టం ఉన్న వస్తువులు కొనుక్కోవచ్చని నిర్ణయించుకున్నట్లు తెలిపాడు. దీని కోసం 17 ఏళ్ల వయసులోనే స్కూలు చదువు మానేసి.. వ్యాపారంలోకి దిగినట్లు చెప్పాడు.

17 ఏళ్ల వయసు రాగానే హెడెన్‌ బౌల్స్.. ‘ఈ కామ్‌ సీజన్‌’ అనే సంస్థను స్థాపించాడు. ఈ "ఈ కామ్ సీజన్‌"లో ఆన్‌లైన్‌ కోర్సులను అందిస్తూ ఉంటాడు. ఇందులో ఫీజును 575 డాలర్లుగా నిర్ణయించాడు. ఈ కామ్ సీజన్‌లో భారీగా లాభాలు రావడంతో 18 ఏళ్ల వయసులోనే సొంతంగా అత్యంత విలువైన లంబోర్గినీ కారును కొనుగోలు చేశాడు. 19 ఏళ్ల వయసులోనే కోట్లకు పడగలెత్తాడు. 2022 నాటికి హెడెన్ బౌల్స్ ఆదాయం 15 మిలియన్‌ డాలర్లు అంటే దాదాపు మన కరెన్సీలో రూ. 123 కోట్లు. ఈ 15 మిలియన్ డాలర్లలో 3 మిలియన్‌ డాలర్లు అంటే రూ.25 కోట్లు లాభం ఉన్నట్లు తెలిపాడు. ఈ కామ్ సీజన్.. బాగా ప్రాచుర్యం పొందటంతో హెడెన్ బౌల్స్‌ ఆదాయం విపరీతంగా పెరిగింది. దీంతోపాటు రియల్‌ ఎస్టేట్‌ రంగంలోనూ హెడెన్ బౌల్స్ పెట్టుబడులు పెట్టాడు. అందులో నుంచి వచ్చిన డబ్బులో కొంత మొత్తాన్ని వేరుగా ఉంచాడు. దాని నుంచి వచ్చే ఆదాయంతో తన ఖర్చులు తీర్చుకుంటున్నట్లు వెల్లడించాడు.

ఈ నేపథ్యంలోనే సక్సెస్ మంత్ర ఏంటో హెడెన్ బౌల్స్ వివరించాడు. ఇందులో భాగంగా మనిషికి అత్యంత అవసరమైన రెండు అంశాలను తెలిపాడు. తాము కోటీశ్వరులుగా మారాలని భావించేవారు.. వచ్చే సంపాదనలోని 20 శాతాన్ని మాత్రమే ఖర్చు చేయాలని సూచిస్తున్నాడు. అప్పుడే భారీగా పొదుపు చేసి పెట్టుబడులు పెట్టేందుకు అవకాశం ఉంటుందని వివరించాడు. జీవితంలోని అన్నింటి కన్నా సంపాదనకే అధిక ప్రాధాన్యతను ఇవ్వాలని సూచించాడు. ఎవరైనా ఈ రెండు అంశాలు పాటిస్తే తప్పక సక్సెస్ అవుతారని చెబుతున్నాడు.