తిరుమల అలిపిరి సమీపంలో బోనులో చిక్కిన చిరుత

తిరుమల అలిపిరి మార్గంలో ఏడో మైలు దగ్గర బాలుడిపై దాడి చేసిన చిరుత ఎట్టకేలకు చిక్కింది. అటవీశాఖ అధికారులు ఏర్పాటు చేసిన బోనులో శుక్రవారం రాత్రి 10.45 గంటలకు చిక్కినట్లు అటవీశాఖ అధికారులు తెలిపారు. ఈ చిరుతను పట్టుకునేందుకు అధికారులు అలిపిరి నడకదారి మార్గంలో.. శుక్రవారం సాయంత్రం రెండు బోనులు ఏర్పాటు చేశారు.. 100కుపైగా కెమెరాలను కూడా ఏర్పాటు చేశారు. ఒక్కరోజులోనే చిరుతను బంధించడంతో భక్తులు ఊపిరి పీల్చుకున్నారు.

ఈ చిరుతకు ఏడాదిన్నర వయసు ఉంటుందని అటవీశాఖ అధికారులు తెలిపారు. ఇప్పుడిప్పుడే వేటాడే లక్షణాలు అలవాటు అవుతున్నాయని.. అందుకే బాలుడిని లాక్కెళ్లిన సమయంలో వదిలేసినట్లు చెబుతున్నారు. వేటాడే లక్షణాలు లేవు కాబట్టే బాలుడు బయటపడగలిగారన్నారు. ఈ చిరుత పిల్లిని వేటాడుతూ భక్తులు వెళ్లే మార్గంవైపు వెళ్లిందని.. పిల్లి తప్పించుకోవడంతో బాలుడిపై దాడికి ప్రయత్నించిందని చెప్పారు. ఈ ఘటన యాధృచ్చికంగా జరిగిన ఘటనగా చెబుతున్నారు. ఈ చిరుత తల్లి నుంచి ఈ మధ్యే వేరుగా ఉంటోందని.. పిల్లి అనుకుని బాలుడిని వేటాడే ప్రయత్నం చేసిందన్నారు.

గురువారం రాత్రి అలిపిరి నడకదారి మార్గంలో ఆదోనికి చెందిన కుటుంబం తిరుమలకు నడిచి వెళుతోంది. ఈ క్రమంలో ఏడో మైలు వద్ద బాలుడు తాతతో కలిసి ఓ షాపు దగ్గర స్నాక్స్ కొనుగోలు చేస్తున్నాడు.. ఇంతలో బాలుడిపై చిరుత దాడి చేసి అటవీ ప్రాంతంలోకి లాక్కెళ్లింది. దీంతో భక్తులు భయంతో అక్కడి నుంచి పరుగులు తీశారు. బాలుడి తాత పెద్దగా కేకలు వేయడంతో నడక మార్గంలో తిరుమల వెళుతున్న తిరుమల టూటౌన్ ఎస్సై రమేష్ గమనించారు. వెంటనే అక్కడికి వెళ్లి ఏం జరిగిందో ఆరా తీశారు.

ఎస్సై భక్తులతో కలిసి అటవీ ప్రాంతంలోకి వెళ్లి చూడగా 150 మీటర్ల దూరంలో బాలుడ్ని గుర్తించారు. బాలుడికి గాయాలు కాగా.. వెంటనే తిరుపతిలోని చిన్న పిల్లల ఆస్పత్రికి తరలించారు.. బాలుడికి ప్రాణాపాయం లేదని డాక్టర్లు చెప్పారు. దీంతో టీటీడీ అధికారులు అప్రమత్తం అయ్యారు.. నడక మార్గంలో వెళ్లే భక్తులకు కొన్ని సూచనలు చేశారు.. భక్తులు గుంపులు, గుంపులుగా నడిచి వెళ్లాలని సూచించారు. అలాగే చిరుతను బంధించేందుకు ఏర్పాట్లు చేశారు.

అటవీశాఖ అధికారులు రెండుచోట్లు బోన్లను ఏర్పాటు చేశారు.. 100కు పైగా ప్రాంతాల్లో కెమెరాలను ఏర్పాటు చేశారు. శుక్రవారం సాయంత్రం బోనులు ఏర్పాటు చేయగా.. రాత్రి 10.45 గంటల ప్రాంతంలో చిరుత బోనులో చిక్కింది. దీంతో ఆపరేషన్ చిరుత సక్సెస్ అయ్యిందని అటవీశాఖ అధికారులు తెలిపారు. చిరుత బోనులో చిక్కడంతో భక్తులు కూడా ఊపిరి పీల్చుకున్నారు. ఈ చిరుతను తీసుకెళ్లి అటవీ ప్రాంతంలో వదిలేయనున్నారు.