గిన్నిస్ బుక్ రికార్డ్ కోసం... ఢిల్లీలోని అన్ని మెట్రో స్టేషన్లను తిరిగొచ్చేశాడు

పేరు ప్రఖ్యాతల కోసం కొందరు ఎనలేని సాహసాలు చేస్తుంటారు. ఇదిలావుంటే  ఢిల్లీకి చెందిన శశాంక్ మను అనే యువకుడు.. 2021 లోనే గిన్నిస్ బుక్ ఆఫ్ వరల్డ్ రికార్డ్స్‌లో చోటు దక్కించుకునే సాహసం చేశాడు. కానీ దానికి సంబంధించి ఎవరినీ కలవక పోవడంతో అతనికి గిన్నిస్ బుక్‌లో చోటు దక్కలేదు. ఈ ఏడాదిలో ఓ వ్యక్తి అదే సాహసాన్ని చేయగా.. అతడికి గిన్నిస్ బుక్ ఆఫ్ వరల్డ్ రికార్డ్స్ వరించింది. ఆ విషయం తెలుసుకున్న శశాంక్ మను.. గిన్నిస్ బుక్ వారిని సంప్రదించాడు. తాను సాధించిన సాహసానికి సంబంధించిన అన్ని వివరాలను అందించాడు. దీంతో అతనికి రికార్డ్ వరించింది.

2021 ఏప్రిల్‌ 14న శశాంక్‌ మను అనే యువకుడు ఢిల్లీలోని అన్ని మెట్రో స్టేషన్లలో పర్యటించాడు. కేవలం 15 గంటల్లోనే 286 మెట్రో స్టేషన్లను తిరిగి వచ్చి గిన్నిస్‌ బుక్ ఆఫ్ వరల్డ్‌ రికార్డు నెలకొల్పాడు. ఢిల్లీకి చెందిన శశాంక్‌ మను ఫ్రీలాన్స్‌ రీసెర్చర్‌గా పని చేస్తున్నాడు. అతడికి మెట్రోలో ప్రయాణించడమంటే చాలా ఇష్టం. దీంతో ఢిల్లీలోని అన్ని మెట్రో స్టేషన్లను ఒకేసారి తిరగాలని నిర్ణయం తీసుకున్నాడు. ఇక 2021 ఏప్రిల్‌ 14 న తన ప్రతిష్టాత్మక ప్రయాణాన్ని మెట్రో బ్లూ లైన్‌ నుంచి ఉదయం 5 గంటలకు ప్రారంభించాడు. ఢిల్లీ మెట్రో గ్రీన్‌లైన్‌ సమీపంలో ఉన్న బ్రిగేడియర్ హోషియార్‌ సింగ్‌ స్టేషన్‌ వద్ద రాత్రి 8 గంటల 30 నిమిషాలకు తన మెట్రో ప్రయాణాన్ని ముగించాడు. ఆ రోజు మొత్తం 15 గంటల 22 నిమిషాల 49 సెకన్లలో ఢిల్లీ మెట్రోలో ఉన్న 286 స్టేషన్లను సందర్శించాడు.

అయితే శశాంక్ మను ఈ ఘనతను రెండేళ్ల క్రితం 2021 లోనే సాధించాడు. అయితే అప్పుడు తాను గిన్నిస్ బుక్ ఆఫ్ వరల్డ్ రికార్డ్స్ వారికి సమాచారం ఇవ్వలేదు. దీంతో అతనికి ఆ గుర్తింపు దక్కలేదు. తర్వాత 2021 ఆగస్టు 29న ఢిల్లీ మెట్రో రెవెన్యూ ఇన్స్‌పెక్టర్‌ ప్రఫుల్‌ సింగ్‌ కూడా ఢిల్లీ మెట్రోల ఉన్న అన్ని స్టేషన్లను చుట్టి వచ్చారు. ఈ ఘనతను ప్రఫుల్ సింగ్ 16 గంటల 2 నిమిషాలలో 286 స్టేషన్లను పర్యటించాడు. దీంతో ప్రఫుల్ సింగ్‌కు గిన్నిస్ బుక్ ఆఫ్ వరల్డ్ రికార్డ్స్‌లో ప్రఫుల్ సింగ్‌కు చోటు దక్కింది. ఈ విషయం ఆ నోట ఈ నోట శశాంక్ మను చెవిన పడింది.

అయితే ప్రఫుల్‌ సింగ్‌ కంటే ముందే 2021 ఏప్రిల్‌ 14న శశాంక్‌ మను ఈ ఘనత సాధించినట్లు.. గిన్నిస్‌ వరల్డ్ రికార్డ్స్‌కు శశాంక్ తెలిపాడు. దీంతో ఈ ఏప్రిల్‌లో శశాంక్ మనుకు ఈ అవార్డు దక్కింది. గిన్నిస్‌ వరల్డ్ రికార్డ్స్‌ నిబంధనలకు మేరకు శశాంక్‌ మను తాను సందర్శించిన ప్రతి మెట్రో స్టేషన్‌లో ఫొటోలు తీసుకున్నాడు. ప్రతి చోట తాను ప్రయాణించినట్లు సంబంధిత అధికారుల సంతకాలు కూడా తీసుకున్నాడు. శశాంక్ మొత్తం ప్రయాణం పూర్తయ్యేవరకు మరో ఇద్దరు సాక్ష్యంగా ఉన్నారు.

గిన్నిస్ బుక్ ఆఫ్ వరల్డ్ రికార్డ్స్‌లో చోటు దక్కించుకున్న సందర్భంగా శశాంక్ మను ట్విటర్ వేదికగా స్పందించాడు. ఢిల్లీలోని అన్ని మెట్రో స్టేషన్లను అత్యంత వేగంగా సందర్శించినందుకు తనకు లభించిన సర్టిఫికేట్‌ చూడండి అంటూ శశాంక్ ఈ ఏప్రిల్‌లో ట్వీట్‌ చేశారు. నోయిడా నుంచి గ్రేటర్‌ నోయిడా, అక్వా లైన్‌, గురుగ్రామ్‌లోని రాపిడ్ మెట్రోను కలుపుకుని 12 లైన్లు, 286 స్టేషన్లతో ఢిల్లీ మెట్రో లైన్ 391 కిలోమీటర్ల వరకు విస్తరించి ఉంది