ఉపవాస దీక్షలో ఉన్న పవన్ కళ్యాణ్‌కు స్వల్ప అనారోగ్యం

జనసేన పార్టీ అధినేత పవన్‌ కళ్యాణ్ స్వల్ప అనారోగ్యానికి గురయ్యారు. వారాహి విజయ యాత్ర లో భాగంగా పశ్చిమగోదావరి జిల్లాలో ప్రస్తుతం పర్యటిస్తున్నారు. జనసేనాని పెదఅమిరంలోని నిర్మలాదేవి ఫంక్షన్‌ హాల్లో విశ్రాంతి తీసుకుంటున్నారు. పవన్ ఉపవాస దీక్షలో ఉండటంతో నీరసంతో స్వల్ప అస్వస్థతకు గురైనట్లు తెలుస్తోంది. ఈ కారణంగానే మంగళవారం ఉదయం 11 గంటలకు జరగాల్సిన భీమవరం నియోజకవర్గ నేతలతో సమావేశాన్ని వాయిదా వేశారు. ఈ సమావేశం మధ్యాహ్నం తర్వాత నిర్వహించనున్నారు.. ఈ క్రమంలో ఇతర పార్టీలకు చెందిన నేతలు పవన్‌ సమక్షంలో నేడు జనసేనలో చేరనున్నారు.

వాస్తవానికి ఇవాళ షెడ్యూల్ ప్రకారం.. పవన్ కళ్యాణ్ ఉదయం 11 గంటలకు భీమవరం నియోజకవర్గ నేతలతో సమావేశం ఏర్పాటుచేశారు. సాయంత్రం బహరింగ సభను ఏర్పాటు చేశారు. కానీ పవన్ స్వల్ప అస్వస్థతతో షెడ్యూల్‌లో చిన్న మార్పులు చేశారు. పవన్ నీరసంగా ఉండటంతో విశ్రాంతి తీసుకున్నారని.. జనసైనికులు, అభిమానులు కంగారుపడాల్సిన అవసరం లేదంటున్నారు.

మరోవైపు జనసేన పార్టీ అధికారిక యూట్యూబ్ ఛానల్ 10 లక్షల సబ్స్ క్రైబర్స్‌ను చేరుకుంది. ఈ సందర్భంగా పవన్ కళ్యాణ్ జనసేన పార్టీని అభినందించారు. జనసేనకు మద్దతు తెలిపినందుకు ధన్యవాదాలు తెలిపారు. అటు సోమవారం సాయంత్రం జరిగిన నర్సాపురం సభలో కూడా పవన్ కళ్యాణ్ జగన్ సర్కార్‌పై విరుచుకుపడ్డారు. సీఎం జగన్ ఎప్పుడూ బటన్ నొక్కుతానని గొప్పలు చెబుతారని.. ఆయన నొక్కకుండా వదిలేసిన బటన్లు ఎన్నో ఉన్నాయి అన్నారు. పోలవరం నిర్మాణం, రైతుల పంట నష్టపరిహారం, నిరుద్యోగ సమస్య, వలస వెళ్లేవారి కష్టాలు, దగ్ధమైన దేవాలయాలు, అంతర్వేది రథం, దళితులపై హత్యలు, అత్యాచారాలు, ఇలా చాలా సమస్యలు ఉన్నాయన్నారు. ఈ సమస్యల పరిష్కారానికి బటన్‌ ఎందుకు నొక్కడం లేదని ప్రశ్నించారు.

జనసేన పార్టీ ప్రభుత్వం అధికారంలోకి వస్తే బటన్‌ నొక్కనని.. వ్యవస్థను కాపాడేందుకు ఓ ముఠామేస్త్రిలా పని చేస్తాను అన్నారు. విద్య, వైద్యం ఉచితంగా అందిస్తామని.. ఆరోగ్యశ్రీని మించిన హెల్త్‌ పాలసీని తీసుకువస్తామని హామీ ఇచ్చారు. ఆడపిల్లల జోలికి రావాలంటే భయపడేలా కఠిన చట్టాలు తీసుకువస్తాను అన్నారు. 2019 ఎన్నికల్లో తాను రెండు నియోజకవర్గాల్లో ఓడటంతో తన గుండె పగిలింది అన్నారు. జనసేన పార్టీ సానుభూతిపరుల ఓట్లు తొలగిస్తున్నారని.. జాగ్రత్తగా ఉండాలని పార్టీ కేడర్‌కు దిశా నిర్దేశం చేశారు. ప్రతి ఒక్కరూ పార్టీ బలోపేతంపై ఫోకస్ పెట్టాలన్నారు.. ఉభయ గోదావరి జిల్లాల్లో వైఎస్సార్‌సీపీకి ఒక్క సీటు కూడా రాకూడదనే లక్ష్యంతో పనిచేయాలని మరోసారి వ్యాఖ్యానించారు.