కోటంరెడ్డితో టీడీపీ నేతల భేటీ,,,పార్టీలోకి రావాలని ఆహ్వానం

ఎన్నికలు సమీపిస్తున్నవేళ ఏపీలో రాజకీయ సమీకరణలు వేగంగా మారుతున్నాయి. ఇదిలావుంటే నెల్లూరు జిల్లా రాజకీయాలు ఎప్పుడూ భిన్నంగానే ఉంటాయి. కొన్నేళ్లుగా ఈ జిల్లాలో టీడీపీకి అంతగా బలం లేదు.. ఒకటి, రెండు సీట్లకే పరిమితం అవుతోంది. కానీ 2024 పొలిటికల్ పిక్చర్ మారబోతోందని చెబుతోంది తెలుగు దేశం పార్టీ.. ఈసారి కచ్చితంగా మెజార్టీ సీట్లు తమవే అంటోంది. ఇటు అధికార పార్టీ నుంచి సస్పెండ్ అయిన ముగ్గురు ఎమ్మెల్యేలు సైతం టీడీపీకి జై కొట్టారు. ఆనం, మేకపాటి లోకేష్‌ను కలిసి పాదయాత్రలో పాల్గొనగా.. నెల్లూరు రూరల్ ఎమ్మెల్యే కోటంరెడ్డి శ్రీధర్ రెడ్డి కూడా అదే బాటలో నడుస్తున్నారు.

ఎమ్మెల్యే కోటంరెడ్డి శ్రీధర్ రెడ్డిని మాజీ మంత్రులు నారాయణ, సోమిరెడ్డి చంద్రమోహన్ రెడ్డి, అమర్‌నాథ్ రెడ్డితో పాటూ టీడీపీ నేతలు కలిశారు. పార్టీలోకి రావాల్సిందిగా ఆహ్వానించారు.. కోటంరెడ్డి కూడా సుముఖత వ్యక్తం చేశారు. తాను వైఎస్సార్‌సీపీకి దూరంగా ఉంటున్న తనను టీడీపీలోకి ఆహ్వానించినందుకు జిల్లా టీడీపీ నేతలకు ధన్యవాదాలు తెలిపారు. నెల్లూరు రూరల్ నియోజకవర్గం‌లో లోకేష్ పాదయాత్ర‌కు తనను నిర్వహించాలని తెలుగు దేశం నేతలు ఆహ్వానించడం సంతోషంగా ఉందన్నారు.

నెల్లూరు పార్లమెంటరీ టీడీపీ అధ్యక్షులు అబ్దుల్ అజీజ్ సలహా సూచనలతో లోకేష్ పాదయాత్ర విజయవంతం చేస్తానన్నారు కోటంరెడ్డి. రాష్ట్రంలో ఎక్కడా లేని విధంగా నారా లోకేష్ చేపట్టిన యువగళం పాదయాత్రను నెల్లూరు రూరల్ నియోజకవర్గంలో విజయవంతం చేస్తామన్నారు. టీడీపీ నేతలతో కలిసి ఏకతాటిపై పనిచేస్తామన్నారు. ప్రభుత్వ ప్రజా వ్యతిరేక విధానాలను ప్రశ్నిస్తూ.. ప్రజా సమస్యల్ని ప్రస్తావిస్తూ.. వాటి పరిష్కారానికి తనవంతుగా పనిచేస్తానన్నారు. నెల్లూరు రూరల్ నియోజకవర్గంలో ప్రతి నేత, కార్యకర్త సలహాలు తీసుకుంటాను అన్నారు. అందరి ఆశీస్సులు తనకు కావాలన్నారు.

వైఎస్సార్‌సీపీ పతనం నెల్లూరు నుంచే మొదలైందన్నారు మాజీ మంత్రి సోమిరెడ్డి చంద్రమోహన్ రెడ్డి. కోటంరెడ్డి శ్రీధర్ రెడ్డి, ఆయన అనుచరులను పార్టీలోకి స్వాగతం పలికామన్నారు. కాకాణి మంత్రి అయ్యాక పార్టీలో ముగ్గురు ఎమ్మెల్యేలు బయటకు వచ్చారని.. మూడు ఎమ్మెల్సి స్థానాలను గెలిచామన్నారు. జిల్లాలో టీడీపీ మరింత బలోపేతం అవుతుందన్నారు.

2024లో వచ్చేది తెలుగుదేశం ప్రభుత్వమే అని ధీమా వ్యక్తం చేశారు మాజీ మంత్రి నారాయణ. నారా లోకేష్ చేపట్టిన యువగళం పాదయాత్ర నెల్లూరు సిటీ నియోజకవర్గంలో విజయవంతంగా చేయడానికి తీసుకోవాల్సిన చర్యలపై సమావేశంలో చర్చించామన్నారు. కోటంరెడ్డి శ్రీధర్ రెడ్డి టీడీపీలోకి రావడం చాలా సంతోషంగా ఉందని.. నెల్లూరు జిల్లాలో ముగ్గురు ఎమ్మెల్యేలు టీడీపీలోకి రావడం శుభపరిణామం అన్నారు. జగన్ ప్రభుత్వం మీద ప్రజలందరూ చాలా విసిగిపోయి ఉన్నారన్నారు. 2019 ఎన్నికల తర్వాత టీడీపీ కార్యక్రమాలకు దూరంగా ఉంటున్న మాజీ మంత్రి నారాయణ మళ్లీ రాజకీయాల్లో యాక్టివ్ అవుతున్నారు.