ఫుడ్‌తో పాటు చాక్లెట్ అందించి,,,జొమాటో ఫుడ్ డెలివరీ బాయ్ చేసిన పనికి కస్టమర్లు షాక్

జొమాటో డెలివరీ బాయ్‌లను మనం నిత్యం చూస్తూ ఉంటాం. ఎండ, వాన, చలి తేడా లేకుండా.. పగలు, రాత్రి కష్టపడి కస్టమర్లకు ఫుడ్‌ను అందిస్తూ ఉంటారు. అయితే ఓ డెలివరీ బాయ్ మాత్రం.. తాను డెలివరీ చేసే ఫుడ్‌తో పాటు తన కస్టమర్లకు చాక్‌లెట్లు అందించారు. ఎందుకంటే ఆ రోజు అతని పుట్టిన రోజు. పుట్టిన రోజు నాడు కూడా తన వృత్తి ధర్మం పాటిస్తూ అదే సమయంలో తన బర్త్ డేను కూడా జరుపుకున్నాడు. ఓ వైపు కస్టమర్లకు ఆర్డర్లు డెలివరీ చేస్తూనే.. మరోవైపు తన బర్త్ డే సందర్భంగా వారికి చాక్లెట్లు పంచాడు. దీంతో ఆ కస్టమర్లు అందరూ ఆ డెలివరీ బాయ్‌కి పుట్టినరోజు శుభాకాంక్షలు తెలిపారు.

జొమాటోలో డెలివరీ బాయ్‌గా పనిచేస్తున్న కరణ్ ఆప్టే.. తన 30 వ బర్త్ డేను కొత్తగా జరుపుకోవాలని భావించాడు. దీంతో ఉదయాన్నే కొత్త షర్ట్ కొనుక్కుని డ్యూటీకి వెళ్లాడు. తర్వాత తనకు ఆ రోజు వచ్చిన ఆర్డ‌ర్‌లతోపాటే చాక్లెట్లు పంచాలని నిర్ణయించుకున్నాడు. చాక్లెట్లు కొనుక్కుని తన బ్యాగ్‌లో వేసుకున్నాడు. అనంతరం తాను పుడ్ డెలివ‌రీ చేసిన క‌స్టమ‌ర్లంద‌రికీ చాక్లెట్లు అందించి త‌న సంతోషాన్ని వారితో పంచుకున్నారు. వారు కూడా కరణ్ ఆప్టేకు బర్త్ డే విషెస్ తెలియజేశారు.

తాను తన 30 వ బర్త్ డేను ఏ విధంగా చేసుకున్న విషయాన్ని క‌ర‌ణ్ ఆప్టే ఫేస్‌బుక్ పోస్ట్‌ ద్వారా అంద‌రికీ తెలియ జేశాడు. బ‌ర్త్ డే రోజు కొత్త ష‌ర్ట్ కొనుక్కొని.. తనకు ఆర్డర్ ఇచ్చిన ప్రతీ కస్టమర్‌కు చాక్లెట్ ఇచ్చాన‌ని తాను పెట్టిన పోస్ట్‌కు కరణ్ క్యాప్షన్ ఇచ్చాడు. ప్రస్తుతం కరణ్ ఆప్టే చేసిన పోస్ట్ వైర‌ల్‌గా మారింది. దీంతో నెటిజన్లు కూడా క‌ర‌ణ్‌కు బర్త్ డే విషెస్ చెబుతున్నారు. డెలివరీ బాయ్‌గా తన విధులు నిర్వర్తిస్తూనే బ‌ర్త్‌డే సెలబ్రేట్ చేసుకున్న తీరుపై ప్రశంస‌లు కురిపిస్తున్నారు. ఇలాంటి ఉద్యోగి ఉన్నందుకు గర్వపడాలని సూచిస్తూ.. బర్త్ డే బాయ్‌కి గిఫ్ట్ ఇవ్వాలని జొమాటోకు ట్యాగ్ చేశారు. దీంతో ఈ విషయం కాస్త జొమాటోకు చేరింది. దీంతో స్పందించిన జొమాటో యాజమాన్యం.. కరణ్ ఆప్టేకు ప్రత్యేకంగా కేక్‌ను ఆర్డర్ చేసి పంపించింది. జొమాటో ఇచ్చిన సర్‌ప్రైజ్ గిఫ్ట్‌కు కరణ్ ఉబ్బి తబ్బిబ్బయ్యాడు. తాను పనిచేస్తున్న కంపెనీ తన బర్త్ డే రోజు ప్రత్యేకంగా కేక్ పంపించడంతో కరణ్ సంతోషానికి అవధులు లేకుండా పోయాయి.