పవన్‌ కళ్యాణ్‌ ఎందుకు అలా ఊగిపోతున్నారు... నందిగం సురేష్

ధారణంగా మందు తాగినవాళ్లు మాత్రమే ఊగాలి, వాగాలని.. కానీ, జనసేన పార్టీ అధినేత పవన్‌ కళ్యాణ్‌ ఎందుకు అలా ఊగిపోతున్నారని బాపట్ల వైఎస్సార్ కాంగ్రెస్ పార్టీ నందిగం సురేష్ ప్రశ్నించారు. జనసేనాని పవన్‌ కళ్యాణ్‌ ఊగుతూ.. వాగుతుంటారని ఆరోపించారు. పవన్ కళ్యాణ్ క్లాస్ వార్ గురించి మాట్లాడుతున్నారని.. ఆయన ఏ క్లాస్ నుంచి ప్యాకేజ్ అందుకున్నారని నిలదీశారు. పవన్ కళ్యాణ్ పోటీ చేసిన స్థానాల్లో ఖర్చు పెట్టిన డబ్బు ఏ క్లాస్ నుంచి వచ్చిందని ప్రశ్నించారు. జనసేన అభ్యర్థులకు ఎవరు ఖర్చు పెట్టారో ప్రజలకు తెలుసని వ్యాఖ్యానించారు.

తాను తాగే టీ గ్లాస్‌ను పవన్ కళ్యాణ్ తెచ్చుకుంటే.. టీ మాత్రం తెలుగు దేశం పార్టీ అధినేత చంద్రబాబు పోశారని ఎంపీ నందిగం సురేష్ ఎద్దేవా చేశారు. చంద్రబాబుకి బానిసత్వం చేయటంలో పవన్ కళ్యాణ్‌కి అలసట రావటం లేదని దుయ్యబట్టారు. సీఎం జగన్ పెద్ద ఎత్తున సంక్షేమ పథకాలు అమలు చేస్తుంటే రాష్ట్రం శ్రీలంక అవుతుందని పవన్ కళ్యాణ్ అంటున్నారని చెప్పారు. మరి అదే పవన్ కళ్యాణ్ అధికారంలో వస్తే జగన్ కంటే ఎక్కువ చేస్తామనటానికి సిగ్గు ఉండాలని మండిపడ్డారు.

పవన్ కళ్యాణ్ తాను మాత్రమే సత్య హరిచంద్రుడు అని అనుకుంటున్నారనని ఎంపీ నందిగం సురేష్ తీవ్ర ఆగ్రహం వ్యక్తం చేశారు. పవన్ కళ్యాణ్ మాత్రం అందరినీ విమర్శిస్తాడట.. ఆయన్ను ఏమీ అనుకూడదని అన్నారు. అయితే, విమర్శలు చేస్తే సమాధానం చెప్పాలి గాని, పవన్ కళ్యాణ్‌కు ఎందుకు అంత ఆవేశమని ప్రశ్నించారు. 2014లో కలిసి ఉన్న జనసేన, టీడీపీకి మధ్య 2019లో ఎందుకు చెడిందని నిలదీశారు. సీఎం జగన్‌ను ఎదుర్కోవడం కోసం వేర్వేరు తలలు పెట్టుకుని అప్పట్లో పోటీ చేసేవారని.. ఇప్పుడు ప్రభుత్వ వ్యతిరేక ఓటు చీలినివ్వబోమని మళ్లీ ఏకం అవుతున్నారని ఫైరయ్యారు. ఎంత మంది ఏకమైనా.. వచ్చే ఎన్నికల్లో గెలిచేది వైఎస్సార్‌ కాంగ్రెస్‌ పార్టీయే అని మరోసారి వైఎస్‌ జగన్మోహన్ రెడ్డి ముఖ్యమంత్రి అవుతారని అన్నారు.