కొడికొండ చెక్‌పోస్టు దగ్గర కరెన్సీ కలకలం,,,ఓ కారులో రూ. కోటిని సీజ్ చేసిన పోలీసులు
Andhra Pradesh Telugu | Suryaa Desk | Published : Sat, Jul 01, 2023, 07:58 PM
శ్రీ సత్యసాయి జిల్లాలో భారీగా డబ్బులు పట్టుబడ్డాయి. కొడికొండ చెక్ పోస్ట్ దగ్గర పోలీసుల తనిఖీలు చేపట్టగా.. అనుమానాస్పదంగా ఉన్న వాహనాల్లో సోదాలు చేశారు. ఈ క్రమంలో ఓ కారులో రూ. కోటి డబ్బులు ఉన్నట్లు గుర్తించారు. కారులో ఉన్నవాళ్లు డబ్బులకు సంబంధించి సరైన డాక్యుమెంట్లు చూపించకపోవడంతో.. ఆ డబ్బుల్ని స్వాధీనం చేసుకున్నారు. పోలీసులు ఈ డబ్బును ఐటీ అధికారులకు అప్పగించారు.. అలాగే ముగ్గురు వ్యాపారులను అదుపులోకి తీసుకున్నారు.. కారును సీజ్ చేశారు.
కొడికొండ చెక్‌పోస్టు కర్ణాటక, అనంతపురంకు మధ్యలో ఉంటుంది. అందుకే అక్కడ పోలీసులు అప్పుడప్పుడు తనిఖీలు చేస్తుంటారు. గతంలో కూడా ఇక్కడ తనిఖీలు చేయగా.. డబ్బులు, అక్రమంగా రవాణా చేస్తున్న బంగారాన్ని కూడా సీజ్ చేసిన సందర్భాలు ఉన్నాయి. ఇప్పుడు ఏకంగా రూ. కోటి దొరకడం సంచలనంగా మారింది. ఈ డబ్బుల్ని ఎక్కడి నుంచి ఎక్కడికి తీసుకెళుతున్నారన్నది క్లారిటీ లేదు. ఆ ముగ్గురు వ్యాపారుల్ని పోలీసులు ప్రశ్నిస్తున్నారు. వ్యాపారానికి సంబంధించిన డబ్బులా.. హవాలా మనీ అనే కోణంలో దర్యాప్తు చేస్తున్నారు.
|
|