కోనసీమ జిల్లాలో గుడికి వెళ్లిన కుటుంబం,,,దగ్గుబాటి వెంకటేశ్వరరావుకు అస్వస్థత

మాజీ మంత్రి దగ్గుబాటి వెంకటేశ్వరరావు స్వల్ప అస్వస్థతకు గురయ్యారు. కుటుంబ సభ్యులతో కలిసి అంబేద్కర్ కోనసీమ జిల్లా కొత్తపేట మండలం మందపల్లి శనేశ్వర స్వామి ఆలయంలో పూజలు నిర్వహించేందుకు వెళ్లారు. శని త్రయోదశి సందర్భంగా పూజలు నిర్వహించేందుకు ఆలయానికి వెళ్లారు దగ్గుబాటి. శని దోషం కోసం తైలాభిషేకం చేయిస్తుండగా.. ఆయనకు కళ్లు తిరిగి ఇబ్బంది పడ్డారు. వెంటనే ఆయనను కుటుంబ సభ్యులు ఆలయంలోనే ఓ పక్కన కూర్చోపెట్టారు.. ఆయన సేద తీరారు.

దగ్గుబాటి కుటుంబసభ్యులు, సన్నిహితులు పూజా కార్యక్రమాలు పూర్తి చేసే వరకు అక్కడే ఉన్నారు. గతంలోనూ దగ్గుబాటి వెంకటేశ్వరరావు అస్వస్థతకు గురైన సంగతి తెలిసిందే. ఆయనకు గుండె నొప్పి రావడంతో జూబ్లీహిల్స్‌లోని అపోలో ఆస్పత్రిలో చేరారు.. అక్కడ చికిత్స అందించారు. మళ్లీ ఇప్పుడు స్వల్ప అస్వస్థతకు గురయ్యారు.. ఆయనకు కళ్లు తిరిగాయని పెద్ద సమస్యేమీ లేదని కుటుంబ సభ్యులు తెలిపారు.

దగ్గుబాటి వెంకటేశ్వరరావు రాజకీయాలకు దూరంగా ఉంటున్నారు. తనతో పాటూ తన కుమారుడు హితేష్ కూడా పూర్తి రాజకీయాల నుంచి వైదొలుగుతున్నట్లు ప్రకటించారు. డబ్బు, కక్ష సాధింపులతో రాజకీయాలు చేయడం తమ కుటుంబానికి అలవాటు లేదన్నారు.. అందుకనే రాజకీయాలకు తాము పూర్తిగా తప్పుకున్నట్లు తెలిపారు. దగ్గుబాటి వెంకటేశ్వరరావు గతంలో టీడీపీ హయాంలో మంత్రిగా పనిచేశారు.. ఆ తర్వాత కాంగ్రెస్ పార్టీలో చేరి ఎమ్మెల్యేగా గెలిచారు. రాష్ట్ర విభజన తర్వాత 2014 ఎన్నికలకు దూరంగా ఉన్నారు.. 2019 ఎన్నికలకు ముందు తన కుమారుడితో కలిసి వైఎస్సార్‌సీపీలో చేరారు. పర్చూరు నుంచి పోటీచేసి ఓడిపోయారు. ఆ తర్వాత రాజకీయాలకు గుడ్ బై చెప్పారు.. వెంకటేశ్వరరావు సతీమణి కేంద్ర మాజీ మంత్రి దగ్గుబాటి పురందేశ్వరి బీజేపీలో కొనసాగుతున్నారు.