కాలేజీకి వెళ్తుండగా సినీ ఫక్కీలో ఇంటర్ బాలిక కిడ్నాప్

సైకిల్‌పై కాలేజీకి వెళ్తున్న అమ్మాయిని కారులో వచ్చిన కొంత మంది వ్యక్తులు సినీ ఫక్కీలో కిడ్నాప్ చేశారు. శ్రీకాకుళం జిల్లా ఎచ్చెర్లలో సోమవారం (జూలై 3) ఉదయం చోటు చేసుకున్న ఈ ఘటన స్థానికంగా కలకలం సృష్టించింది. కిడ్నాప్ ఘటనకు సంబంధించిన దృశ్యాలు సీసీటీవీ కెమెరాల్లో నిక్షిప్తమయ్యాయి. ఎచ్చెర్ల మండలం ఫరీదుపేటకు చెందిన బుడుమూరు దుర్గాభవాని.. ఎచ్చెర్ల ప్రభుత్వ జూనియర్‌ కాలేజీలో ఇంటర్ ఫస్ట్ ఇయర్ చదువుతోంది. ఏడాది కిందట ఆమెకు తల్లిదండ్రులు పెళ్లి జరిపించారు. పొందూరు మండలం సింగూరుకు చెందిన సింగూరు భాస్కరరావుతో వివాహం జరిపించారు. అయితే, పెళ్లి తర్వాత తనకు ఇష్టం లేదంటూ దుర్గాభవాని తన తల్లిదండ్రుల ఇంటికి వచ్చేసింది. తల్లిదండ్రుల ఇంట్లోనే ఉండి చదువు కొనసాగిస్తున్నట్లు తెలుస్తోంది.

కుమార్తెను కాపురానికి పంపించాలంటూ తల్లిదండ్రులను దుర్గాభవానీ భర్త నిలదీశాడు. పెద్ద మనుషుల సమక్షంలో పంచాయతీ జరిగింది. అయితే, పెద్ద మనుషుల సమక్షంలోనూ దుర్గాభవాని తాను కాపురానికి వెళ్లనంటూ తెగేసి చెప్పినట్లు తెలుస్తోంది. ఈ నేపథ్యంలో సోమవారం ఉదయం తన తోటి విద్యార్థినులతో కలిసి రోజూ మాదిరిగానే కాలేజీకి వెళ్తుండగా.. జాతీయ రహదారిపై నీలి రంగు కలర్ కారుతో వచ్చిన గుర్తు తెలియని వ్యక్తులు మాటు వేసి.. దుర్గాభవానిని అడ్డగించి, ఆమెను బలవంతంగా కారులోకి ఎక్కించుకొని పారిపోయారు.

కిడ్నాప్ విషయం తెలుసుకున్న బాలిక తల్లిదండ్రులు ఎచ్చెర్ల పోలీసు స్టేషన్‌లో ఫిర్యాదు చేశారు. భర్త భాస్కరరావుపై అనుమానం వ్యక్తం చేశారు. ఎచ్చెర్ల పోలీసులు కేసు నమోదు చేసుకొని దర్యాప్తు చేస్తున్నారు. పోలీసులు నాలుగు బృందాలుగా ఏర్పడి గాలింపు చర్యలు చేపట్టారు. సీసీటీవీ దృశ్యాలను పరిశీలించి నిందితులను గుర్తించే ప్రయత్నం చేస్తున్నారు.  స్థానికంగా ఈ ఘటన చర్చనీయాంశంగా మారింది. చిన్నవయసులోనే అమ్మాయికి తల్లిదండ్రులు పెళ్లి చేసి పంపిస్తే.. ఇష్టం లేదు మొర్రో అంటున్నా అత్తింటి వారు కాపురానికి రమ్మంటూ ఒత్తిడి చేయడం.. ఇద్దరి మధ్య బాలిక ఎంతగా నలిగిపోయిందోనని పలువురు ఆవేదన వ్యక్తం చేస్తున్నారు.