కృష్ణా రెడ్డి వేసిన పిటిషన్ను కొట్టివేసిన సుప్రీం కోర్టు
Andhra Pradesh Telugu | Suryaa Desk | Published : Wed, Jul 05, 2023, 06:50 PM
ఏపీలో రాజకీయ దుమారం రేపిన ముఖ్యమంత్రి వైఎస్ జగన్మోహన్ రెడ్డి బాబాయ్, మాజీ మంత్రి వైఎస్ వివేకానందరెడ్డి హత్య కేసులో తనను బాధితుడిగా పరిగణించాలంటూ ఆయన వ్యక్తిగత సహాయకుడు (పీఏ) కృష్ణా రెడ్డి వేసిన పిటిషన్ను సుప్రీం కోర్టు కొట్టివేసింది. ఈ కేసులో దస్తగిరి అప్రూవర్గా మారడాన్ని సవాల్ చేసే అధికారం తనకు కూడా ఉన్నట్లు ఆదేశాలు ఇవ్వాలన్న కృష్ణా రెడ్డి అభ్యర్థనను సర్వోన్నత న్యాయస్థానం తోసిపుచ్చింది.
వివేకా హత్య కేసులో జోక్యానికి సిద్ధంగా లేమని సుప్రీం కోర్టు ధర్మాసనం ఈ సందర్భంగా స్పష్టం చేసింది. వాద, ప్రతివాదుల అభిప్రాయాలు హైకోర్టు ముందే చెప్పుకోవాలని తేల్చిచెప్పింది. దీనిపై తమ అభిప్రాయాలతో సంబంధం లేకుండా హైకోర్టు స్వతంత్రంగా తగిన నిర్ణయం తీసుకోవచ్చని సుప్రీం ధర్మాసనం స్పష్టం చేసింది. ఈ కేసులో గురువారం లిఖితపూర్వకంగా ఆదేశాలు ఇస్తామని తెలిపింది.
ఇదిలావుంటే వైఎస్ వివేకానందరెడ్డి హత్య జరిగిన విషయాన్ని ముందుగా గుర్తించి అందరికీ సమాచారం చేరవేసిందీ, వివేకా రాశారని చెబుతున్న లేఖను అల్లుడు రాజశేఖర్ రెడ్డికి అందించిందీ పీఏ కృష్ణారెడ్డి కావడం గమనార్హం. ఈ నేపథ్యంలో కృష్ణారెడ్డిని సీబీఐ అదుపులోకి తీసుకుని పలుమార్లు ప్రశ్నించింది. అయితే ఈ కేసులో ఆయన్ను అరెస్టు చేసే అవకాశాలు ఉన్నాయని కూడా ప్రచారం జరిగింది. ఈ నేపథ్యంలో వివేకా హత్య గురించి లోకానికి ముందుగా తెలియజేసిన తనను బాధితుడిగా పరిగణించాల్సింది పోయి నిందితుడిని చేస్తున్నారంటూ కృష్ణారెడ్డి ఆవేదన వ్యక్తం చేస్తున్నారు.
|
|