కెనడాలో తెలుగు యువకుడు మృతి

ఉన్నత చదువుల కోసం కెనడా వెళ్లిన తెలుగు యువకుడు మరణం కుటుంబంలో తీవ్ర విషాదాన్ని నింపింది. మచిలీపట్నం చింతగుంటపాలెంకు చెందిన ట్రెజరీ ఉద్యోగి పొలుకొండ శ్రీనివాస్‌, మీనాకుమారిల కుమారుడు లెనిన్‌ నాగకుమార్‌ లేక్‌హెడ్‌ యూనివర్శిటీలో ఎంఎస్ చేసేందుకు 2021లో కెనడా వెళ్లాడు. నాగకుమార్ గత సోమవారం స్నేహితులతో కలిసి కెనడాలోని సిల్వర్‌ఫాల్స్‌‌కు వెళ్లారు. అక్కడ ఈతకు వెళ్లి ప్రమాదవశాత్తూ ప్రాణాలు కోల్పోయాడు. కుమారుడి మరణవార్త విని తల్లిదండ్రులు తీవ్ర విషాదంలో ఉన్నారు. ఇప్పుడు కెనడా నుంచి మృతదేహాన్ని తీసుకురావడానికి తల్లిదండ్రులు సతమతమవుతున్నారు.

కేంద్రంతో మాట్లాడి తమ కుమారుడు భౌతిక కాయాన్ని మచిలీపట్నం తీసుకొచ్చేందుకు సాయం చేయాలని ఎంపీ వల్లభనేని బాలశౌరిని నాగకుమార్ తల్లిదండ్రులు కోరారు. కనీసం తమ కుమారుడి చివరి చూపు చూసే అవకాశం కల్పించాలని కోరారు. దీనికి స్పందించిన ఎంపీ.. నాగకుమార్ మృతదేహాన్ని స్వదేశానికి తీసుకువచ్చేందుకు అవసరమైన చర్యలు తీసుకోవాలని విదేశీ వ్యవహారాల మంత్రి జైశంకర్, ఒట్టావాలోని భారత హై కమిషనర్ సంజయ్ వర్మను కోరారు.

చిన్నతనం నుంచి నాగకుమార్‌ చదువులో రాణించాడు. మచిలీపట్నంలో టెన్త్, ఇంటర్ చదివాడు.. భీమవరంలో ఇంజనీరింగ్‌ పూర్తి చేశాడు. కెనడా వెళ్లి ఎంఎస్‌ పూర్తిచేసి.. ఉద్యోగానికి ఎంపికయ్యాడు. రెండు నెలల్లో ఇంటికి వచ్చేస్తానని తల్లిదండ్రులకు చెప్పాడు. ఇంతలో నాగకుమార్ ప్రాణాలు కోల్పోవడంతో తల్లిదండ్రులు తీవ్ర విషాదంలో ఉన్నారు. శ్రీనివాస్ దంపతులకు ముగ్గురు పిల్లలు కాగా.. లెనిన్‌ నాగకుమార్‌ పెద్దవాడు.. మరో ఇద్దరు కవల పిల్లలు ఉన్నారు. వీరిలో తరుణ్‌ విశాఖలో ఇంజనీరింగ్‌, చరణ్‌ కూడా అక్కడే డెంటల్‌ కోర్సు చేస్తున్నారు.