మున్సిపల్ సిబ్బంది తీరుపై ప్రజ్వల ఆగ్రహం,,,సుప్రీం కోర్టుకైనా వెళ్తానని చెబుతున్న టెకీ

కడప జిల్లాలో సాఫ్ట్‌వేర్ ఇంజినీర్ ప్రజ్వల పెంపుడు కుక్క కోసం పోరాటం చేస్తున్నారు. అవసరమైతే సుప్రీం కోర్టుకు వెళ్లేందుకు కూడా సిద్ధమంటున్నారు. ప్రొద్దుటూరులోని బుడ్డాయపల్లెలో సాఫ్ట్‌వేర్ ఉద్యోగిని ప్రజ్వల కుటుంబం నివాసం ఉంటోంది. గత నెల 27 నుంచి ఆ ఫ్యామిలీ పెంచుకుంటున్న కుక్క కనిపించడం లేదు. ఈ క్రమంలో ఉద్యోగరీత్యా బెంగళూరులో ఉన్న ప్రజ్వలకు కుటుంబ సభ్యులు సమాచారం ఇచ్చారు.

ఈ నెల 1న ప్రజ్వల ప్రొద్దుటూరు వచ్చారు. తమ పెంపుడు కుక్క కనిపించడం లేదని.. దగ్గరలో ఉన్న వార్డు సచివాలయ సిబ్బందిని సంప్రదించారు. అప్పుడు అసలు విషయం బయటపడింది. బుడ్డాయపల్లె ప్రాంతంలో కుక్కల బెడద ఎక్కువగా ఉందని స్థానికుడు ప్రజా స్పందనలో ఫిర్యాదు చేశాడట. మున్సిపల్ సిబ్బంది వెంటనే స్పందించి.. ఆ వీధిలోని కుక్కలను పట్టుకుని అటవీ ప్రాంతంలో వదిలేసినట్లు చెప్పారు. తమ పెంపుడు శునకాన్ని కూడా ఆ వీధి కుక్కలతో పాటూ అక్కడే వదిలేశారని ఆమె ఆరోపించారు.

ప్రజ్వల ఈ విషయాన్ని కేంద్ర మాజీ మంత్రి, పీపుల్‌ ఫర్‌ యానిమల్‌ సంస్థ ఛైర్‌పర్సన్‌, ఎంపీ మేనకాగాంధీకి మెసేజ్ పంపారు. తన పెంపుడు కుక్కతో పాటు వీధిలోని ఆరు కుక్కలు కనిపించడం లేదని చెప్పారు. స్థానిక మున్సిపల్ సిబ్బంది కుక్కలకు కుటుంబ నియంత్రణ చేయించి తిరిగి మళ్లీ అదే ప్రాంతంలో వదిలి పెట్టలేదని ఫిర్యాదు చేశారు. వెంటనే మేనకాగాంధీ స్పందించి ప్రజ్వలతో ఫోన్‌లో మాట్లాడారు.. వివరాలు అడిగి తెలుసుకున్నారు.

మేనకాగాంధీ అనంతరం కలెక్టర్‌ విజయరామరాజు, ఎస్పీ అన్బురాజన్‌, మున్సిపల్ కమిషనర్‌ వెంకటరమణయ్యకు ఫోన్‌ చేసి మాట్లాడారు. ప్రొద్దుటూరులో జరిగిన విషయాన్ని వారికి తెలియజేశారు. వెంటనే కలెక్టర్‌ స్పందించి ప్రజ్వలతో ఫోన్‌లో మాట్లాడి వివరాలు అడిగి తెలుసుకున్నారు.. కచ్చితంగా విచారణ చేసి చర్యలు తీసుకుంటానని హామీ ఇచ్చారు. ఈ నెల 3న త్రీ టౌన్ పోలీసు స్టేషన్‌లో ఫిర్యాదు చేయడంతో కేసు నమోదైంది. మున్సిపల్ కమిషనర్ సహా స్థానిక ఉద్యోగులు, వాలంటీర్‌కు నోటీసులు ఇచ్చారు.

మున్సిపల్ సిబ్బంది వీధిలోని శునకాలను పట్టుకునే సమయంలో విషం ఇచ్చారని స్థానికుల ద్వారా తనకు తెలిసిందన్నారు ప్రజ్వల. తన పెంపుడు కుక్కతో పాటు వీధిలోని కుక్కలను తెచ్చి ఇచ్చేవరకు పోరాటం ఆపేది లేదంటున్నారు. అవసరమైతే సుప్రీం కోర్టును ఆశ్రయించేందుకు రెడీ అంటున్నారు. ప్రొద్దుటూరులో శునకాల వ్యవహారం ఇప్పుడు చర్చనీయాంశమైంది. ఈ వ్యవహారంపై మున్సిపల్ సిబ్బంది స్పందించాల్సి ఉంది.