పెళ్లయిన తర్వాత మరో వ్యక్తిని ప్రేమించిన భార్య,,,భార్యకు ప్రియుడితో పెళ్లి చేసిన భర్త

కన్యాదానం సినిమా చూశారా. అందులో హీరో శ్రీకాంత్ తన భార్యను ఆమె ప్రియుడైన ఉపేంద్రకు ఇచ్చి పెళ్లి చేస్తాడు. అచ్చం ఇదే స్టోరీ మళ్లీ రిపీట్ అయ్యింది. ఓ వ్యక్తి తొలుత ఒక అమ్మాయిని పెళ్లి చేసుకున్నాడు. అయితే ఆమె అప్పటికే ఇంకో వ్యక్తిని ప్రేమించింది. ఈ విషయం భర్త వద్ద దాచి పెట్టింది. భర్త లేని సమయంలో ప్రియుడిని కలిసేందుకు అతని ఇంటికి వెళ్లింది. అది చూసిన స్థానికులు వారిద్దరినీ కట్టేసి కొట్టారు. విషయం తెలిసి అక్కడికి వెళ్లిన భర్త వారిద్దరికీ పెళ్లి చేశాడు. దీంతో అక్కడ ఉన్న వారంతా అవాక్కయ్యారు.

ఈ ఘటన బిహార్‌లోని నవాడ జిల్లాలో జరిగింది. నవాడ జిల్లాలోని ఓ గ్రామానికి చెందిన వ్యక్తికి పెళ్లయింది. అయితే అదే ప్రాంతానికి చెందిన మరో వ్యక్తిని ఆమె ప్రేమించింది. ఒక రోజు పని మీద బయటకు వెళ్లిన ఆ భర్త.. రాత్రికి ఇంటికి రాలేదు. దీంతో అదే అదనుగా భావించిన అతని భార్య ప్రియుడి ఇంటికి వెళ్లింది. అది గమనించిన ప్రియుడి బంధువులు, స్థానికులు వారిద్దరినీ రెడ్ హ్యాండెడ్‌గా పట్టుకున్నారు. అనంతరం వారిని తీసుకువచ్చి చెట్టుకు కట్టేసి బాగా కొట్టారు. మరుసటి రోజు ఉదయం గ్రామ పెద్దలంతా కలిసి ఊరిలో పంచాయతీ పెట్టారు. వారిద్దరినీ ఊరి నుంచి బహిష్కరించాలని నిర్ణయించారు. అయితే ఈ విషయం తెలిసి ఇంటికి తిరిగి వచ్చిన భర్త.. వారిద్దరినీ తీసుకుని నేరుగా గుడికి తీసుకువెళ్లాడు. అనంతరం వారి చేత దండలు మార్పించి.. పెళ్లి చేయించాడు. దీంతో ఆ గ్రామస్థులు మొత్తం ఆశ్చర్యపోయారు. వారిలో కొంత మంది ఆ భర్త చేసిన పనికి అతడిని తీవ్రంగా తిట్టారు. అయితే ఈ ఘటనకు సంబంధించిన వీడియో సోషల్ మీడియాలో వైరల్‌గా మారింది.

అయితే భర్త భార్యకు పెళ్లి చేసిన ఘటనపై స్థానిక పోలీసులు స్పందించారు. ఈ వివాహంపై ఇప్పటి వరకు ఎవరూ తమ వద్ద ఫిర్యాదు చేయదని వెల్లడించారు. అయితే ఆమె ప్రియుడికి గతంలోనే మరో యువతితో పెళ్లి జరిగిందని స్థానికులు చెబుతున్నారు. వారికి ముగ్గురు పిల్లలు కూడా ఉన్నారని పేర్కొన్నారు. ఈ వీడియో కాస్త సోషల్ మీడియాలో వైరల్‌గా మారడంతో నెటిజన్లు భిన్నంగా స్పందిస్తున్నారు. ఒకరేమో ప్రియుడు, ప్రియురాలికి పెళ్లి చేసి ఆదర్శంగా నిలిచాడని భర్తను పొగుడుతున్నారు. మరికొందరేమో ఆ భర్త చేసిన పనికి విమర్శలు గుప్పిస్తున్నారు.