లోకో పైలట్ అప్రమత్తతో తప్పిన మరో ప్రమాదం

జూన్ 2 వ తేదీన ఒడిశాలోని బాలాసోర్‌లో కోరమాండల్ ఎక్స్‌ప్రెస్ రైలుకు జరిగిన ప్రమాదాన్ని దేశ ప్రజలు ఇంకా మరిచిపోలేకపోతున్నారు. ఆ తర్వాత చిన్న చిన్న ఘటనలు జరిగినా ప్రయాణికులు వణికి పోతున్నారు. కోరమాండల్ ఎక్స్‌ప్రెస్ రైలు ప్రమాదం తర్వాత రైల్వేల భద్రత, సిబ్బంది అప్రమత్తతపై తీవ్ర అనుమానాలు, ప్రశ్నలు రేకెత్తాయి. ఈ నేపథ్యంలోనే శుక్రవారం తెల్లవారుజామున ఓ రైలుకు పెద్ద ప్రమాదం తప్పింది. లోకో పైలట్ అప్రమత్తతో అందులో ఉన్న ప్రయాణికులు సురక్షితంగా బయట పడ్డారు. దీంతో వారంతా ఊపిరి పీల్చుకున్నారు.

ముంబయి నుంచి సికింద్రాబాద్‌ వస్తున్న దేవగిరి ఎక్స్‌ప్రెస్‌ రైలు లోకో పైలట్ అప్రమత్తతతో పెను ప్రమాదం నుంచి బయట పడింది. మహారాష్ట్రలోని జల్నా జిల్లాలో ఈ ఘటన చోటు చేసుకుంది. శుక్రవారం తెల్లవారుజామున 4 గంటలకు ఈ దేవగిరి ఎక్స్‌ప్రెస్ సతోనా - ఉస్మాన్‌పుర్‌ స్టేషన్ల మధ్య ప్రయాణిస్తుండగా.. లోకో పైలట్‌కు రైలు పట్టాలపై ఏదో ఉన్నట్లు కనిపించింది. దీంతో వెంటనే ఆ లోకో పైలట్ రైలుకు ఎమర్జెన్సీ బ్రేకులు వేశాడు. దీంతో రైలు ఆగిపోయింది. కిందికి దిగి చూడగా.. పట్టాలపై ఒక డ్రమ్ము కనిపింది. దాని నిండా రాళ్లు ఉండటంతో పెద్ద ప్రమాదం తప్పిందని రైలు సిబ్బందితోపాటు ప్రయాణికులు ఊపిరి పీల్చుకున్నారు.

రైలు పట్టాలపై రాళ్లతో నిండిన డ్రమ్మును గుర్తించిన లోకో పైలట్ వెంటనే రైల్వే భద్రతా సిబ్బంది (ఆర్‌పీఎఫ్‌), రైల్వే ఉన్నతాధికారులకు సమాచారం అందించాడు. వెంటనే ఘటనాస్థలికి చేరుకున్న ఆర్‌పీఎఫ్‌ సిబ్బంది రాళ్లతో నిండిన డ్రమ్మును పట్టాల మీద నుంచి పక్కకు తొలగించారు. అనంతరం ఆ దేవగిరి ఎక్స్‌ప్రెస్ సికింద్రాబాద్‌కు బయల్దేరింది. ఈ ఘటనను సీరియస్‌గా తీసుకున్న రైల్వే పోలీసులు కేసు నమోదు చేశారు. అయితే ఇప్పటివరకు ఈ ఘటనకు కారణం ఎవరనేది గుర్తించలేదని తెలిపారు.

మరోవైపు.. శుక్రవారం ఉదయం మరో రైలుకు కూడా ప్రమాదం జరిగింది. హావ్‌డా నుంచి సికింద్రాబాద్‌ వస్తున్న ఫలక్‌నుమా ఎక్స్‌ప్రెస్‌లో షార్ట్‌సర్క్యూట్‌ కారణంగా మంటలు చెలరేగాయి. దీంతో ఫలక్‌నుమా ఎక్స్‌ప్రెస్‌లోని 7 బోగీలు కాలి బూడిదయ్యాయి. అయితే రైల్లో మంటలు చెలరిగినట్లు గుర్తించిన ప్రయాణికులు వెంటనే చైన్ లాగడంతో పెను ప్రమాదం తప్పింది. ఇటీవల ఒడిశాలోని బాలాసోర్‌ వద్ద జరిగిన ఘోర రైలు ప్రమాదం తెలిసిందే. కోరమాండల్ ఎక్స్‌ప్రెస్ సహా 3 రైళ్లు ఢీకొన్న ఘటనలో 290 మందికి పైగా ప్రాణాలు కోల్పోయారు. వారిలో కొంత మంది మృతదేహాలు ఇప్పటికీ భువనేశ్వర్ ఎయిమ్స్‌లోనే ఉన్నాయి.