విదేశాలకు బిజినెస్ క్లాస్‌లో వీధి కుక్కలు

బిజినెస్ క్లాస్ టిక్కెట్‌తో దేశం నుంచి వీధి కుక్కలు విమానంలో విదేశాలకు వెళ్లనున్నాయి. పంజాబ్‌లోని అమృత్‌సర్‌కు చెందిన రెండు వీధి కుక్కలు జులై 15న కెనడాకు బయలుదేరుతాయి. ఈ మేరకు ప్రత్యేక నిబంధనలను అనుసరిస్తూ పాస్‌పోర్టుల వంటి అన్ని ప్రక్రియలను అధికారులు పూర్తి చేశారు. జంతు ప్రేమికురాలు డాక్టర్‌ నవ్‌నీత్‌ కౌర్‌.. 2020లో కోవిడ్ లాక్‌డౌన్‌ సమయంలో అమృత్‌సర్‌ కేంద్రంగా ‘యానిమల్‌ వెల్ఫేర్‌ అండ్‌ కేర్‌ సొసైటీ’ అనే స్వచ్ఛంద సంస్థను ప్రారంభించారు.

ఈ సంస్థ ద్వారా గాయపడిన వీధికుక్కలకు చికిత్స, వాటికి ఆహారం అందజేయడంతో పాటు వాటిని ఎవరైనా దత్తత తీసుకోవడాన్ని ప్రోత్సహిస్తున్నారు. ఈ క్రమంలో కెనడాకు చెందిన బ్రెండా అనే మహిళ.. తాను రెండు వీధి కుక్కలను దత్తత తీసుకోవడానికి ముందుకొచ్చారు. నవ్‌నీత్‌ కౌర్‌ను ఆమె సంప్రదించడంతో వీధి కుక్కలను పంపడానికి ఆ సంస్థ సమ్మతి తెలిపింది. ‘డైసీ, లిల్లీ అనే రెండు ఆడ కుక్కలను బ్రెండా వద్దకు పంపనున్నాం. విమానంలో వీటికి రెండు బిజినెస్‌ క్లాస్‌ టికెట్లు కూడా బుక్‌ చేశాం’ అని వెల్లడించారు.

‘అమృత్‌సర్‌‌లో నేను ఓ ఎన్‌జీఓను ప్రారంభించాను.. దీని ద్వారా నగరంలోని గాయపడిన వీధి కుక్కలకు చికిత్స.. ఆహారం వంటివి అందజేస్తున్నాం.. భారత్ నుంచి రెండు వీధి కుక్కలు కెనడాకు వెళ్లనున్నాయి.. కుక్కలతో నా అనుబంధం గురించి తెలిసిన బ్రెండా అనే మహిళ కూడా వీటిని దత్తత తీసుకుంటానని ముందుకొచ్చారు.. ఆమె కోరికను నెరవేర్చడానికి డైసీ, లిల్లీ అనే రెండు ఆడ కుక్కలను జులై 15న కెనడాకు పంపుతున్నాను.. ప్రయాణానికి సంబంధించిన ప్రక్రియ అంతా పూర్తయ్యింది..’ అని డాక్టర్ నవనీత్ కౌర్ పేర్కొన్నారు.