రోజు రోజుకూ కొండెక్కి టమాట ధరలు,,,మొబైల్ కొంటే ఫ్రీగా టమాటా ఇస్తోన్న వ్యాపారి
national | Suryaa Desk | Published : Sun, Jul 09, 2023, 09:08 PM
దేశ వ్యాప్తంగా టమాటా ధరలు భగ్గుమంటున్నాయి. గత రెండు వారాలుగా రాకెట్ వేగంతో పెరుగుతున్న టమాటా ధరలు చూసి జనం బెంబేలెత్తిపోతున్నారు. ఇప్పటికే సామాన్యుల వంటింటి నుంచి టమాటా మాయవవుతోంది. ప్రస్తుతం కిలో టమాటా ధర రూ.150 దాటేసింది. టమాటా ధరలపై సోషల్ మీడియాలో ఏ రేంజ్లో జోకులు, సెటెర్లు పేలుతున్నాయి. టమాటను బంగారం, వజ్రాలతో పోల్చుతూ ఛలోక్తులు చక్కర్లు కొడుతున్నాయి. ఈ నేపథ్యంలో ఓ మొబైల్ షాప్ యజమాని టమాటా ధరలను తనకు అనుకూలంగా మలచుకున్నాడు.
మధ్యప్రదేశ్ లోని అశోక్ నగర్కు చెందిన అశోక్ అగర్వాల్ అనే మొబైల్ షాప్ ఓనర్ టమాటాలను తన వ్యాపారానికి వాడుకుంటున్నాడు. తన దుకాణంలో స్మార్ట్ ఫోన్ కొనుగోలు చేస్తే 2 కిలోల టమాటాలు ఉచితంగా ఇస్తానని ఆఫర్ ప్రకటించాడు. ఆ మేరకు ఫ్లెక్సీలు ఏర్పాటు చేసి ప్రచారం చేస్తున్నాడు. ఈ ప్రకటన ప్రస్తుతం సోషల్ మీడియా వైరల్గా మారింది.
ఈ ప్రకటన అతడి వ్యాపారానికి బాగా కలిసొచ్చినట్టే ఉంది. ఆ దుకాణానికి మొబైల్ కొనుగోలు చేయడానికి జనం క్యూ కడుతున్నారు. షాప్లో మొబైల్స్ కొనుగోలు చేసి, రెండేసి కేజీలు టమాటాలు ఉచితంగా అందుకుంటున్నారు. టమాటాలు ఫ్రీ అని ప్రకటించిన తర్వాత తన దుకాణంలో మొబైల్ అమ్మకాలు పెరిగాయని అశోక్ చెప్పడం గమనార్హం. అటు, ధరలు మండిపోతున్న ఈ సమయంలో తమకు ఉచితంగా రెండు కిలోల టమాటాలు ఇస్తుండటంతో కస్టమర్లు కూడా చాలా సంతోషిస్తున్నారు. ఏదైమైనా ఆశోక్ అగర్వాల్ ప్రకటన సోషల్ మీడియాలో చర్చనీయాంశంగా మారింది. అతడి స్ట్రాటజీపై నెటిజన్లు తమదైన శైలిలో ఫన్నీ కామెంట్లు చేస్తున్నారు.
|
|