పార్కింగ్ నుంచి కారు బయటకు తీసే ప్రయత్నం,,,ఊహించని విధంగా పాప మీదుగా దూసుకెళ్లిన వాహనం

ప్రమాదవశాత్తూ తల్లి నడుపుతున్న కారు కింద పడి 13 నెలల చిన్నారి ప్రాణాలు కోల్పోయింది. అత్యంత విషాదకర ఈ ఘటన అమెరికాలోని ఆరిజోనా రాష్ట్రంలో గత గురువారం చోటుచేసుకుంది. యవపై కౌంటీ షెరిఫ్ ఆఫీసుకు జులై 6న ఓ మహిళ నుంచి ఫోన్ కాల్ వచ్చింది. కారు కింద పడి తన 13 నెలల పాపకు గాయాలైనట్టు సమాచారం ఇచ్చింది. జాఫ్రియా థోర్న్‌బర్గ్ అనే మహిళ తన ఇంటి పక్క ఉన్న ఇరుకైన ప్రదేశంలో నిలిపి ఉన్న కారును బయటకు తీస్తోంది. ఈ క్రమంలో తన కుమార్తెను సురక్షితమైన దూరంలో ఉంచినట్లు భావించినట్లు పోలీసులకు తెలిపింది.

‘వాహనాన్ని రీపొజిషన్ చేస్తున్నప్పుడు.. కారు ముందు భాగం ఓ చెట్టుకు తగిలింది.. దీంతో యాక్సిలేటర్ పెంచి కారు వెనక్కి తీసేసరికి వేగంగా వచ్చిన వాహనం చిన్నారి మీది నుంచి దూసుకెళ్లింది. దీంతో చిన్నారికి తీవ్ర గాయాలయ్యాయి.. వెంటనే ఆమె పోలీసులకు సమాచారం ఇచ్చారు.. శిశువుకు తీవ్రమైన గాయాలు కావడంతో ఆస్పత్రికి తరలించారు.. వైద్య సిబ్బంది శిశువు ప్రాణాలు కాపాడేందుకు చేసిన ప్రయత్నాలు ఫలించలేదు.. వెర్డే వ్యాలీ మెడికల్ సెంటర్‌లో చిన్నారి మరణించింది’ అని షెరిఫ్ కౌంటీ పేర్కొంది.

ఈ ఘటనపై అధికారులు విచారణ చేపట్టారు. అయితే, తల్లిపై చర్యలు తీసుకున్నట్టు ఇప్పటి వరకూ తెలియరాలేదు. మృతి చెందిన ఆ చిన్నారిన 13 నెలల సైరా రోజ్ థోమింగ్‌గా గుర్తించారు. పాప కోసం ‘గో ఫండ్ మీ’ను ఆమె మేనమామ ఏర్పాటు చేశారు. ‘తనను కలిసిన ప్రతి ఒక్కరికీ చిరునవ్వులు తెచ్చే ప్రపంచంలో ఒక వెలుగు’ అని ఆ చిన్నారి గురించి అభివర్ణించారు.

‘సైరా రోజ్ థోమింగ్ ప్రపంచంలో ఒక వెలుగు.. ఆమె తనను కలిసిన ప్రతి ఒక్కరికీ చిరునవ్వులు పంచింది.. మే 16 2022న జన్మించింది.. జులై 6, 2023న భయంకరమైన కారు ప్రమాదం వల్ల మరణించింది. ఈ కొద్దిపాటి, అందమైన జీవితంలో బయట తిరగడం, ప్రకృతి, తన కుటుంబం, జంతువులు, నీటితో ఆడుకోవడం సైరాకు చాలా ఇష్టం. ఆమెతో ఒక్క క్షణం గడిపిన తర్వాత నవ్వని వారు ఉండరు’ అని అతడు ఆవేదన వ్యక్తం చేశారు.