ఉబర్ బిల్లు చూసి షాక్ అయిన జంట,,,,2 కిలోమీటర్లకు రూ.24 లక్షల ఛార్జ్ చేసిన ఉబర్

ఎవరైనా పెళ్లి రోజు అంటే ఏం చేస్తారు. ఏదైనా ఇష్టమైన ప్రదేశానికి వెళ్తారు. ఇష్టమైన భోజనం చేసి ఆ రోజు మధురంగా ఉండాలని రకరకాల ప్లాన్లు వేసుకుంటారు. ఇదే విధంగా ఓ జంట కూడా తమ మ్యారేజ్ డే రోజును సంతోషంగా గడపాలని భావించింది. కానీ వారికి పెద్ద షాక్ తగిలింది. ఎందుకంటే వారు ఉబర్ టాక్సీని బుక్ చేసుకుని అందులో ప్రయాణించగా.. అందుకు వచ్చిన బిల్లును చూసి వారు ఖంగుతిన్నారు. ఎందుకంటే వారి 2 కిలోమీటర్ల ప్రయాణానికి ఉబర్ సంస్థ ఏకంగా రూ. 24 లక్షల ఛార్జ్ చేసింది. దీంతో వారికి ఏం చేయాలో అర్థం కాక.. ఆ సంస్థను సంప్రదించారు. ఈ ఘటన అమెరికాలో జరిగింది.

సెంట్రల్ అమెరికాలోని గ్వాటెమాలాకు చెందిన డగ్లస్ ఆర్డోనెజ్, డొమినిక్ ఆడమ్స్ అనే దంపతులు తమ ఐదో వివాహ వార్షికోత్సవాన్ని ఘనంగా జరుపుకోవాలని భావించారు. అందుకోసం కోస్టారికా దేశానికి వెళ్లారు. అక్కడ ఒక ఉబర్ టాక్సీని బుక్ చేసుకున్నారు. తర్వాత కొద్ది దూరం ప్రయాణించి దిగిపోయారు. అక్కడివరకు బాగానే ఉంది. ఆ తర్వాతే అసలు ట్విస్ట్ ప్రారంభమైంది. వారి ఉబర్ అకౌంట్‌కు క్రెడిట్ కార్డు లింక్ చేసి ఉండటంతో ఆటోమెటిక్ పేమెంట్ అయింది. తర్వాత ఓ హోటల్‌కు వెళ్లి ఇష్టమైన భోజనం చేశారు. బిల్లు కట్టే సమయంలో వారి క్రెడిట్ కార్డు పనిచేయలేదు. ఎందుకంటే అందులో ఉన్న లక్షల రూపాయల లిమిట్ అయిపోయి.. నెగటివ్ బ్యాలెన్స్ చూపెట్టింది. అది చూసి ఆ దంపతులు షాక్ అయ్యారు. ఎందుకంటే ఆ క్రెడిట్ కార్డులో ఉన్న డబ్బులన్నీ ఉబర్ సంస్థ కట్ చేసుకుంది. కొద్ది దూరం ప్రయాణించినందుకే 29,994 డాలర్లు అంటే మన కరెన్సీలో రూ. 24 లక్షలను కట్ చేసింది. దీంతో వారు ఉబర్ సంస్థకు ఫిర్యాదు చేశారు.

అయితే ఈ ఘటనపై ఫిర్యాదును స్వీకరించిన ఉబర్ సంస్థ.. అంత డబ్బులు కట్ కావడానికి కారణాన్ని వెతికి పట్టుకుంది. అయితే కరెన్సీ కన్వర్షన్‌లో ఏర్పడిన ఒక సాంకేతిక సమస్య కారణంగా వారికి అంత బిల్లు వచ్చిందని గుర్తించింది. వారు ప్రయాణించిన దూరానికి టాక్సీ బిల్లు కేవలం 55 డాలర్లు అంటే మన కరెన్సీలో రూ. 4500 బిల్లు కాగా.. ఉబర్ సంస్థ టెక్నికల్ ఎర్రర్‌తో అది రూ.24 లక్షలుగా చూపించింది. అయితే వారు కట్టాల్సిన బిల్లు కోస్టారికా కోలన్స్‌లలో కాకుండా అమెరికన్ డాలర్లలో కట్ కావడం వల్లే ఈ తప్పిదం జరిగిందని ఉబర్ గుర్తించింది. జరిగిన సంఘటనపై ఆ దంపతులకు ఉబర్ సంస్థ క్షమాపణలు చెప్పింది. ఉబర్ చేసిన చిన్న తప్పిదం కారణంగా తమ మ్యారేజ్ డే మొత్తం చెడిపోయిందని వారు వాపోయారు.

తమ అకౌంట్ నుంచి కట్ అయిన డబ్బులు ఎట్టకేలకు వారికి మళ్లీ చేరాయి. దీనికోసం 4 రోజుల సమయం పట్టినట్లు డగ్లస్ ఆర్డోనెజ్ వెల్లడించారు. చివరికి మొత్తం రూ. 24 లక్షల నుంచి రూ. 29 వేలను కట్ చేసుకుని మిగిలిన డబ్బులను తిరిగి తన అకౌంట్‌లో వేసినట్లు డగ్లస్ ట్విటర్ వేదికగా తన ఆవేదనను వ్యక్తం చేశాడు