సముద్రంలో గల్లంతైన 3 వలసదారుల పడవలు

సముద్రంలో పడవ మిస్సింగ్. ఇలా చాలా ఘటనలు తరచూ వింటూనే ఉంటాం. ఇక వలసదారులు అక్రమంగా పడవలు ప్రయాణిస్తూ జల సమాధి అయిన ఘటనలు జరుగుతూనే ఉన్నాయి. ముఖ్యంగా ఆఫ్రికా ఖండంలోని వివిధ దేశాల ప్రజలు సముద్ర మార్గంలో అతి ప్రమాదకరమైన రీతిలో ప్రయాణిస్తూ గల్లంతు కావడం, పడవ బోల్తా పడిన ఘటనలు ఎన్నో విన్నాం. తాజాగా అట్లాంటిక్ మహా సముద్రంలో ఒకవైపు నుంచి బయల్దేరిన 3 పడవలు సముద్రంలోనే గల్లంతయ్యాయి. అందులో 300 మంది వలసదారులు ఉన్నట్లు అధికారులు వెల్లడించారు.

ఆఫ్రికా ఖండంలోని సెనెగల్‌ నుంచి స్పెయిన్‌కు చెందిన కానరీ దీవులకు అట్లాంటిక్ మహాసముద్రంలో వలసదారులు బయల్దేరారు. మొత్తం 3 పడవల్లో 300 మంది ప్రయాణం ప్రారంభించారు. అందులో ఒక బోటులో 200 మంది, మిగిలిన రెండు బోటుల్లో కలిపి మరో వంద మంది ప్రయాణం చేశారు. అయితే ఈ 3 పడవలు కనిపించకుండా పోవడం ప్రస్తుతం తీవ్ర చర్చనీయాంశంగా మారింది. సెనెగల్ నుంచి దాదాపు 1700 కిలోమీటర్ల దూరంలో ఉన్న కానరీ దీవులకు.. మొత్తం 300 మంది వలసజీవులు వెళ్లినట్లు వలసదారుల హక్కుల సంస్థ వాకింగ్ బోర్డర్స్ తెలిపింది. దాదాపు 2 వారాల క్రితం సెనెగల్ నుంచి ప్రారంభమైన ఈ 3 పడవలు మార్గమధ్యలో తప్పిపోయాయని గుర్తించారు. ఆ వలసదారుల్లో చాలా మంది మహిళలు, చిన్నారులు, వృద్ధులు ఉన్నట్లు తెలుస్తోంది. ఈ ఘటనపై వెంటనే స్పెయిన్‌, సెనెగల్ అధికారులు సహాయక చర్యలు ప్రారంభించాలని వలసదారుల హక్కుల సంస్థలు డిమాండ్‌ చేస్తున్నాయి. దీంతో కానరీ దీవుల సమీపంలో స్పెయిన్‌ అధికారులు గాలింపు చేపట్టారు. ఈ కానరీ దీవులకు గత కొన్నేళ్ల నుంచి ఎక్కువగా వలసదారులు వస్తున్నట్లు అధికారులు గుర్తించారు. ఈ జనవరి నుంచి జూన్ వరకు మొదటి 6 నెలల్లోనే 7 వేల మందికిపైగా వలస దారులు ఈ కానరీ దీవులకు వచ్చినట్లు గణాంకాలు చెబుతున్నాయి. ముఖ్యంగా మారటేనియా, మొరాకో, పశ్చిమ సహారా, సెనెగల్‌ దేశాల నుంచి ఎక్కువగా వలసదారులు వస్తున్నట్లు సమాచారం.

తాజా ఘటన నేపథ్యంలో కొత్త కొత్త విషయాలు వెలుగులోకి వస్తున్నాయి. పశ్చిమ ఆఫ్రికా నుంచి కానరీ దీవులకు వెళ్లే ప్రయాణం అత్యంత ప్రమాదకరమైందని పలు నివేదికలు వెల్లడిస్తున్నాయి. అట్లాంటిక్‌ మహా సముుద్రంలో వచ్చే భీకర అలల ధాటికి చిన్న చిన్న పడవలు తట్టుకోవడం చాలా కష్టమని చెబుతున్నాయి. ఈ ఏడాది జనవరి నుంచి ఇప్పటి వరకు గత 6 నెలల్లోనే ఈ మార్గంలో దాదాపు 800 మంది చనిపోవడం లేదా తప్పిపోవడం జరిగిందని తెలుపుతున్నాయి. గతంలో వాయువ్య ఆఫ్రికా నుంచి కానరీ దీవులకు వెళ్లే క్రమంలో దాదాపు 7 వలసదారుల పడవలు.. కరేబియన్ దీవులు, బ్రెజిల్‌ దేశాలకు కొట్టుకుపోయాయని వెల్లడించింది. ఆ దేశాల్లో ఉన్న పరిస్థితుల కారణంగానే ప్రజలు ప్రాణాలకు తెగించి ఇలాంటి సాహసాలకు పాల్పడుతూ దేశం దాటుతున్నట్లు కొన్ని నివేదికలు చెబుతున్నాయి. ఆర్థిక సంక్షోభం, నిరుద్యోగం, హింసాత్మక ఘటనలు, రాజకీయాల్లో సంక్షోభాలు, వాతావరణ మార్పులతో దిక్కుతోచని ప్రజలు విదేశాలకు శరణార్థులుగా వెళ్లడానికి కారణమవుతున్నట్లు తెలుస్తోంది.

గ్రీస్‌లో ఇటీవల ఓ భారీ ప్రమాదం చోటు చేసుకుంది. అక్రమ వలసదారులను తీసుకెళ్తున్న ఓ బోటు సముద్రంలో మునిగిపోయింది. ఈ దుర్ఘటనలో 80 మందికి పైగా దుర్మరణం పాలయ్యారు. దాదాపు 500 మంది ఆచూకీ గల్లంతైంది. ఈ మహా విషాదం మరువకముందే.. తాజాగా అట్లాంటిక్‌ మహాసముద్రంలో మరో 3 పడవలు ఆచూకీ లభ్యం కాకపోవడం తీవ్ర కలవరపాటుకు గురిచేస్తోంది.