మా అమ్మ కట్టెల పొయ్యిపై పడ్డ కష్టాలెన్నో చూశా.. చంద్రబాబు భావోద్వేగం

ముఖ్యమంత్రి వైఎస్ జగన్మోహన్ రెడ్డి పరిపాలనపై టీడీపీ అధినేత నారా చంద్రబాబునాయుడు ఘాటు వ్యాఖ్యలు చేశారు. టీడీపీ మినీ మేనిఫెస్టోలో మహిళల కోసం పలు హామీలు ఇచ్చామని.. భవిష్యత్తులో మరిన్ని కార్యక్రమాలు అమలు చేస్తామని చెప్పారు.  ‘పూర్‌ టు రిచ్‌’ నినాదం అర్థం చేసుకోవడం కష్టమైనా ఆచరణలో అద్భుత ఫలితాలను ఇస్తుందని తెలుగు దేశం పార్టీ అధినేత నారా చంద్రబాబునాయుడు అన్నారు. టీడీపీ మినీ మేనిఫెస్టోలోని పూర్‌ టు రిచ్‌ విధానం వినూత్నమైందని చెప్పారు. ప్రజలు, ప్రభుత్వం, ప్రైవేటు భాగస్వామ్యమే పీ- 4 విధానమని వెల్లడించారు. ఈ మేరకు బుధవారం చంద్రబాబు మీడియాతో చిట్‌చాట్‌ నిర్వహించారు. ఈ సందర్భంగా చంద్రబాబు మాట్లాడుతూ.. రాష్ట్రంలో పేదరికం ఉంది అనేది ఎంత వాస్తవమో.. సంపద సృష్టి కూడా అంతే అవసరమన్నారు. రాష్ట్రంలో పేద ప్రజలకు ఇప్పుడు రోజుకు 150 రూపాయిలు మాత్రమే వస్తోందని.. సంపద సృష్టి ద్వారా అది మార్చాలన్నదే తమ లక్ష్యమని చెప్పారు.

ఇక, టీడీపీ మినీ మేనిఫెస్టోలో మహిళలకు ఇప్పటి వరకు ప్రకటించిన నాలుగు పథకాలే కాకుండా వీలైనన్ని ఎక్కువ కార్యక్రమాలు చేసే ఆలోచన ఉందని చంద్రబాబునాయుడు తెలిపారు. వారిని వీలైనన్ని ఎక్కువ కార్యక్రమాల్లో భాగస్వామ్యం చేయడం ద్వారా కుటుంబం, సమాజం రెండూ బాగుపడేలా చూస్తామన్నారు. మహిళా శక్తి అనేది ఎప్పుడూ నిర్లక్ష్యానికి గురవుతూ వస్తోందని.. ఈ విధానం పోవాలనే మినీ మేనిఫెస్టోలో మహాశక్తి పేరిట మహిళలకు ప్రాధాన్యం కల్పించామని చంద్రబాబు వివరించారు.

కట్టెల పొయ్యిపై మా అమ్మ పడ్డ కష్టాలు ఎన్నో చూశానని చంద్రబాబు అన్నారు. మా అమ్మ కష్టాలు చూసే ఆనాడు గ్యాస్‌ స్టవ్‌లు అందించే పథకం తీసుకొచ్చామని.. పెరిగిన ధరలతో మహిళలు మళ్లీ కట్టెల పొయ్యికి పరిమితమయ్యేలా ఉన్నారని ఆందోళన వ్యక్తం చేశారు. సంపద సృష్టి ద్వారా పేదరికం పోగొట్టాలని చంద్రబాబు అన్నారు. ఇక, సంపద సృష్టించే అమరావతిని ముఖ్యమంత్రి వైఎస్ జగన్మోహన్ రెడ్డి చంపేశారని చంద్రబాబు ఆగ్రహం వ్యక్తం చేశారు. ఒకరి మూర్ఖత్వానికి, పిచ్చితనానికి రాష్ట్రం బలికావాలా అని ప్రశ్నించారు. అమరావతిని రాజధానిగా ప్రకటించకముందు అక్కడ భూమి ధరెంత? రాజధానిగా కొనసాగి ఉంటే ఎంత ఉండేదో ఎవరైనా బేరీజు వేశారా అని అన్నారు. జీవనాడి పోలవరాన్ని ముంచేస్తే ప్రజల్లో చైతన్యం ఏమైందని ప్రశ్నించారు. కృష్ణా - గోదావరి నదులతో రెండు రాష్ట్రాల్లో ప్రతి ఎకరాకు నీళ్లివ్వచ్చని చెప్పారు.

వైఎస్సార్ కాంగ్రెస్ పార్టీ నేతలు భూ కబ్జాలు, సెటిల్‌మెంట్లతో వేల కోట్ల రూపాయిలు దోచేశారని చంద్రబాబు దుయ్యబట్టారు. జగన్ పాలనలో రైతులు కోలుకోలేని దుస్థితిలో ఉన్నారని చెప్పారు. తెలంగాణలో రైతు ఆత్మహత్యలు తగ్గితే ఏపీలో పెరుగుతున్నాయని.. కౌలు రైతులు పూర్తిగా నాశనమయ్యారని ఆవేదన వ్యక్తం చేశారు. అధికారంలో ఉండగా తానేం చేశానో ప్రజలు చూశారని.. నాలుగేళ్లుగా జగన్‌ ఏం చేస్తున్నారో కూడా బేరీజు వేసుకున్నారని పేర్కొన్నారు. భవిష్యత్తుకు గ్యారెంటీతో త్వరలోనే పల్లె నిద్ర చేపడతానని చంద్రబాబు తెలిపారు.