మదనపల్లె టమాటా రైతు దారుణ హత్య,,,చేతులు, కాళ్లు కట్టేసి హతమార్చారు

ఓ వైపు టమాటా ధరలు ఆకాశాన్ని తాకాయి. కేజీ రూ.100 నుంచి 140 వరకు పలుకుతోంది. ఈ ధరలు సామాన్యుడికి భారంగా మారితే.. రైతులకు మాత్రం లాభాలు తెచ్చి పెడుతోంది. అయితే అన్నమయ్య జిల్లా మదనపల్లెలో టమాటా రైతు హత్య కలకలంరేపింది. టమాట అమ్మిన డబ్బులు ఉంటాయన్న అనుమానంతో రైతును దారుణంగా హత్య చేసి ఉంటారని అనుమానిస్తున్నారు.

మదనపల్లె మండలం బోడిమల్లదిన్నెకు చెందిన నారెం రాజశేఖర్‌రెడ్డి టమాటా రైతు. కొద్దిరోజులుగా పంటకు భారీగా డిమాండ్ రావడంతో ఊరి చివర ఉన్న పొలంలోనే నివాసం ఉంటున్నాడు. రాజశేఖర్‌రెడ్డి ఇప్పటికే ఐదు కోతలు టమాటాలు కోసి అంగళ్లులో ఉన్న మార్కెట్‌లో విక్రయించారు మంగళవారం కూడా టమాటాలను మార్కెట్‌లో దించి వచ్చారు.. రాజశేఖర్‌రెడ్డికి ఇద్దరు కుమార్తెలు ఉన్నారు.. వారిద్దరికీ వివాహం కావడంతో బెంగళూరులో నివాసం ఉంటున్నారు. భార్యభర్తలిద్దరే ఊరికి దూరంగా పొలం దగ్గర నివాసం ఉంటున్నారు.

మంగళవారం రాత్రి పాలు పోయడానికి ఊళ్లోకి వెళ్లాడు.. అయిత భర్త ఎంత సేపటికీ తిరిగి రాకపోవడంతో భార్య జ్యోతికి అనుమానం వచ్చింది. ఆమె తమ కుమార్తెలకు సమాచారం ఇచ్చింది.. వారు ఫోన్‌ చేయగా ఎవరూ ఎత్తలేదు. ఈ విషయం తెలియడంతో రాజశేఖర్‌రెడ్డి బంధువు వెతుక్కుంటూ వెళ్లారు.. దారి మధ్యలో బైక్, మొబైల్పడి ఉండటాన్ని గమనించి చుట్టుపక్కల వెతికారు. ఇంతలో చింత చెట్టు కింద చేతులు, కాళ్లు కట్టేసి రాజశేఖర్ రెడ్డి మృతదేహం కనిపించింది. వెంటనే పోలీసులకు సమాచారం ఇచ్చారు.. వారు ఘటనా స్థలానికి చేరుకుని దర్యాప్తు చేస్తున్నారు.

కొంతకాలంగా టమాటా ధరలు పెరగడంతో.. రైతు రాజశేఖర్ రెడ్డి దగ్గర డబ్బులు ఉన్నాయని భావించి.. దోచుకోవడానికి వచ్చి ఈ దారుణానికి ఒడిగట్టి ఉంటారని పోలీసులు అనుమానిస్తున్నారు. ఈ క్రమలోనే పాలు పోసి వస్తుండగా.. మార్గ మధ్యలో దుండగులు అటకాయించి పక్కనే ఉన్న చింతచెట్టు కిందకు లాక్కెళ్లి చేతులు, కాళ్లు కట్టేసి తువ్వలు మెడకు బిగించి ఊపిరాడకుండా చేసి చంపేశారని చెబుతున్నారు.

ఇదిలా ఉంటే రాజశేఖర్ రెడ్డి డబ్బులు ఇంట్లో ఉంటే భద్రత ఉండదని.. టమాటా కోతలన్నీ అయ్యాక డబ్బులు తీసుకుంటానని మండీ వ్యాపారుల దగ్గరే ఉంచినట్లు తెలుస్తోంది. అయితే ఈ ఘటనకు ముందు పొలం దగ్గర ఉన్న ఇంటికి వెళ్లిన గుర్తు తెలియని వ్యక్తులు టమాటా కాయలు కావాలని రాజశేఖర్‌రెడ్డి ఎక్కడున్నాడని ఆయన భార్య జ్యోతిని ప్రశ్నించినట్లు చెబుతున్నారు. ఆయన పాలు పోయడానికి ఊళ్లోకి వెళ్లినట్లు చెప్పడంతో అక్కడి నుంచి వారు వెళ్లిపోయారట. మొత్తం మీధ టమాటా ధరల ప్రభావం పాపం రైతును కూడా బలి తీసుకుంది.