బట్ట తలను విగ్గుతో కవర్ చేసిన పెళ్లికొడుకు,,,అసలు నిజం బయటపెట్టిన వధువు బంధువులు

తనకు బట్టతల ఉందన్న విషయం తెలియనీయకుండా విగ్గుతో మేనేజ్ చేసి.. రెండో పెళ్లి సిద్ధమయ్యాడు ఓ ప్రబుద్ధుడు. చివరి క్షణంలో అతడి బండారం బయటపడటంతో పెళ్లి మండపంలోనే యువతి కుటుంబసభ్యులు, బంధువులు అతడ్ని పట్టుకుని ఉతికి ఆరేశారు. ఇంతలో తన భర్త రెండో పెళ్లి విషయం తెలిసి భార్య అక్కడకు చేరుకుని, అతడి చెంపలు వాయించింది. ప్రస్తుతం సోషల్ మీడియాలో వైరల్ అవుతోన్న వఈ ఘటన.. బిహార్‌లోని గయ జిల్లా డోభీ పోలీస్‌స్టేషను పరిధి బజౌరా గ్రామంలో చోటుచేసుకుంది.

ఇక్బాల్ నగర్‌కు చెందిన నిందితుడికి అప్పటికే పెళ్లై భార్య ఉన్నా రెండో పెళ్లి చేసుకోవాలని నిర్ణయించుకున్నాడు. దీంతో బ్రోకర్‌ను సంప్రదించి తనకు సంబంధం చూసిపెట్టమని కోరాడు. ఇది వరకే తనకు పెళ్లైన విషయంతో పాటు బట్టతల ఉందన్న నిజాన్ని దాచిపెట్టాడు. ఈ క్రమంలో బజౌరా గ్రామానికి చెందిన యువతితో పెళ్లి ఖాయమైంది. పెళ్లిచూపులు లాంటి కార్యక్రమాల సహా పెళ్లి రోజు వరకు విగ్గు పెట్టుకొని బట్ట తల ఉందన్న విషయం బయటపడకుండా చూసుకున్నాడు. వివాహం రోజును విగ్గుతో పెళ్లిమండపానికి వచ్చాడు.

కాసేపట్లో వివాహం జరుగుతుందనగా.. అతడి జుట్టు గురించి వధువు బంధువులకు అనుమానం వచ్చింది. దగ్గరకు వెళ్లి గమనించి.. జట్టు లాగడంతో విగ్గు ఊడిపడింది. దీంతో అతడికి బట్టతల ఉందన్న విషయం బయటపడింది. అంతేకాదు, ఇది రెండో పెళ్లని తెలియడంతో వధువు కుటుంబం ఆగ్రహంతో ఊగిపోయింది. దీంతో అతడ్ని పట్టుకుని చితకబాదారు. తాను చేసింది తప్పేనని, క్షమించిన వదిలేయాలంటూ నిందితుడు వేడుకున్నాడు. ఇంతలో ఈ విషయం తెలుసుకున్న అతడి భార్య సైతం ఘటనా స్థలానికి వచ్చింది. ఈ ఘనకు సంబంధించిన దృశ్యాలను వీడియో తీసి సోషల్ మీడియాలో షేర్ చేయడంతో వైరల్‌ అయ్యింది. గ్రామపెద్దలు పంచాయితీ పెట్టి పోలీసుల వరకూ వెళ్లకుండా సమస్యను పరిష్కరించారు. ఈ ఘటనపై తమకు ఎటువంటి ఫిర్యాదు అందలేదని పోలీసులు తెలిపారు.