ఒక కుటుంబంలో ఒకేరోజు 9 మంది పుట్టినరోజు,,,,గిన్నీస్ బుక్ ఆఫ్ వరల్డ్ రికార్డ్స్‌లో చోటు

ఒక కుటుంబంలో 9 మంది పుట్టినరోజులు ఒకే రోజు వస్తాయని ఎవరైనా ఊహించగలరా. అది కూడా భార్య, భర్త.. వారి ఏడుగురు పిల్లలు ఒకే తేదీన పుట్టారు. అయితే వారు వేర్వేరు సంవత్సరాల్లో పుట్టినా.. నెల, తేదీ మాత్రం ఒకే రోజు ఉండటం విశేషం. వినడానికి కొత్తగా.. వింతగా ఉన్నప్పటికీ ఈ సంఘటన జరిగింది. అందుకే ఈ కుటుంబం గిన్నీస్ బుక్ ఆఫ్ రికార్డుల్లోకి ఎక్కింది. ఈ ఘటన పాకిస్థాన్‌లో జరిగింది. ఇక ఆ దంపతులు వివాహ బంధంతో ఒక్కటైన రోజు కూడా అదే కావడం ఇందులో మరో విశేషం.

పాకిస్థాన్‌లోని లర్కానాకు చెందిన అమీర్ అలీ కుటుంబం ఈ రికార్డును సొంతం చేసుకుంది. అమీర్ అలీతో పాటు ఆయన భార్య ఖుదేజా .. వారి ఏడుగురు పిల్లలు ఒకే తేదీన జన్మించారు. అమీర్ - ఖుదేజా దంపతుల ఆ ఏడుగురు సంతానం వయసు 19 ఏళ్ల నుంచి 30 వరకు ఉంది. ఇందులో మరో విశేషం ఏంటంటే అమీర్ - ఖుదేజా పెళ్లి రోజు కూడా అదే కావడం. అయితే వారికి పుట్టిన సంతానం.. అనుకున్న సమయానికే పుట్టారని.. ఇలా ఒకే తేదీ కోసం వారి డెలివరీని ముందుకు గానీ.. వెనక్కి గానీ మార్చలేదని వారు స్పష్టం చేశారు. ఈ అరుదైన ఘనత సాధించిన కుటుంబం గిన్నీస్ బుక్ ఆఫ్ వరల్డ్ రికార్డ్స్‌లోకి ఎక్కింది. ఇందుకు గానూ వారికి సర్టిఫికేట్ కూడా అందజేశారు. ఆ కుటుంబంలోని 9 మంది మొత్తం వివిధ సంవత్సరాల్లో ఆగస్టు 1 వ తేదీన పుట్టినట్లు తెలిపారు.

ఇలా ఒకే రోజు పుట్టిన రోజులు రావడం కోసం తాము ఎలాంటి చర్యలు తీసుకోలేదని అమీర్ అలీ వెల్లడించాడు. అయితే ఇదంతా ఆ దేవుడి దయ అని తెలిపాడు. తమ కుటుంబానికి ఈ గిన్నీస్ బుక్ ఆఫ్ వరల్డ్ రికార్డ్స్‌లో చోటు దక్కడం పట్ల దేవుడికి ఎంతో కృతజ్ఞతతో ఉన్నట్లు పేర్కొన్నాడు. అమీర్ అలీ - ఖుదేజా దంపతులకు ఉన్న ఏడుగురు సంతానంలో రెండు సార్లు కవల పిల్లలు పుట్టారని వెల్లడించారు. ప్రతీ ఆగస్టు 1 వ తేదీన తమ కుటుంబం మొత్తం ఘనంగా బర్త్ డేతోపాటు తమ పెళ్లి రోజును నిర్వహించుకుంటామని అమీర్ అలీ దంపతులు తెలిపారు. ఇక ఇప్పుడు గిన్నీస్ బుక్ ఆఫ్ వరల్డ్ రికార్డ్స్‌లో చోటు దక్కడం ఆ సంతోషాన్ని మరింత పెంచిందని.. చెప్పారు. తమ బర్త్‌ డే విషయం ఇప్పుడు అందరికీ తెలిసిపోయిందని పేర్కొన్నారు.