దాడి చేసిన చిరుతను బంధించి, బైక్ వెనుకాల తీసుకొచ్చిన యువ రైతు

ఆర్ఆర్ఆర్ సినిమాలో యంగ్ టైగర్ ఎన్టీఆర్.. పులితో పోరాడే సన్నివేశం చూసి బాగా ఎంజాయ్ చేసి ఉంటారు. కానీ, నిజ జీవితంలో పులి పేరు వింటేనే.. ఆమడదూరం పరుగెడుతాం. కానీ, కర్ణాటకలో ఓ యువ రైతు మాత్రం తనపై దాడి చేసిన చిరుతపులితో పోరాడి, దాన్ని చంపకుండా.. కాళ్లను తాళ్లతో బంధించి, తన బైక్‌ వెనుకాల కట్టుకొని.. తీసుకెళ్లి ఫార్టెస్టు అధికారులకు అందజేశాడు. జనావాసాల్లోకి వచ్చి అలజడి రేపుతున్న చిరుతను బంధించేందుకు అటవీ శాఖ సిబ్బంది నానా ప్రయత్నాలు చేస్తుండగా.. చిరుతను సింగిల్ హ్యాండ్‌తో బంధించి యువకుడు ఔరా అనిపించాడు. ఇందుకు సంబంధించిన వీడియో సోషల్ మీడియాను షేక్ చేస్తోంది. యువ రైతు తెగువను పొగుడుతూ పలువురు ప్రశంసల వర్షం కురిపిస్తున్నారు.

కర్ణాటకలోని హసన్ జిల్లా బాగివలు గ్రామానికి చెందిన వేణుగోపాల్ (25 ఏళ్లు) అలియాస్ ముత్తు రోజూ మాదిరిగానే శుక్రవారం (జూలై 14) ఉదయం తన బైక్‌పై పొలానికి వెళ్తున్నాడు. మార్గమధ్యంలో ఓ చిరుతపులి అకస్మాత్తుగా అతడిపై దాడి చేసింది. తప్పించుకునే మార్గంలేక ముత్తు ఎదురుదాడికి దిగాడు. తన బలాన్ని ప్రయోగించి ఆ చిరుతను బంధించాడు.

చిరుతను అదిమి పట్టుకున్న ముత్తు.. బైక్‌తో పాటు ఉన్న తాడును తీసి, దాని కాళ్లను కదలకుండా బంధించాడు. ఆ తర్వాత ఓ కర్ర సాయంతో దాన్ని తన బైక్ వెనుకాల వేలాడదీసి అలాగే గ్రామంలోకి వచ్చాడు. గ్రామస్థులు అతడి గాయాలకు ప్రథమ చికిత్స చేసి, అధికారులకు సమాచారం అందించారు. ఆ తర్వాత ముత్తు ఆ చిరుతపులిని అటవీ శాఖ అధికారులకు అప్పగించారు.

‘అటవీ చట్టం ప్రకారం.. వన్యప్రాణులపై దాడి చేయడం తప్పు. అయితే, ముత్తు తన ప్రాణాలను కాపాడుకునే ప్రయత్నంలో భాగంగా చిరుతపులిని గాయపరిచాడు’ అని అటవీ శాఖ అధికారి ఒకరు చెప్పారు. చిరుతపులికి చికిత్స చేసిన అనంతరం దట్టమైన అడవిలో వదిలిపెడతామని ఆయన తెలిపారు. ఆ చిరుతపులి వయస్సు 10 నెలలు ఉండవచ్చునని ఆ అధికారి చెప్పారు.