ప్లేట్ మ్యాగీ నూడుల్స్ ధర చూసి,,,అవాక్కయిన మహిళ

: మీరు ఎప్పుడైనా మ్యాగీ తిన్నారా. ఇంట్లో అయితే ఏ ఇబ్బందీ లేకుండా రెండు నిమిషాల్లో చేసుకోవచ్చు. ఓ గిన్నెలో నీళ్లను తీసుకుని వేడి చేసి.. అందులో మ్యాగీని వేస్తాం. అదే మ్యాగీ ప్యాకెట్‌లో అన్ని రకాల మసాలాలు కలిపి ఇచ్చే ప్యాకెట్‌ను కూడా కలిపి దించుకుని తినొచ్చు. అయితే ఇదంతా క్షణాల్లో జరిగిపోతుంది. దానికి పెద్ద ఖర్చు కూడా ఏం కాదు. అయితే ఏదైనా హోటల్‌కు వెళ్లినపుడు మాత్రం కొంత ఎక్కువ వెచ్చించాల్సి వస్తుంది. అయితే ఓ యూట్యూబర్ ఇలా ఓ హోటల్‌లో మ్యాగీ ఆర్డర్ చేసుకుని తిన్న తర్వాత బిల్లు చూసి షాక్ అయింది. ఎందుకంటే అందులో ఒక్క మ్యాగీకి రూ. 193 ఛార్జ్ చేశారు. ఈ ఘటనకు సంబంధించి బిల్లును సోషల్ మీడియాలో ఉంచడంతో ప్రస్తుతం వైరల్‌గా మారింది.

సేజల్ సూద్ అనే యూట్యూబర్ చేసిన ట్వీట్ ప్రస్తుతం సోషల్ మీడియాను ఊపేస్తోంది. ఎందుకంటే ఆమె ఒక ఎయిర్‌పోర్టుకు వెళ్లి అక్కడ రెస్టారెంట్‌లో ప్లేట్ మ్యాగీ నూడుల్స్ కావాలని ఆర్డర్ ఇచ్చింది. వేడి వేడి మ్యాగీ నూడుల్స్‌ను తీసుకువచ్చి వెయిటర్ సేజల్ టేబుల్ మీద పెట్టి వెళ్లాడు. ఆ మ్యాగీ నూడుల్స్ తినేసిన సేజల్.. బిల్ ఇవ్వాలని కోరింది. దీంతో వెయిటర్ తీసుకువచ్చిన బిల్ చూసి ఆమె ఒక్కసారిగా ఆశ్చర్యానికి లోనైంది. ఎందుకంటే ఆమె తిన్న ఒక్క ప్లేట్ మ్యాగీ నూడుల్స్ ఖరీదు రూ. 193. అందులో నూడుల్స్‌కు రూ. 184 కాగా.. జీఎస్టీ కింద మరో రూ. 9 వేశారు. దీంతో ఆమెకు ఏం చేయాలో అర్థం కాలేదు. దీంతో ఆ బిల్లుకు సంబంధించిన ఫొటోను ట్విటర్‌లో షేర్ చేసింది. అయితే అది ఏ ఎయిర్‌పోర్టు అన్నది మాత్రం ఆమె వెల్లడించలేదు.

దీంతో సేజల్ చేసిన పోస్ట్‌ వైరల్‌గా మారడంతో నెటిజన్లు తమదైన శైలిలో కామెంట్లతో విరుచుకుపడుతున్నారు. నిత్యావసరాల ధరలు ఆకాశాన్ని తాకడం అంటే ఇదేనేమో అని కొంతమంది ట్వీట్ చేశారు. ఎయిర్‌పోర్టులో కాబట్టి విమానాలకు వాడే ఇంధనంతో మ్యాగీ చేసి ఉంటారని పలువురు కామెంట్లు పెట్టారు. ఇలా తినే కంటే ఇంటి నుంచి ఆహార పదార్థాలు తెచ్చుకోవడం బెటర్ అని మరొకరు పేర్కొన్నారు. ప్రతి ఎయిర్‌పోర్టూలోనూ ఇదే పరిస్థితి ఉందని.. దీనిపై ఎయిర్‌పోర్ట్స్‌ అథారిటీ ఆఫ్‌ ఇండియా చర్యలు తీసుకోవాలని మరికొంతమంది విజ్ఞప్తి చేశారు. ఇక తాను ఒక బీర్‌ ఆర్డర్ చేస్తే రూ.800 వసూలు చేశారని మరో నెటిజన్ ఆవేదన వ్యక్తం చేశాడు. ఇక కొంత మంది తమకు ఎదురైన ఇలాంటి సంఘటనలకు సంబంధించిన బిల్లులతో కామెంట్లు పెట్టారు.