ప్రతిపక్ష ఐక్యత సమావేశానికి ధీటుగా ఎన్డీఏ భేటీ,,,38 పార్టీల మద్దతు ఉందని పేర్కొన్న బీజేపీ వర్గాలు

దేశంలో 2024 సార్వత్రిక ఎన్నికల వేడి రాజుకుంది. కేంద్రంలో అధికారంలో ఉన్న బీజేపీ ప్రభుత్వాన్ని వచ్చే ఏడాది జరగనున్న లోక్‌సభ ఎన్నికల్లో ఓడించాలని కంకణం కట్టుకున్న ప్రతిపక్షాలన్నీ ఒక్కతాటిపైకి వచ్చేందుకు ప్రయత్నాలు చేస్తున్నాయి. అదే సమయంలో ప్రతిపక్షాల ఐక్యతా సమావేశానికి ధీటుగా బీజేపీ వ్యూహాలు రచిస్తోంది. ఈ క్రమంలోనే 2019 తర్వాత నేషనల్ డెమోక్రటిక్ అలయన్స్ - ఎన్డీఏ మిత్ర పక్షాలను దూరం చేసుకున్న అధికార పార్టీ మరోసారి వారిని అక్కున చేర్చుకునేందుకు తీవ్ర ప్రయత్నాలు చేస్తోంది. ఇందులో భాగంగానే మంగళవారం ఢిల్లీలో ఎన్డీఏ కూటమి సమావేశాన్ని ఏర్పాటు చేసింది. అయితే ఈ ఎన్డీఏ కూటమి భేటీకి 38 పార్టీలు హాజరవుతాయని బీజేపీ వర్గాలు చెబుతున్నాయి.

లోక్‌సభ ఎన్నికలకు ఇంకా ఏడాదిలోపే సమయం ఉండటంతో విపక్షాల వ్యూహాలను బద్దలు కొట్టేలా పక్కా ప్రణాళికను బీజేపీ రచిస్తోంది. ఒకవైపు గత 9 ఏళ్లుగా నరేంద్రమోదీ ప్రభుత్వం తీసుకువచ్చిన పథకాలు, తీసుకున్న నిర్ణయాలు సహా వివిధ అంశాలను విస్తృతంగా ప్రజల్లోకి తీసుకువెళ్లే కార్యక్రమాలను దేశవ్యాప్తంగా బీజేపీ ప్రచారం చేస్తూనే ఉంది. మరోవైపు.. పొత్తులు, ఎన్డీఏ కూటమిని విస్తరించడం, ప్రతిపక్ష పార్టీలతో పాటు కొత్త పార్టీలను కూడా ఎన్డీఏలోకి ఆహ్వానించడం, గతంలో ఎన్డీఏలో ఉండి తర్వాత బయటికి వెళ్లిన వారిని కూడా మళ్లీ చేర్చుకోవడం వంటి రాజకీయ వ్యూహాలకు కూడా పదును పెడుతూనే ఉంది. ఇటీవలి కాలంలో ఎన్డీఏ కూటమి విస్తృతమవుతోందని బీజేపీ జాతీయ అధ్యక్షుడు జేపీ నడ్డా వెల్లడించారు. ప్రధాని మోదీ ప్రవేశపెట్టిన పథకాలు, తీసుకున్న సానుకూల నిర్ణయాలతో ప్రజలు బీజేపీ వైపు చూస్తున్నారని నడ్డా వ్యాఖ్యానించారు.

ఎన్డీఏలో తిరిగి చేరుతున్నట్లు సుహెల్‌దేవ్ భారతీయ సమాజ్ పార్టీ అధినేత ఓపీ రాజ్‌భర్ ప్రకటించారు. 2019 లో ఎన్డీఏ నుంచి బయటికి వచ్చిన తర్వాత ఉత్తర్‌ప్రదేశ్‌లోని తూర్పు ప్రాంతంలో ఓబీసీ ఓటర్లలో ప్రభావం చూపగలిగే సత్తా రాజ్‌భర్‌కు ఉండటంతో ఆయనను ఎన్డీఏలోకి తిరిగి చేర్చుకుంటున్నారు. అయితే 2019 తర్వాత బీజేపీని బహిరంగంగా విమర్శించే వారిలో రాజ్‌భర్ ఉండేవారు. ఇక బిహార్‌లోని ఓబీసీ నాయకుడు, లోక్‌ జనశక్తి పార్టీలో చీలిక తెచ్చిన చిరాగ్ పాశ్వాన్‌ను కూడా ఢిల్లీలో జరిగే ఎన్డీఏ సమావేశానికి జేపీ నడ్డా ఆహ్వానించారు. కేంద్ర మాజీ మంత్రి, దివంగత రామ్ విలాస్ పాశ్వాన్ కుమారుడే ఈ చిరాగా పాశ్వాన్. ఆంధ్రప్రదేశ్ నుంచి జనసేన పార్టీకి కూడా ఈ ఎన్డీఏ సమావేశంలో హాజరు కావాలని పవన్ కల్యాణ్‌కు ఆహ్వానం అందింది.