టిక్కెట్ కొన్న గంటలోనే ,,,రూ.కోటి గెలిచిన బ్యాంకు ఉద్యోగి

అదృష్టం కలిసొస్తే అన్నీ దానంతటి అవే వెతుక్కుంటూ వస్తాయి. ఓ వ్యక్తి గంటల వ్యవధిలోనే కోటీశ్వరుడయ్యాడు. ఆయన కొనుగోలు చేసిన లాటరీ టిక్కెట్‌కు రూ.కోటి లాటరీ వరించింది. మధ్యాహ్నం 12 గంటలకు లాటరీ టిక్కెట్ కొనుగోలు చేస్తే.. ఓ గంట తర్వాత ఏజెంట్ ఫోన్ చేసి మీ నెంబరుకు లాటరీ తగిలిందని చెప్పారు. ఈ ఘటన పంజాబ్‌లోని గురుదాస్‌పుర్‌ జిల్లాలో చోటుచేసుకుంది. డేరాబాబా నానక్‌ పట్టణానికి చెందిన రూపీందర్‌జిత్‌ సింగ్‌ అగ్రికల్చర్‌ డెవలప్‌మెంట్‌ బ్యాంక్‌లో క్లర్కుగా పనిచేస్తున్నాడు. ఏడాది కాలంగా రూపీందర్‌జిత్ లాటరీ టికెట్లు కొంటూ అదృష్టాన్ని పరీక్షించుకుంటున్నాడు.

ఈ నేపథ్యంలో శనివారం మధ్యాహ్నం 12 గంటలకు ఒక్కోటి రూ.6 విలువచేసే 25 నాగాలాండ్‌ లాటరీ టికెట్లను కొనుగోలు చేశాడు. తర్వాత బ్యాంకు పనిలో నిమగ్నమైపోయిన రూపీందర్‌‌జిత్‌కు గంట సేపటి తర్వాత లాటరీ ఏజెంట్ ఫోన్ చేసి. ‘మీరు రూ.కోటి గెలుచుకున్నారు’ చెప్పాడు. అయితే, ఇది కలా? నిజమా? అనుకుని క్షణం పాటు అతడికి నమ్మకం కుదరలేదు. చివరకు లాటరీలో విజేతగా నిలిచినట్టు నిర్దారించుకున్నాడు. ఈ విషయం తెలిసిన బ్యాంకు సిబ్బంది రూపీందర్‌జిత్‌ను చుట్టుముట్టి అభినందనలు తెలిపారు. కుటుంబసభ్యులు, బంధువులు, స్నేహితులు కూడా ఫోన్ చేసి.. అభినందించారు.

ఇదంతా చూస్తుంటే తన కల నిజమైనట్లుగా ఉందని రూపీందర్‌జిత్‌ సంతోషం వ్యక్తం చేశాడు. తన అలవాటే తనను ఇలా కోటీశ్వరుడిని చేసిందని, తన పిల్లలు, కుటుంబ భవిష్యత్తు కోసం, పేదల కోసం ఈ డబ్బు ఖర్చు చేస్తానని తెలిపాడు. రూపీందర్‌జిత్ లాటరీ గెలవడంతో లాటరీ ప్రియుల్లో డేరా బాబా నానక్‌ పట్టణం పేరు మరోసారి మారుమోగింది. ఇంతకుముందు ఈ ప్రాంతానికి చెందిన కిరాణా దుకాణం యజమాని లాటరీలో రూ.2.5 కోట్లు గెలుపొందాడు.