భర్త నాలుకను కొరికేసిన భార్య ,,, బాధితుడికి ఆస్పత్రిలో చికిత్స

భర్త ముద్దు పెట్టుకుందామని ప్రయత్నిస్తే.. భార్య రివర్స్‌లో ట్విస్ట్ ఇచ్చింది. కర్నూలు జిల్లాలో  తుగ్గలి మండలం ఎల్లం గుట్ట తండాలో జరిగింది ఈ ఘటన. గుంటూరు జిల్లాకు చెందిన తారాచంద్ నాయక్‌.. కర్నూలు జిల్లా తుగ్గలి మండలం చెందిన పుష్పవతిలు ప్రేమించుకున్నారు. ఇద్దరు పెళ్లి చేసుకోవాలని నిశ్చయించుకుని 2015లో ప్రేమ వివాహం చేసుకున్నారు. వీరికి ఇద్దరు సంతానం ఉన్నారు.. వీరి కాపురం సజావుగా సాగింది.

గత రెండేళ్లగా భార్యాభర్తలిద్దరు తరచుగా గొడవపడుతున్నారు. శుక్రవారం ఉదయం భార్యాభర్తల మధ్య గొడవ జరిగింది. ఈ క్రమంలో ఏం జరిగిందో ఏమో భార్య ఒక్కసారిగా భర్త దగ్గరకు వెళ్లి నాలుకను కొరికేసింది. తారాచంద్ నాయక్ తీవ్రంగా గాయపడగా.. వెంటనే చికిత్స నిమిత్తం గుత్తి ఆసుపత్రికి వచ్చారు. పరీక్షించిన వైద్యులు మెరుగైన వైద్యం కోసం అనంతపురం తరలించారు. ఈ ఘటనపై జొన్నగిరి పోలీసులు దర్యాప్తు చేస్తున్నారు.

తన భార్యను దగ్గరకు తీసుకునేందుకు ప్రయత్నిస్తే.. ఇలా నాలుక కొరికేసినట్లు భర్త తారాచంద్ నాయక్ ఆరోపించారు. భార్య ప్రవర్తన కొంతకాలంగా సరిగా లేదని.. అదే ఊరిలో మరో వ్యక్తితో సన్నిహితంగా ఉందని చెప్పుకొచ్చాడు. తన భార్య నుంచి ప్రాణహాని ఉందని.. తనను చంపేస్తుందేమోనని భయంగా ఉందన్నాడు. తన భార్యను చాలా బాగా చూసుకుంటున్నానని.. షాపులో పనిచేస్తూ నెలకాగానే జీతం డబ్బులు భార్యకే తెచ్చి ఇస్తున్నట్లు చెబుతున్నాడు.

అవసరమైన సమయంలో తన తండ్రి కూడా నెలకు సరిపడా డబ్బులు వేస్తున్నాడని చెప్పుకొచ్చాడు. తన భార్య ఇలా చేయడం బాధగా ఉందని కన్నీళ్లు పెట్టుకున్నాడు.. తన పిల్లల పరిస్థితి ఏంటంటూ ఆవేదన వ్యక్తం చేశాడు. తనకు న్యాయం చేయాలని కోరుతున్నాడు తారాచంద్ నాయక్. అయితే భర్త తారాచంద్ తనపై దాడి చేసి తనకు ఇష్టం లేకుండా బలవంతంగా ముద్దు పెట్టేందుకు వచ్చినందుకే ఇలా జరిగిందని భార్య పుష్పవతి అంటున్నారు. ఆమె కూడా జొన్నగిరి పోలీసులకు ఫిర్యాదు చేశారు.

బాధితుడు కూడా పోలీసులకు ఫిర్యాదు చేస్తానని చెబుతున్నాడు. భార్యాభర్తల మధ్య గొడవల విషయంలో ఇలా జరిగిందా.. లేక తారాచంద్ భార్యను బలవంతంగా ముద్దు పెట్టుకునే క్రమంలో జరిగిందా అన్నది క్లారిటీ లేదు. ఈ ఇద్దరి వాదనల్లో ఎవరిది నిజమన్నది తేలాల్సి ఉంది. భార్యాభర్తలన్న తర్వాత చిన్న, చిన్న గొడవలు మామూలే.. కానీ ఇలా నాలుక కొరికన ఘటన మాత్రం స్థానికంగా చర్చనీయాంశమైంది.