బైక్‌పై దాడిచేసిన ఎద్దు,,, తల్లీకొడుకులకు గాయాలు

నడిరోడ్డుపై పశువులు బీభత్సం సృష్టిస్తూ వాహనదారులకు ఇబ్బందులు కలిగించడం.. ఉన్నట్టుండి దాడులు చేయడం వంటి ఘటనలు చోటుచేసుకుంటుండగా.. దానికి సంబంధించిన వీడియోలు ఇటీవల సోషల్ మీడియాలో తరుచూ దర్శనమిస్తున్నాయి. తాజాగా, ఓ ఎద్దు రంకెలు వేస్తూ బైక్‌పై వెళ్తోన్నవారిపై దాడిచేసిన వీడియో సోషల్ మీడియాలో హల్‌చల్ చేస్తోంది. ఈ ఘటన దేశ రాజధాని ఢిల్లీలో మూడు రోజుల కిందట చోటుచేసుకుంది. బైక్‌పై వెళ్తున్న తల్లీ కొడుకులపై ఎద్దు విచక్షణారహితంగా దాడిచేయడంతో వారు తీవ్రంగా గాయపడ్డారు. వివరాల్లోకి వెళ్తే.. తూర్పు ఢిల్లీలోనీ గీతా కాలనీ ఏరియా ఎప్పుడూ బిజీగా ఉంటుంది. ఆ ప్రాంతంలో శుక్రవారం మధ్యాహ్నం వాహనదారులు అటుఇటు రాకపోకలు సాగిస్తున్నారు.

ఈ క్రమంలో తల్లీకొడుకులు అటుగా బైక్‌పై వస్తున్నారు. ఇంతలో రోడ్డుపైకి సడెన్‌గా ఓ ఎద్దు ఎంట్రీ ఇచ్చింది. ఎద్దు రాకను గమనించిన బైక్ నడుపుతోన్న మహిళ వేగం తగ్గించింది. ఎద్దు వెళ్లిపోయాక ముందుకెళ్లొచ్చని భావించింది. కానీ, అంతలోనే ఊహించని విధంగా అది వారిపై దాడికి పాల్పడింది. కొమ్ములతో పొడిచి, ఎత్తి కుదేసింది. దీంతో బైక్ పై నుంచి తల్లీ కొడుకులు కిందపడిపోయారు. అయినప్పటికీ కూడా వారిని వదిలిపెట్టలేదు. దీనిని గమనించిన ఇతర వాహనదారులు, స్థానికులు ఆ ఎద్దును తరిమికొట్టి వారిని రక్షించే ప్రయత్నం చేశారు. రాళ్లు, కర్రలు పట్టుకుని దాన్ని తరమాలని చూసినా కానీ, తల్లీకొడుకులపై దాడిచేస్తూనే ఉంది. అడ్డుకోబోయినవారిపై కూడా దాడికి ప్రయత్నించింది. అలా కొద్దిసేపు బీభత్సం సృష్టించి, చివరికి అక్కడి నుంచి వెళ్లిపోయింది.

ఈ దాడిలో తీవ్రంగా గాయపడిన తల్లీకొడుకులను స్థానికులు ఆస్పత్రికి తరలించారు. ప్రస్తుతం వారికి ఆస్పత్రిలో చికిత్స కొనసాగుతోంది. జులై 21న జరిగిన ఈ ఘటనకు సంబంధించిన వీడియో సోషల్ మీడియాలో వైరల్ అవుతోంది. దీనిపై నెటిజన్లు తీవ్రంగా మండిపడుతున్నారు. ఇటువంటి ఘటనలపై ప్రశ్నించడానికి దేశంలో ఏ ఒక్కరూ సాహసించరు లేదా రాజకీయ నాయకులను ప్రశ్నించరని దుయ్యబడుతున్నారు. ఇలా పశువులు విచ్చలవిడిగా రోడ్లపై వదిలేయకుండా, దాడులకు పాల్పడకుండా అధికారులు చర్యలు తీసుకోవాలని డిమాండ్ చేస్తున్నారు.