కరీనా కపూర్‌ పట్టించుకోలేదు.. కనీసం పలకరించలేదు

బాలీవుడ్‌ ప్రముఖ నటి కరీనా కపూర్‌ గురించి ఇన్ఫోసిస్‌ సహ వ్యవస్థాపకుడు నారాయణ మూర్తి దంపతుల ఆసక్తికర సంభాషణకు సంబంధించిన ఓ వీడియో ప్రస్తుతం నెట్టింట హల్‌చల్ చేస్తోంది. అభిమానులను కరీనా అంతగా పట్టించుకోరని నారాయణ మూర్తి అంటే.. ఆయన వ్యాఖ్యలను ఆయన సతీమణి సుధామూర్తి వ్యతిరేకిస్తూ నటికి మద్దతుగా నిలిచారు. వివరాల్లోకి వెళ్తే.. ఈ ఏడాది ఆరంభంలో నారాయణ మూర్తి దంపతులు ఐఐటీ కాన్పూర్‌లో జరిగిన ఓ చర్చా కార్యక్రమంలో పాల్గొన్నారు. ఆ సయమంలో నారాయణ మూర్తి మాట్లాడుతూ నటి కరీనా కపూర్ ప్రస్తావన తీసుకొచ్చారు.

‘‘ఓసారి నేను లండన్‌ నుంచి వస్తుండగా విమానంలో నా పక్క సీట్లో నటి కరీనా కపూర్‌ కూర్చున్నారు.. నటిని చూసిన ఆనందంలో చాలా మంది అక్కడకు వచ్చి ఆమెను పలకరించారు.. కానీ, ఆమె కనీసం స్పందించలేదు.. అది చూసి నాకు ఆశ్చర్యం కలిగింది.. ఎవరైనా మన దగ్గరకు వచ్చి పలకరిస్తే లేచి నిలబడి నిమిషమో, అర నిమిషమో మాట్లాడుతాం.. మననుంచి వాళ్లు కోరుకునేది కూడా అంతే’’ అని గతంలో జరిగిన ఓ సంఘటనను నారాయణ మూర్తి గుర్తుచేసుకున్నారు.

అయితే, ఈ సమయంలో ఆయన సతీమణి సుధామూర్తి కలుగజేసుకుంటూ. ‘‘ఆమెకు కోట్లాది మంది అభిమానులుంటారు.. బహుశా ఆమె అలసిపోయి ఉండొచ్చు.. ఓ సాఫ్ట్‌వేర్‌ వ్యక్తి, సంస్థ వ్యవస్థాపకుడు అయిన నారాయణ మూర్తికి ఓ 10 వేల మంది అభిమానులు ఉంటారేమో..! కానీ, సినీ నటికి కోట్లలో అభిమానులు ఉంటారు కదా’’ అని కరీనాకు మద్దుతుగా నిలిచారు. దీంతో అక్కడున్నవారంతా నవ్వులు చిందించారు.

కానీ, నారాయణ మూర్తి తన ప్రసంగాన్ని కొనసాగిస్తూ.. ‘‘ఇక్కడ సమస్య అది కాదు.. ఎవరైనా మనపై అభిమానం, ఆప్యాయత చూపించినప్పుడు.. మనం కూడా ఆ ప్రేమను తిరిగి చూపించాలి.. అది ఏ రూపంలోనైనా కావచ్చు.. తిరిగి చూపించడమే చాలా ముఖ్యం... ఇవన్నీ మన ఇగోను తగ్గించే మార్గాలు ’’ అని మూర్తి వ్యాఖ్యానించారు. దీనికి సంబంధించిన వీడియోను ఓ డిజిటల్‌ క్రియేటర్ సంస్థ తమ ఇన్‌స్టాగ్రామ్ పేజీలో షేర్‌ చేయగా... ప్రస్తుతం వైరల్‌గా మారింది. కాగా, ఇటీవల సుధామూర్తి తనకు బాలీవుడ్ నటి అలియా భట్ అంటే చాలా ఇష్టమని, 2018లో వచ్చిన రాజ్ సినిమాలో ఆమె నటనకు కన్నీళ్లొచ్చాయని ఆమె అన్న మాటలు సోషల్ మీడియాలో వైరల్ అయ్యాయి.