అద్దెకు చెల్లించకుండా మోసంచేసిన టీనెంట్,,,రియల్ ఎస్టేట్ అంత సులువుకాదన్న దీపక్ షెనాయ్

ఓ కార్పొరేట్ సంస్థ సీఈఓ ఇంట్లో అద్దెకు దిగిన వ్యక్తి.. మొదటి నెల తర్వాత అద్దె చెల్లించడం మానేశాడు. దీంతో అతడ్ని ఖాళీచేయించడానికి రెండేళ్లు కోర్టుల చుట్టూ తిరగాల్సి వచ్చింది. తనకు ఎదురైన ఈ విచిత్రమైన అనుభవాన్ని బెంగళూరుకు చెందిన కార్పొరేట్ ఫైనాన్స్ అడ్వైజరీ కంపెనీ క్యాపిటల్ మైండ్ వ్యవస్థాపకుడు, సీఈఓ దీపక్ షెనాయ్‌కు సోషల్ మీడియాలో పంచుకున్నారు. మొదటి నెల తర్వాత అద్దె చెల్లించని ఆ వ్యక్తిని ఫ్లాట్ నుంచి బయటకు పంపడానికి తన తల్లికి రెండేళ్లు పట్టిందని ఆయన పేర్కొన్నారు. షెనాయ్ తన అనుభవం గురించి లోతైన వివరాలను అందజేశాడు.

నాలుగేళ్లు సుదీర్ఘ న్యాయ పోరాటం తర్వాత అద్దెకు దిగిన వ్యక్తి నుంచి ఫ్లాట్‌ను విజయవంతంగా తిరిగి స్వాధీనం చేసుకున్న బెంగళూరుకు చెందిన పెద్దాయన గురించి వార్తా పత్రికలో వచ్చిన కథనాన్ని కూడా తన పోస్ట్‌కు జతచేశారు‘వ్యక్తిగతంగా ఇలా జరిగింది... మొదటి నెల తర్వాత అద్దె చెల్లించడానికి నిరాకరించిన అద్దెదారుని ఖాళీ చేయమని అమ్మ రెండు సంవత్సరాల పాటు ప్రతి రెండు నెలలకు ఒకసారి కోర్టుకు వెళ్లింది.. ఇంతకు ముందు వేరేవాళ్లను ఇలాగే వేధించారని అతడు కూడా తిరిగి మాపై కేసు పెట్టాడు.. కోర్టు ఉత్తర్వులు రావడానికి రెండు సంవత్సరాలు పట్టింది.. ఆ తర్వాత వాస్తవంగా అతడ్ని బయటకు పంపడానికి మరో మూడు నెలలు పట్టింది. పోలీసులు రావడానికి ముందు రోజు ఆ మోసగాడు ఖాళీ చేసి వెళ్లిపోయాడు’ అని తెలిపారు.

ఈ భయానక అనుభవం తన తల్లిని ఎంతగానో ప్రభావితం చేసిందని, ఆమె తన ఆస్తులను చాలా వరకు విక్రయించిందని చెప్పారు. ఆ తర్వాత, అమ్మ స్థిరాస్తులన్నీ అమ్మేసి, ఇప్పుడు తనకున్న ఒకే ఒక్క ఇంటిలో నివసిస్తోంది.. కొంత భూమిని గూండాలు ఆక్రమించుకున్నారని వాపోయారు. ‘రియల్ ఎస్టేట్ మాకు కలిసి రాలేదు.. చాలా తక్కువ మొత్తంతో మా ద్వారా మార్కెట్‌లో ఎక్కువ డబ్బులు సంపాదించారు’ క్యాపిటల్ మైండ్ CEO జోడించారు. కాగా, గతంలోనూ ఇలాంటి ఘటనలు చోటుచేసుకున్నాయి. బెంగళూరులోని జేపీ నగర్‌లో ఓ రిటైర్డ్ బ్యాంకు ఉద్యోగి వేణుగోపాల్ మెట్టూరు పద్మనాభన్ 2019లో తన ఇంటిని ఓ జంటకు అద్దెకు ఇచ్చారు. ఓ ఇంట్లో అద్దెకు దిగిన దంపతులు.. అడ్వాన్స్ కింద రూ. లక్షకు చెక్ ఇచ్చారు. అయితే, నెల నెల అద్దె చెల్లించకపోగా... వాళ్లు ఇచ్చిన చెక్ బౌన్స్ అయ్యింది. దీంతో ఆయన కోర్టుకు వెళ్లడంతో నాలుగేళ్ల పాటు పోరాటం సాగించారు. ఇటీవలే ఆయనకు అనుకూలంగా కోర్టు తీర్పు ఇచ్చింది.