పార్లమెంటు వద్ద ఎంపీని తన్నిన కాకి,,,సోషల్ మీడియాలో వైరల్‌గా మారిన ఫొటోలు

పార్లమెంటు ఆవరణలో బుధవారం ఒక విచిత్రమైన సంఘటన చోటు చేసుకుంది. వర్షాకాల సమావేశాల సందర్భంగా పార్లమెంటు ఉభయ సభల సభ్యులు, అధికారులు, సిబ్బంది హడావుడిగా వెళ్తున్నారు. ఈ క్రమంలోనే ఓ ఎంపీ అక్కడికి వచ్చారు. అయితే అదే సమయంలో ఒక కాకి ఆ ఎంపీని తన్నింది. అయితే ఈ ఘటనపై అధికార బీజేపీ హాస్యాస్పదంగా స్పందించింది. అబద్దాలు చెప్పినందుకే ఇలా ఎంపీపై కాకి దాడి చేసిందని ఆరోపించింది. దీంతో అధికార, విపక్షాల మధ్య తీవ్ర మాటల యుద్ధానికి దారితీసింది.

అయితే కాకితో తన్నులు తిన్నది మాత్రం ఆమ్ ఆద్మీ పార్టీ ఎంపీ రాఘవ్ ఛద్దా. వర్షాకాల సమావేశాల సందర్భంగా పార్లమెంటు ఆవరణలో రాఘవ్ ఛద్దా ఫోన్‌ మాట్లాడుతూ ఉన్నారు. అదే సమయంలో అక్కడికి వచ్చిన ఓ కాకి రాఘటవ్ ఛద్దాను తన్నింది. అయితే ఈ తతంగం అంతాకెమెరాకు చిక్కింది. ఈ ఫొటోలు సామాజిక మాధ్యమాల్లో వైరల్ అయ్యాయి. దీంతో ఆమ్ ఆద్మీ పార్టీని ఎప్పుడెప్పుడు విమర్శించాలా అని వేచి చూస్తున్న బీజేపీ.. విమర్శల దాడి ప్రారంభించింది. అబద్ధాలు చెప్పినందుకే ఇలా రాఘవ్ ఛద్దాపై కాకి దాడి చేసిందని వ్యాఖ్యానించింది.

ఈ మేరకు బీజేపీ ఢిల్లీ శాఖ ఈ ఘటనకు సంబంధించిన ఫొటోలను ట్వీట్ చేస్తూ హేళన చేసింది. అబద్ధాలు చెప్పిన వ్యక్తిని కాకి పొడిచింది అని క్యాప్షన్ ఇచ్చింది. ఇలాంటి వాటిని ఇప్పటి వరకు విన్నామని.. ఇప్పుడు కళ్లారా చూస్తున్నామని ఎద్దేవా చేసింది. అయితే దీనిపై నెటిజన్లు భిన్నంగా స్పందిస్తున్నారు. కొంత మంది ఆప్ ఎంపీకి మద్దతుగా కొందరు.. బీజేపీకి మద్దతుగా మరికొందరు ట్వీట్లు చేస్తున్నారు. మరికొందరు నెటిజన్లు మాత్రం రాఘవ్ ఛద్దా ఆరోగ్యంపై తీవ్ర ఆందోళన వ్యక్తం చేశారు. కాకి తన్నడం మంచి శకునం కాదని.. కామెంట్లు చేస్తున్నారు.

ఆమ్‌ ఆద్మీ పార్టీ ఎంపీ రాఘవ్‌ చద్దా, బాలీవుడ్‌ నటి పరిణీతి చోప్రాకు ఇటీవలె నిశ్చితార్థం జరిగింది. గత కొన్ని రోజులుగా వారిద్దరూ ప్రేమలో ఉన్నారంటూ వస్తున్న వార్తలకు చెక్ పెడుతూ మే 13 వ తేదీన సెంట్రల్‌ ఢిల్లీలోని కపుర్తలా హౌస్‌లో రాఘవ్ - పరిణీతి ఎంగేజ్‌మెంట్ ఘనంగా జరిగింది. ఇరువురి కుటుంబ సభ్యులు, పలువురు రాజకీయ నాయకులు సహా దాదాపు 150 మంది అతిథులు సమక్షంలో వారు ఉంగరాలు మార్చుకున్నారు. ఈ ఏడాది అక్టోబర్ లేదా నవంబర్ నెలలో రాఘవ్ - పరిణీతి పెళ్లి జరగనున్నట్లు తెలుస్తోంది.