తేలికపాటి నుంచి మోస్తరుగా,,,ఏపీలో కొనసాగుతున్న వర్షాలు

బంగాళాఖాతంలోని తీవ్ర అల్పపీడనం గురువారానికి బలహీనపడి అల్పపీడనంగా మారింది. ఇది వాయువ్యంగా పయనించి గురువారం సాయంత్రానికి ఒడిశా మధ్య ప్రాంతంలో కొనసాగుతోంది. అల్పపీడనం రాష్ట్రానికి దూరంగా వెళ్లడంతో కోస్తా, రాయలసీమల్లో వర్షాలు కొంత తగ్గుముఖం పట్టాయి. రానున్న 24 గంటల్లో కోస్తా, రాయలసీమల్లో పలుచోట్ల వర్షాలు కురుస్తాయని వాతావరణశాఖ తెలిపింది. సముద్రంలో రుతుపవన ప్రభావం ఉండడంతో కోస్తాలో తీరం వెంబడి బలమైన గాలులు వీస్తున్నాయి. శుక్రవారం కూడా మత్స్యకారులు సముద్రంలో చేపల వేటకు వెళ్లరాదని అధికారులు సూచించారు.

అల్లూరి సీతారామరాజు, పార్వతీపురం మన్యం, శ్రీకాకుళం, విజయనగరం, విశాఖపట్నం, అనకాపల్లి, ప్రకాశం, తూర్పు గోదావరి, కాకినాడ, కోనసీమ, పశ్చిమ గోదావరి, ఏలూరు, ఎన్టీఆర్, కృష్ణా, గుంటూరు, పల్నాడు, బాపట్ల జిల్లాల్లో మోస్తరు నుంచి భారీ వర్షాలకు అవకాశం ఉందంటున్నారు. అలాగే అక్కడక్కడా ఈదురు గాలులు కూడా వీస్తున్నాయి. మరోవైపు ప్రస్తుతం ఉన్న అల్పపీడనం ప్రభావం ఈనెల 29 వరకూ ఉండనుంది. బంగాళాఖాతంలో ఆగస్టు 2నాటికి మరో అల్పపీడనం ఏర్పడవచ్చని అంచనా వేస్తోంది వాతావరణ శాఖ. ఈ అల్పపీడనం ఉత్తరాంధ్ర, ఒడిశా మధ్య కేంద్రీకృతం కావచ్చని భావిస్తున్నారు.

కోస్తాంధ్ర, ఉత్తరాంధ్రలో.. శ్రీకాకుళం జిల్లా తామడలో 218 మిల్లీ మీటర్లు, అల్లూరి సీతారామరాజు జిల్లా కూనవరంలో 121, ఏలూరు జిల్లా కుకునూరులో 110, అల్లూరి సీతారామరాజు జిల్లా చింతూరులో 96, విజయనగరంలో 90, విశాఖ జిల్లా భీమిలిలో 86, విజయనగరం జిల్లా పూసపాటి రేగడ 84, విశాఖలో 78, శ్రీకాకుళం జిల్లా రణస్థలంలో 78, ఎన్టీఆర్ జిల్లా తిరువూరులో 74, పార్వతీపురం మన్యం జిల్లా పాలకొండలో 74, పార్వతీపురం మన్యం జిల్లా పాలకొండలో 74, ఏలూరు జిల్లా చింతలపూడిలో 71, శ్రీకాకుళం జిల్లా కళింగపట్నం 65, విజయనగరం జిల్లా డెంకాడ 55, ఎన్టీఆర్ జిల్లా విజయవాడ 50 మిల్లీ మీటర్ల వర్షాపాతం నమోదైంది.

రాయలసీమ జిల్లాల విషయానికి వస్తే.. నంద్యాలలో 82, నంద్యాల జిల్లా రుద్రవరంలో 68, కర్నూలు జిల్లా పత్తికొండలో 62, నంద్యాల జిల్లా నందికొట్కూరులో 56, కర్నూలులో 50, కర్నూలు జిల్లా ఓర్వకల్లులో 50, నంద్యాల జిల్లా ఆత్మకూరులో 50, కర్నూలు జిల్లా సీ బెలగళ్ 50, నంద్యాల జిల్లా దర్నిపాడులో 50 సెంటీమీటర్ల వర్షపాతం నమోదైంది.

గోదావరిలో వరద పెరుగుతుండడంతో అన్నిరకాల చర్యలు తీసుకోవాలని సీఎం వైఎస్ జగన్ అధికారులను ఆదేశించారు. ముంపు బాధితులకు బాసటగా నిలవాలని.. సహాయక శిబిరాల్లో ఎలాంటి కొరతా లేకుండా చూసుకోవాలని, తాగునీరు సహా ఇతరత్రా సదుపాయాల్లో లోటు రాకూడదని సీఎం స్పష్టంచేశారు. సహాయక చర్యలు కోసం సీఎం ఆదేశాల మేరకు ఆయా జిల్లాల కలెక్టర్లకు నిధులు విడుదలచేశామని అధికారులు చెప్పారు. ముంపు ప్రాంత ప్రజలను సహాయక శిబిరాలకు తరలించామని,మందులు సహా ఇతరత్రా అత్యవసర వస్తువులను సిద్ధంగా ఉంచామని తెలిపారు.కోనసీమజిల్లాలో 150 బోట్లను రెడీ ఉంచామని సీఎంకు వివరించారు.

గోదావరి ప్రభావిత జిల్లాలకు అత్యవసర సహాయక చర్యలకు 12 కోట్లు నిధులు మంజూరు చేసింది ప్రభుత్వం. అత్యవసర సహాయక కేంద్రాల ఏర్పాటుకు ఆదేశించారు. ముంపు గ్రామాల నుంచి ప్రజలను తరలించేందుకు.. ఆహారం, నీరు, పాలు, హెల్త్ క్యాంపు, శానిటేషన్ కోసం నిధులు మంజూరు చేసింది ప్రభుత్వం. ఈ రూ.12 కోట్లలో అల్లూరి సీతారామరాజు జిల్లా 3, తూర్పుగోదావరి జిల్లా1, డాక్టర్ బీఆర్ అంబేద్కర్ కోనసీమ జిల్లా 3, ఏలూరు 3, పశ్చిమ గోదావరి 2 కోట్లు కేటాయించారు. ఈ మేరకు రెవిన్యూ (డిజాస్టర్ మేనేజ్మెంట్) స్పెషల్ చీఫ్ సెక్రటరీ జీవో జారీ చేశారు.