కూలీలకు చీరలు కొనిచ్చిన టమాటా రైతు

టమాట పంట అమ్మడం ద్వారా మంచి లాభాలు రావడంతో.. ఆ పంట సాగులో పాల్పంచుకున్న కూలీ మహిళలకు చీరలు కొనిచ్చారు ఓ రైతు. సుమారు 20 మంది మహిళలకు చీరలు కానుకగా ఇచ్చారు. మరి కొంత మంది పురుషులకు కూడా కొత్త బట్టలు కొనిచ్చారు తంబళ్లపల్లికి చెందిన రైతు నరసింహారెడ్డి.

వ్యయప్రయాసలకోర్చి వ్యాపారం చేసి విజయవంతమైన వారు, లక్షలకు లక్షలు సంపాదించిన వాళ్లు ఎంతో మంది ఉంటారు. ఆ వ్యాపారంలో భాగమైన కార్మికులను గుర్తుంచుకొని కొంత పంచి పెట్టాలని భావించే వారు ఎంత మంది ఉంటారు? ఆంధ్రప్రదేశ్‌లో టమాటా సాగుతో మంచి లాభాలను ఆర్జించిన ఓ రైతు.. ఆ పంట సాగులో మమేకమైన కూలీలందరికీ కొత్త బట్టలు కొనిచ్చారు. సుమారు 20 మంది మహిళలకు చీరలు కానుకగా ఇచ్చారు. కొంత మంది పురుషులకు కొత్త బట్టలు కొనిచ్చారు. రైతు కాబట్టే.. కూలీల కష్టం ఏంటో తెలుసు కాబట్టే ఈ మంచి పని చేశారు. దుస్తుల పంపిణీకి సంబంధించిన వీడియో సోషల్ మీడియాలో వైరల్ అవుతోంది.

అన్నమయ్య జిల్లా తంబళ్లపల్లికి చెందిన నరసింహారెడ్డి తనకున్న 5 ఎకరాల పొలంలో టమాట సాగుచేశారు. ఈసారి ధర బాగుండటంతో మంచి లాభాలు గడించారు. దీంతో తన టమాట సాగులో భాగస్వాములైన కూలీలకు మంచి చేయాలని భావించిన నరసింహారెడ్డి మహిళలకు చీరలు, పురుషులకు కొత్త బట్టలు కొనిచ్చారు. అందుబాటులో లేని మహిళలను కూడా గుర్తుపెట్టుకొని వారికి ఇవ్వాలని చెప్పి, వారికి మరి కొన్ని చీరలు అందజేశారు.

రవాణా ఖర్చులకు కూడా సరిపోను డబ్బులు రాక ఒకప్పుడు టమాట రైతులు తాము పండిన పంటను చెత్తకుప్పల్లో పారబోశారు. కానీ, ఈసారి ఆ పరిస్థితి మారింది. ఎన్నడూలేనివిధంగా టమాట రేటు కొండెక్కింది. కిలో టమాట రూ. 140 నుంచి రూ. 200 వరకూ పలుకుతోంది. దీంతో టమాట సాగు చేసిన కొంత మంది రైతులు ఈసారి భారీగా లాభాలను అర్జించారు. రైతు నరసింహారెడ్డి ఆ సంతోషాన్ని కూలీలతోనూ పంచుకున్నారు. ప్రస్తుతం ఆయన తంబళ్లపల్లి వాటర్‌షెడ్ ఛైర్మన్‌గానూ వ్యవహరిస్తున్నారు.